Basísk kvika veit á stutt gos

- Sé kvikan baískt er líklegt að gosið í Eyjafjallajökli verði stutt. - Þetta eru eiginlega stórfréttir fyrir okkur leikmenn. Ekki er algengt að  jarðfræðingar deili með okkur leyndardómum fræða sinna. Hafi Magnús Tumi þökk fyrir.

Held að það hafi gest síðast þegar Haraldur Sigurðsson jarðfræðingur uppljóstraði því að gosefnin sem komu upp úr Litla og Stóra á Fimmvörðuhálsi væru ættuð úr möttli jarðar.

Þar áður hafði einhver jarðfræðingur sagt að annað hvort yrði gosið á Fimmvörðuhálsi langt eða stutt. Hann hafði tvímælalaust rétt fyrir sér. Sá hlýtur að vera í fríi núna.

Segir til um lengd goss

Skotleyfi vinstri manna á forsetann

Glögglega má sjá að algjör vinslit hafa orðið með forseta Íslands og vina hans og samferðamanna á vinstri væng stjórnmálanna. Ástæðan er auðvitað synjun hans á staðfestingu Icesave laganna. Í sjálfu sér gat maður sagt sér það að synjunin myndi valda manninum miklum vandræðum, en nú er ljóst að þau eru miklu meir. Algjör vinslit.

Nú ráðast fyrrum samherjar Ólafs á hann miskunarlaust. Hann verður barinn niður með öllum ráðum. Fjármálaráðherra hefur tjáð sig, heilbrigðisráðherra kveður enn fastar að orði og svo eru það fótgönguliðarnir af öllum tignargráðum sem hafa fengið ótakmarkað skotleyfi. óbreyttir þingmenn eru eins og hýenur, glefsa, bíta og sparka í þennan gamla samherja eins og þeir mest og best geta.

Rétt eins og segir í bíómyndunum um mafíuna; There is a contract on him. 

Ofbauð viðbrögð forseta Íslands

Álfheiður gerð afturreka

Ekki tlest það til góðra stjórnunarhátta að hóta undirmönnum sínum. Þaðan af síður telst það jákvætt fyrir stjórnanda að vera gerður afturreka með stóru orðin.

Hófstillt orð hafa meiri áhrif en læti og vanstilling. Ekki verður annað hægt að segja en að heilbrigðisráðherra hafi látið í minni pokann. Það er gott hjá henni að bakka. Hún hefði aldrei haft neitt upp úr krafsinu hefði hún haldið sínu striki. 

Hins vegar hef ég enga trú á að trúnaður ríki milli Álfheiðar og Steingríms Ara.  

Ekki tilefni til áminningar

Kort af Eyjafjallajökli, gossprunga og flóð

Gott kort af Eyjafjalljökli og staðháttum hefur vantað í fjölmiðlum. Birti því þetta sem ég fékk af vef Jarðvísindastofnunar. Setti inn til viðbótar nokkrar upplýsingar.

Jarðvísindamenn hafa sett inn á kortið fjölmargar nytsamar upplýsingar fyrir þá sem áhuga hafa. Þarna er toppgígur Eyjfjallajökuls vel merktur. Gossprungan er greinilega tvískipt. Ég hef svo bætt við flóðinu úr báðum hlutum hennar, annars vegar til norðurs og hins vegar til suðurs.

Jökullinn er vinsæll til útivistar. Á hann hef ég merkt helstu gönguleiðina yfir hann, svokallaða Skerjaleið. Hún er kennd við Sker sem eru í norðvestanverðum jöklinum og er gömul gossprunga.

Gönguleiðin yfir Fimmvörðuháls er þarna merkt. Á Hálsinum má sjá „gömlu“ gosstöðvarnar. Einnig er Steinsholtsjökull merktur inn á kortið.

Að lokum er ekki úr vegi að benda á allan þann fróðleik sem hægt er að hafa á vef Jarðvísindastofnunar, en slóðin þar er  http://www.jardvis.hi.is/page/jardvis_eyjogos.

Smöluðu búfé í öskufalli

Fín mynd, rangur myndatexti

Myndin sem fylgir þessari frétt er ekki af Markarfljóti né neinu í nágrenni þess.

Myndin er tekin við þjóðveginn og horft er til Núps ofan við Þorvaldseyri og þetta er líklegast Svaðbælisáin sem ruddist svo ofsalega fram í dag. Líklega um 20 km frá Markarfljóti.

Í myndatextanum segir: „Seinna hlaupið er komið að Markafljótsbrúnni.“

Þetta er ekki í fyrsta sinn sem mbl.is klúðrar myndatextum eða myndum. Hvort tveggja er afar undarlegt vegna þess að hjá Mogganum starfa svo margir góðir ljósmyndarar. Alveg óþarfi er að klúðra myndum þeirra.

Kl. 21:21 var búið að breyta um mynd. 

Hlaupið komið að Markarfljótsbrúnni

Fimmvörðuháls er köflóttur

Á Fimmvörðuhálsi virðist nú snjóa svart og hvítu, jafnvel svart á hvítu. Meðfylgjandi mynd tók ég kl. 16:37 af vefmyndavél Mílu sem staðsett er á Fimmvörðuhálshrygg.

Myndavélin horfir í norður. Í dag hefur verið vestanátt og askan fallið á Fimmvörðuháls . Engu að síður er snjórinn næst myndavélinni alveg svartur. Fjær er hann grár. Í fjarska sést svo til Litla og Stóra, gígana á norðanverðum hálsinum.

Ekki veit ég hvað veldur en það er dálítið sérkennilegt að sjá Hálsinn svona köflóttan.

Mikið tjón á Þorvaldseyri

Vegamótin á kafi í vatni

Myndatextinn með þessari frétt er afskaplega slappur. Getur ekki verið að myndin sé af vegamótum Suðurlandsvegar og svokallaðs Þórsmerkurvegar (249)?

Ómögulegt er að greina hvað stendur á skiltinu. Geri ráð fyrir því að þar standi Þórsmörk og á efra skiltinu Stóri-Dalur eða Merkurbæir. Það skiptir þó minnstu máli. Þarna eru vegamótin á kafi.

Þetta er nokkuð sem manni datt aldrei í hug að maður myndi sjá. 

Gröfumaðurinn bjargaði miklu

Gamlar myndir frá toppgíg Eyjafjallajökuls

Gosið er eins og fram kemur í toppgíg Eyjafjallajökuls.

 

Efsta myndin er tekin á tindi Hámunds sem er hæsti hluti jökulsins og hluti af gígriminni. Í fjarska sést í lægri tind en hægra megin er toppgígurinn sjálfur.

 

Eldsprungan er hægra megin við tindinn í fjarska, eiginlega þar sem birtan fellur á jökulinn. Munum að sprungan nær yfir gígrimina.

 

Næsta mynd er tekin frá Hámundi í norðvestur og þarna er Guðnasteinn sem sumir kalla Goðastein. Á milli er sjálfur toppgígurinn.

 

Þriðja myndin er tekin á Innra-Skolti og er horft yfir til Guðnasteins sem ber hæst og Ytra-Skolts sem illa sést í rökkrinu en er fyrir ofan hamrana hægra megin við miðja mynd.

 

Á fjórðu myndinni er horft til norðurs, út skarðið milli Ytra-Skolts og Innra-Skolts.

 

Þarna í forgrunni er stór hluti af toppgígnum. Hann er fullur af jökli en eins og fram hefur komið víða hefur sá jökull dregist saman á undanförnum árum og er líklega mun minni en sér á myndinni.

 

Á fimmtu myndinni sér niður Gígjökul og á Lónið við jökulsporðinn. Affallið úr lóninu rennur til norðvesturs. Þarna niður er líklega um 1000 m fall.

 

Sjötta og síðasta myndin er af göngumönnum sem eru að klífa upp Hámund að austanverðu. Í baksýn er Eyjafjallajökull, Fimmvörðuháls og Mýrdalsjökull. Stórfenglegt útsýni.

 

Allar myndirnar tók ég þann 6. janúar 2001. 

 

  

 

 

 

 

 

 

  

 

 

 

 

 

 

 

 

 

 

Flóðið hefur náð hámarki

Gígopin er suðvestan í toppgígnum

Skortur á myndum af hamförunum og afleiðingum þeirra er að verða yfirþyrmandi. Meðfylgjandi mynd er þó fengin úr vefmyndavél Mílu á Fimmvörðuhálsi og er greinilegt að öskufall er þar mjög mikið. Myndin var tekin kl. 10:38.

Neðri myndin var tekin nákvæmlega hálftíma áður. Á þessum myndum er mikill munur. skyggnið hefur greinilega farið versnandi.

Af þeirri mynd sem fylgir með fréttinni er greinilegt að gígopin eru suðvestan í gígnum. 

Neðst á myndinni er hvítt svæði, það er líklega Hámundur, efsti hluti Eyjafjallajökuls.

Lengst til vinstri er annað og smærra  svæði og það er ónafngreindur tindur, vestan við Hámund og sunnan við Guðnastein.

 

 

 

Sigdæld myndast í jöklinum

Surtsey, Heimaey, 5VH og Eyjafjallajökull

Nauðsynlegt er að fá uppgefið hvort vatnavextir í Lóninu eða Markarfljóti séu meiri en við leysingar að vori. Miðað við myndina sem fylgir fréttinni sýnist mér vatnið í Markarfljóti ekkert meira en oft á vorin eða sumrin.

Hér er meðfylgjandi lítið kort sem sýnir afstöðu Surtseyjar, Vestmannaeyja og Eyjafjallajökuls. Ég man eftir því þegar gaus á Heimaey að vangaveltur voru uppi meðal jarðfræðinga að tengsl væru milli Surtseyjargossins, gossins í Heimaey og þeirrar staðreyndar að Katla hafi ekki gosið. Þessi gos hafi hugsanlega dregið úr þrýstingi á Kötlu. þekking manna á þeim tíma var að vísu miklu minni en nú á dögum.

Set hérna líka inn mynd úr vefmyndavélinni í Surtsey. Hún horfir til norðausturs en ekkert sést til gosstöðvanna á Eyjafjallajökli vegna skýjafars. Ekki heldur til meints 4.500 m hás gosmökks.

Fyrir nokkrum vikum var ég að ganntast með bollaleggingar fólks um Kötlugos. í bloggi mínu frá 6. apríl segir:

Gaman er að fylgjast með bollaleggingum fólks um Kötlugos. Klofningur hefur orðið í hópi glöggskyggna manna. Hluti þeirra heldur því fram að gos hefjist í Kötlu þann 14. apríl en þá kviknar nýtt tungl. Hinn hópurinn heldur að gosið hefjist þann 30. apríl en þá verður næst fullt tungl.

Nú hefur komið á daginn að ekki gýs í Kötlu heldur í Eyjafjallajökli og það er 14. apríl, nýtt tungl hefur kviknað og nýtt gos. Og hvað skyldi nú gerast 30. apríl þegar tunglið verður fullt? Þori varla að hugsa þá hugsun til enda. Skyldu glöggskyggnir hafa eitthvað til síns máls?

 

Gosið er nálægt hábungunni