Þjást tugir þúsunda bara af flensu og kvefi?

Furðulegt er að skoða landakort og sjá hvernig smit vegna Covid-19 veirunnar hefur dreifst misjafnlega um jörðina. Einhvern veginn virðist ekki allt vera sem sýnist. Hér ætla ég að rekja grunsemdir mínar og reyna að styðja þær með tölulegum upplýsingum sem fáanlegar eru í dag.

Gríðarlega margir hafa smitast í Kína, en athyglisvert er hversu fáir hafa smitast í nágrannalöndunum. Vera má að í þeim sé heilbrigðiskerfið frekar vanþróað og tölur um smitaða séu ekki eins ítarlegar og á Vesturlöndum. Gæti verið að tugþúsundir manna haldi að þeir séu með „flensu“ eða „kvef“. Fjöldi fólks harkar af sér, hefur ekki efni á að liggja heima. Sjá efra kortið.

Dásamlegt er að líta til Rússlands. Þarlend stjórnvöld halda því fram að fimmtíu og níu manns hafi smitast. Munum að þar búa 146 milljónir og smitaðir því aðeins 0,00004%.

Í Japan búa 127 milljónir manna og þar eru sagðir 773 smitaðir, 0,001% landsmanna, þrettán sinnum fleiri en í Rússlandi. Í Þýskalandi og Frakklandi búa samtals um 149 milljónir manna og þar eru samtals 153 sinnum fleiri smitaðir en í Rússlandi.

Skoðum Evrópukortið sem sýnir útbreiðslu Covid-19. Margt vekur athygli en þó einna helst hversu fá smit eru í Austur Evrópu, landsvæðinu sem einu sinni var undir járnhæl kommúnismans. Hvað veldur?

Getur verið að þar sé útbreiðslan einfaldlega lítil eða heilbrigðiskerfið lélegra en í Vestur Evrópu? Getur verið að þarna séu líka þúsundir manna veikir af „flensu“ eða „kvefi“?

Ég hef enga haldbæra skýringu á fáum smitum í Austur Evrópu. Fyrst af öllu dettur manni í hug að annað hvort séu tölulegar upplýsingar ekki handbærar eða verið sé að fela útbreiðsluna. Hver trúir því til dæmis að í Póllandi séu aðeins 103 smitaðir, það er 0,0001% af íbúunum? Í Úkraínu eru þrír smitaðir, 0,00001%. Þetta lyktar allt af af „rússneskri tölfræði“.

Lítum á súluritið yfir smitaða í Austur Evrópu. Þar skera þrjú lönd sig úr, Króatía, Slóvenía og Eistland. Allt bendir til að ekki sé allt sem sýnist í öðrum löndunum.

San Marínó, er sjálfstætt smáríki á norðanverðri Ítalíu. Þar eru áttatíu smitaðir. Í Vatíkaninu er einn af 800 smitaður sem er 0,13%. Í báðum löndunum er þetta ansi hátt hlutfall. Þannig er einnig með Ísland sem er í þriðja sæti miðað við smitaða sem hlutfall af íbúafjölda, 0,046%.

Sé þessum þremur löndum sleppt er súluritið aðeins læsilegra. Ítalía trónir á toppnum með langflesta smitaða miðað við höfðatölu.

Bíðum samt við. Getur verið að eitthvað fleira lykti af „rússneskri tölfræði“. Varla er trúlegt að 0,002% Breta séu smitaðir. Á Írlandi eru þeir 0.003% sem samt er furðulega lágt hlutfall.

Og víkur nú sögunni að Austurríki, þar eru aðeins 0,007% smitaðir. Margir Íslendingar þar á skíðum og báru smit heim. Engu að síður eru þar hlutfallslega miklu færri smitaðir en hér á landi. Þarlendir hljóta að vera eins og Rússar, veiran bíti hreinlega ekki á þá. Greinilega sterkari stofn en Ítalir sem sendu fjölmarga smitaða til Íslands og eru í miklum vanda sjálfir. Í Sviss eru 0.016% smitaðir. Veiran leggur þar fleiri en í Austurríki.

Varla er grín að þessu gerandi því þegar öllu er á botninn hvolft eru allar þjóðir eins. Þess vegna er ég ansi hræddur um að ekki séu nánda nærri öll kurl komin til grafar í fjölda ríkja. Fjölmargt bendir til að fá ríki hafi verið eins forsjál í sóttvarnarmálum og Ísland og þar af leiðandi eru ófáir bara með „flensu“ eða „kvef“ þegar aðrir eru með Covid-19 veiruna. Hér hefur ekki verið rætt um Bandaríkin en þar eru 0,0009% smitaðir. Afskaplega tortryggilegt hlutfall af íbúum.

Hér er að lokum tafla sem sýnir hlutfall smitaðra í Evrópu. Betra er að smella á töfluna og aðrar myndir og verða þær þá skýrari.

 

Athugasemdir

[Halldór Egill Guðnason, 15.3.2020 kl. 22:08]

 Þakka vandaðan pistil. Ekki laust við að tölfræðin sé dulítið bjöguð og allt samræmi skorti. Flest bendir til þess að útbreiðslan sé stórlega vanmetin og stjórnvöld sumra ríkja í algerri afneitun, varðandi umfang vandans, því miður.

 Góðar stundir, með kveðju að sunnan.

[Jónas Gunnlaugsson, 15.3.2020 kl. 23:41]

Þakka umfjöllunina.

Hér er grein á ensku fróðleg. 

https://jonasg-egi.blog.is/blog/jonasg-egi/entry/2247081/

Egilsstaðir 15.03.2020  Jónas Gunnlaugsson

[Lárus Ingi Guðmundsson, 16.3.2020 kl. 10:06]

Smitleiðir eru endalausar, en í suður ameriku eru ekki margir smitaðir og að mér skillst þá þolin veira illa mikin hita. Ekki veit ég með Saudi Arabiu. 

Smitleiðir eru margar og það er nánas þvi ekki hægt að koma í veg fyrir allar smitleiðir, nema þá í hægum skrefum og þá eru ansi margir þá og þegar búnir að fá veiruna. það er auðvelt að yfirsjást smitleiðir, þegar að svona faradlur breiðist út og ein smitleiðin sem að ég er að tala um þegar að þessu kemur, eru BENSÍN DÆLLURNAR HANDFÖNGIN ??

KV

LIG

[S i g u r ð u r S i g u r ð a r s o n, 16.3.2020 kl. 11:02]

Lárus, veikin á eftir að ná fótfestu í Suður Ameríku og Afríku og miklu víðar eða þá að hún er þegar komin þangað og fólk heldur að það sé með flensu en ekki Covid-19. Eigi hiti illa við veiruna mun hún líklega stökkbreytast. Hér heima er vissara að nota hanska eða vettling þegar dælt er bensíni.

[S i g u r ð u r S i g u r ð a r s o n, 16.3.2020 kl. 11:07]

Egill, ég held að vanmatið sé alvarlegast. Ekki bara í Austur Evrópu heldur líka hér á Vesturlöndum. Trúir einhver því að frá því í gær hafi smituðum í Bretlandi aðeins fjölgað um einn. Á sama tíma fjölgaði smituðum í Þýskalandi um 841 og á Spáni um 1.407.

[S i g u r ð u r S i g u r ð a r s o n, 16.3.2020 kl. 11:08]

Bestu þakkir fyrir upplýsingarnar, Jónas.

[Guðmundur Ásgeirsson, 16.3.2020 kl. 13:39]

Klárlega eru mismunandi lönd misjafnlega dugleg að greina smit sem útskýrir eflaust mismunin að stóru leyti. Annað sem getur spilað inn í er misjafnt þróunarstig og hversu opin viðkomandi lönd eru fyrir ferðamönnum. Til dæmis er Afghanistan ekki fjölsóttur ferðamannastaður og samgöngur innanlands jafnvel takmarkaðar. Þess vegna kæmi ekki á óvart að smit berist síður þar um heldur en t.d. milli Evrópulanda þar sem mikið er ferðast. Svo eru líka til lönd eins og Norður Kórea sem voru lokuð fyrir og eru því í sóttkví af pólitískum ástæðum. Auk þess er ekki við því að búast að tölur frá þarlendum stjórnvöldum séu áreiðanlegar, ef þær verða yfir höfuð gefnar upp opinberlega.

[S i g u r ð u r S i g u r ð a r s o n, 16.3.2020 kl. 14:03]

Já, það geta verið ótal skýringar á þessu, Guðmundur. Hins vegar ferðast fleiri en skemmtiferðamenn. Fólk á erindi vegna viðskipta, stjórnmála, atvinnu og svo framvegis. Jafnvel Kínverjar eiga erindi til Norður Kóreu og þarlendir til Kína. Ríki sem eiga sameiginleg landamæri selja og kaupa yfir þau. Ótaldir eru þeir sem fara ólöglega yfir landamæri og svo þeir sem stunda smygl.

Þetta skýrir samt ekki tölur frá Austur Evrópu, sláandi tölur frá Rússlandi þar sem eru núna 63 smitaðir, svipað eins og í margfalt fámennari löndum eins og Chile (75), Peru (71), Slóvakíu (61) og Suður Afríku (61).

Í Afganistan eru sextán smitaðir. Í Tyrklandi eru 18 smitaðir (rússnesk tölfræði?). Nú hefur skráningu á smituðum í Bretlandi verið breytt. Í morgun hafði þeim fjölgað um einn en núna eru þeir orðnir 248. Sýnir bara hversu illa þarlend stjórnvöld hafa tekið á málum.

Tölfræðin skiptir meginmáli annars er ekki hægt að bregðast rétt við. Hún er afar mikilvæg hér á landi og sums staðar í Evrópu mikið vantar upp á. 

Eftir standa þær grunsemdir að ótrúlega margir telji sig bara veika af „flensu“ eða „kvefi“