Samfylkingin, Viðreisn og Píratar skrökva um aðildarviðræður að ESB

Alþingi ályktar að fram fari þjóðaratkvæðagreiðsla fyrir árslok 2023 um hvort halda skuli áfram aðildarviðræðum Íslands við Evrópusambandið.

Þetta er úr furðulegri þingsályktunartillögu vinstri flokkanna á Alþingi. Ófyrirgefanlegt er að Samfylkingin, Viðreisn og Píratar skrökvi í henni. Hvort það sé gert vísvitandi eða óafvitandi vegna þekkingarleysis skal ósagt látið. Ósannindi eru það engu að síður.

Mikilvægt er að átta sig á því að aðild að ESB er ekki eins og tyrkneskt markaðstorg þar sem hægt er að prútta eftir þörfum og loks komist að niðurstöðu sem er meðaltal af því sem lagt var upp með. Svo virðist sem Samfylkingin, Viðreisn og Píratar haldi það.

Staðreyndin er einföld. Engar „aðildarviðræður“ hafa farið fram við ESB. Með þingsályktunartillögu vinstri stjórnarinnar árið 2009 var sótt um aðild Íslands að ESB. Evrópusambandið samþykkti hana. Í kjölfarið hófust aðlögunarviðræður, ekki aðildarviðræður, þær eru ekki lengur til í reglum Evrópusambandsins.

Afar mikilvægt er að stjórnmálamenn sem og aðrir átti sig á muninum á orðalaginu aðildarviðræður og aðlögunarviðræður.

Á ensku nefnast aðlögunarviðræður „Accession negotiations“. Þær eru fyrir ríki sem ætla sér að ganga inn í ESB. Þetta eru ekki aðildarviðræður og ESB varar beinlínis við þeirri túlkun. 

ESB segir einfaldlega að aðildarviðræður séu ekki lengur í boði. Ríki sem sækir um aðild hlýtur að vilja aðild, þau eru ekki að prófa, kanna aðstæður, stunda þreifingar.

Aðlögunarviðræður eru í því fólgnar að lög og reglur umsóknarríkisins eru lagaðar að stjórnskipun Evrópusambandsins, Lissabonsáttmálanum. Undanþágur eru ekki veittar.

Í reglum ESB segir:

First, it is important to underline that the term “negotiation” can be misleading. Accession negotiations focus on the conditions and timing of the candidates adoption, implimentation and application of EU rules – some 90,000 pages of them. And these rules (also known as “acquis”, French for “that which has been agreed”) are not negotiable.  

Þetta hlýtur að vera skýrt, engar samningaviðræður, aðeins aðlögunarviðræður. Umsóknarríki verður að taka um ESB reglur, 90.000 blaðsíður, samþykkja þær eða hætta við.

Ofangreinda þingsályktun leggja eftirtaldir þingmenn fram:

• Logi Einarsson
• Þorgerður K. Gunnarsdóttir
• Halldóra Mogensen
• Helga Vala Helgadóttir
• Þórunn Sveinbjarnardóttir
• Oddný G. Harðardóttir
• Kristrún Frostadóttir
• Jóhann Páll Jóhannsson
• Björn Leví Gunnarsson
• Arndís Anna Kristínardóttir Gunnarsdóttir
• Gísli Rafn Ólafsson
• Þórhildur Sunna Ævarsdóttir
• Valgerður Árnadóttir
• Þorbjörg Sigríður Gunnlaugsdóttir
• Sigmar Guðmundsson
• Hanna Katrín Friðriksson
• Guðbrandur Einarsson

Ólíklegt er að þingmennirnir hafi lesið regluna sem er hér fyrir ofan.

Eftirfarandi skjal er lýsing á aðlögunarviðræðum, „skref fyrir skref“ eins og það er orðað: https://neighbourhood-enlargement.ec.europa.eu/system/files/2022-09/eu_accession_process_clusters.pdf.

Svo er ekki verra að þessir þingmenn hlusti á ræðu Samfylkingarmannsins Össurar Skarphéðinssonar þáverandi utanríkisráðherra sem fór með rangt mál á blaðamannafundi. Á fundinum var Stefan Füle, þáverandi stækkunarstjóri ESB, og leiðrétti hann Össur svo eftirminnilega að líklega hefur sviðið undan. Sjá hér: https://www.youtube.com/watch?v=0O4fkcYwpu8.

Nú kunna ýmsir með yfirborðsþekkingu að halda því fram að Svíþjóð hafi fengið samning og jafnvel fleiri ríki. Þeir sem þetta segja hafa rétt fyrir sér. Á árunum þegar rætt var um aðild Noregs, Austurríkis, Finnlands og Svíþjóðar var farið í viðræður við þessi lönd, þá hét það „negotiations“. Það er ekki lengur gert, ESB hefur breytt reglunum.

Kostirnir og gallarnir við aðild að ESB liggja fyrir, samningurinn er klár. Hann gengur undir nafninu Lissabon-sáttmálinn. Hann vilja Píratar, Viðreisn og Samfylkingin að  Íslandi samþykki. 

Að öllum líkindum mun Alþingi fella tillöguna og er það vel.

 

 

 

Athugasemdir

[Helga Kristjánsdóttir, 22.9.2022 kl. 18:17]

þakkir fyrir þennan afburða skýra pistil ekki veitir mér af að fara yfir reglurnar,svo oft sem ég malda í móinn þegar vinstri menn minnst á ESB.eins og pardís á jörðu! Það ergir mig.

[Jósef Smári Ásmundsson (IP-tala skráð) 22.9.2022 kl. 19:59]

Ferlið er þannig að aðildarviðræður fara fram og síðan verður( samkvæmt reglum ESB) að fara fram þjóðaratkvæðagreiðsla um samninginn. En aðildarviðræður eru dýrar svo það er óvitlaust að þjóðin sé spurð áður en sótt er um. Sjálfur er ég mótfallinn aðild eins og sambandið er byggt upp í dag þó ég sé sameiningarsinni og sé ákveðna hagkvæmni í því. Aðalatriðið er að meirihluti þjóðarinnar á að ráða í þessu máli eins og öðrum. það er rétt að taka fram að upptaka EVRU er ekki sjálfgefin þótt aðildin sé samþykkt. Myntbandalagið er sérstakt bandalag og lönd sem sækja um upptöku Evrunnar þurfa að uppfylla efnahagsleg skilyrði. Það ferli getur tekið 10 ár. Um helmingur aðildarþjóða ESB eru með EVRU sem gjaldmiðil.

[S i g u r ð u r S i g u r ð a r s o n, 22.9.2022 kl. 21:11]

Jósef, þetta er rangt hjá þér. ESB býður ekki upp á „aðildarviðræður“.

Ríki sem sækir um aðild og er samþykkt þarf að breyta lögum sínum og reglum  til samræmis við Lissabonsáttmálann og ferillinn eftir það nefnast aðlögunarviðræður,  „accession negotiations“.

Mjög mikilvægt er að fólk átti sig á þessu og láti ekki plata sig með tali um aðildarviðræður og samninga. Engar undanþágur eru veittar frá Lissabonsáttmálanum.

Ríki gengur annað hvort inn í ESB eða ekki. Enginn millivegur er í boði.

[Bjarni Bjarnason (IP-tala skráð) 23.9.2022 kl. 06:59]

Fyrir nú utan að líklega er þetta allt rétt hjá þér, þá liggur annar fiskur undir steini. 

Ef Kristrún Frostadóttir á að geta tekið kjósendur með trompi í næstu kosningum þá þarf hún að vera laus við þetta aðal dellumál Samfylkingar að hanga eins og hundur í roði með inngöngu í ESB. Eins þótt málið hafi ekki átt séns hjá þjóðinni frá því fyrir Hrun.

Aðildarsinnar ætluðu reyndar að drösla þjóðinni inn þá hún var í sárum eftir Hrun, en áttu aldrei möguleika, jafnvel þá. 

Vel má ímynda sér að Kristrún hafi sagt sem svo að ef hún eigi að taka við  stjórnartaumunum þá vilji hún losna við þetta leiðindamál og dragbít. 

Um þessa leið hafi svo samist, að koma málinu frá með því að láta sverfa endanlega til stáls með þjóðaratkvæðagreiðslu. 

En það getur orðið erfitt fyrir Kristrúnu að koma eins og ferskur vindur inn í pólitíkina ef hún á að halda áfram með öll málin sem Logi og félagar komust ekki neitt með.  

[Gunnar Heiðarsson, 23.9.2022 kl. 07:57]

Sæll Sigurður

Auðvitað þekkir þetta fólk regluna um aðildarferlið og flest ættu að muna fréttamannafundinn fræga, enda ekki nema um einn áratugur síðan hann var haldinn. En þessir þingmenn eru svo veruleikafyrtir að þeir telja að almenningur viti þetta ekki. Þar vaða þeir í villu, sem á eftir að koma þeim í koll.

Þá eru helstu rökin hjá þessu fólki nú að ástandið í Evrópu kalli á aðild okkar að ESB. Þó vissulega ástandið hér á landi mætti vera betra getum við þakkað guði fyrir að það er ekki jafn slæmt og í Evrópu. Við þurfum ekkert að flytja þann hrylling inn.

Kveðja

[Grímur Kjartansson, 23.9.2022 kl. 09:43]

Þessir smáflokkar á Alþingi kyrja hvað eftir annað "Þjóðin vill" 
Þó svo aðeins örlítið brot þjóðarinnar kjósi þessa flokka
Það er allavega alveg ljóst að meirihluti Alþingis vill ekki aðildar"viðræður" og þar eru lýðræðislega kosnir fulltrúar íslensku þjóðarinnar

[Jósef Smári Ásmundsson (IP-tala skráð) 23.9.2022 kl. 13:37]

Þú mátt kalla það aðlögunarviðræður. En þetta eru aðildarviðræður.

[Sigurður Sigurðarson, 23.9.2022 kl. 15:23]

Jósef, þú sleppur ekki svona auðveldlega.

Ég fann ekki upp íslenska orðið aðlögunarviðræður, það er þýðing á Accession negotiation. Ekki er hægt að þýða hugtakið sem aðildarviðræður, það er einfaldlega villandi því engir samningar koma út úr þeim.

Vinstri flokkarnir tala um aðildarviðræður vegna þess að þeir eru að blekkja, eru að reyna að koma því inn hjá þér og öðrum Íslendingum að hægt sé að semja um skilyrði fyrir inngöngu í Evrópusambandið.

ESB varar við svona túlkun.