Nei, Sjálfstæðisflokkurinn fer ekki í ríkisstjórn með VG

Nú tæpa nokkrir sérsinna Sjálfstæðismenn á því að flokkurinn og Vinstri grænir þurfi að mynda stjórn saman. Að mínu viti, sem að vísu er ekki til skiptanna, tel ég að það sé hið mesta óráð. 

Alltof mikið ber á milli þessara tveggja flokka í grundvallaratriðum til að þeir geti unnið saman þar að auki er fæstum þeirra treystandi fyrir stjórn landsins. Vinstri grænir munu leggjast í áróður fyrir auknum ríkisútgjöldum og þá verður erfitt fyrir Sjálfstæðisflokkinn að gæta aðhalds.

Þar fyrir utan er staðan í þjóðarbúinu góð. Ugglaust hefði verið meiri þörf á að þessir tveir flokkar hefðu myndað ríkisstjórn eftir hrunið eða tekið saman þátt í þjóðstjórn. Það var ekki gert af ástæðum sem allir vita.

Elliði Vignisson, bæjarstjóri í Vestmannaeyjum, segir á vefsíðu sinni:

Staðreyndin er sú að við sem þjóð stöndum núna frammi fyrir sögulegum tækifærum til að leiða í jörð deilur og illindi sem klofið hafa þjóðina og valdið miklum skaða. Við getum skapað ríkisstjórn sem hefur nægilega breiða skírskotun til að leiða til lykta deilu um Evrópusambandið, uppbyggingu velferðarkerfisins, virkjanir, gjaldtöku á ferðamálastöðum og fl. Sterk stjórn getur skapað sátt um sjávarútvegsmál, landbúnaðarmál, byggðamál og svo margt annað. Auðvitað þurfa þá báðir aðilar að gefa eftir, en þannig gerast góðir hlutir.

Ég óska þess að jólasveinninn gefi mér tölvu og prentara í jólagjöf. Ekki verða allar óskir uppfylltar og sumar eru beinlínis skaðlegar.

Ríkisstjórnarsamstarf við Vinstri græna mun aldrei bæta þann skaða sem sá flokkur og forverar hans hafa valdið landi og þjóð og það verður seint fyrirgefið. Eigum við að telja upp nokkur atriði:

1. Landsdómsmálið gegn Geir H. Haarde fyrrum forsætisráðherra kostaði ríkissjóð 187 milljónir króna.
2. Lygaflaumur og rógur VG um Davíð Oddson, fyrrum forsætisráðherra
3. Icesave I
4. Icesave II
5. Icesave III
6. Móti þjóðaratkvæðagreiðslu um aðild að ESB árið 2009
7. Samþykkti aðildarumsókn að ESB árið 2009
8. Kostnaður vegna ESB umsóknarinnar er talin hafa verið 3 milljarðar króna
9. Árnapálslögin (nr. 151/2010) til varnar fjármagnseigendum og gegn skuldurum
10. Lagðist ekki gegn loftárásum NATO á Líbýu
11. Samþykkti leyfi til olíuvinnslu á Drekasvæðinu
12. Veitti stóriðju á Bakka við Húsavík undanþágu frá skattalögum
13. Veitti ríkisábyrgð á Vaðlaheiðagöngum
14. Hefndardómsmál í Landsdómi gegn Geir H. Haarde, fyrrum forsætisráðherra
15. Hleypti Alþjóðagjaldeyrissjóðnum inn á gafl í stjórnarráði Íslands
16. Skattahækkanir á almenning í kjölfar hrunsins
17. Gerði ekkert vegna skuldastöðu heimilanna í kjölfar hrunsins
18. Ófrægingarherferðin gegn Ríkisendurskoðun vegna kaupa á bókhaldskerfi fyrir ríkið
19. Íslandsbanki gefinn kröfuhöfum
20. Arionbanki gefinn kröfuhöfum
21. Norðmaður ráðinn í embætti Seðlabankastjóra
22. Sparisjóður Keflavíkur, fall hans og endurreisn kostaði almenning 25 milljarða krónur.

Án efa má finna fleiri ávirðingar á Vinstri græna, hef birt þennan lista áður og þessi atriði eru víti til varnaðar.

Við Sjálfstæðismenn þurfum að muna að Vinstri grænir eru aungvir vinir þrátt fyrir brosmilda ásjónu núverandi formanns. Að baki stendur liðið með hamra og sigðar, tilbúnir til að láta til skarar skríða þegar réttar aðstæður skapast.

 

Enginn einn flokkur fær umboðið

Athugasemdir

[Jón Steinar Ragnarsson, 25.11.2016 kl. 13:06]

Held það væri réttast að setja á bráðabirgðarstjörn til vors og kjósa svo aftur. Tel nokkuð víst að þá skapist skírari línur en nú. Skattahækkunarstefna VG er nú almannarómur og Píratar hafa sýnt að þeir eru einskis virði og njóta einskis trausts, hvorki til hægri né vinstri.

Þessi uppþot yfir engu og stjórnarslit yfir engu hafa kostað okkur nóg. Þetta var valdaránstilraun sem misheppnaðist. Valdarán skipulagt og fjármagnað af þrýstihópum með óljósan bakgrunn. Mér þeææt gaman ef það væri rannsakað hverjir stóðu að baki þessum hópum.