Dónaskapur Svandísar Svavarsdóttur gagnvart þjóðinni

Útilokað er að halda því fram að Svandís Svavarsdóttir, fyrrum ráðherra Vinstri grænna og alþingismaður sé hugsjónamaður. Hún seldi skoðun sína á ESB og fékk í staðinn ráðherrasæti í ríkisstjórn Jóhönnu og Steingríms.

Um þessar mundir er hún afar hávær í gagnrýni sinni á ríkisstjórn Framsóknar og Sjálfstæðisflokksins og telur sig vita manna best um vilja þjóðarinnar.

„Maður er nátt­úru­lega hissa, svo ekki sé fast­ar að orði kveðið, að ekki sé hægt að setja ein­fald­lega niður þenn­an dag og ég skil það ekki að það sé búið að halda tvo fundi í stjórn­ar­ráðinu með stjórn­ar­and­stöðunni og afrakst­ur­inn skuli enn vera sá að það sé ennþá loðið og lævi blandið hvenær verður kosið,“ sagði Svandís. „Mér finnst þetta dóna­legt gagn­vart þjóðinni,“ bætti hún svo við.

Þetta segir Svandís í sjónvarpsþætt í morgun samkvæmt endursögn mbl.is. Hún tilheyrir drjúgum minnihluta á Alþingi en talar eins og hennar sé valdið, mátturinn og dýrðin. Þetta er konan sem seldi stefnu síns flokks fyrir sæti í ríkisstjórn. Og ekki nóg með það.

Það var hún sem sýndi þjóðinni í tvígang þann dónaskap að segja ekki af sér þegar búið var að fella Icesave samningana undan henni og ríkisstjórninni sem hún sat naglföst í.

Hún og félagar hennar einkavæddu bankanna á ríkisstjórnartíma sínum á þann hátt að kröfuhafar þeirra fengu þá gefins. Og til þess að sykra nú dálítið gjöfina fengu þeir afslátt af íbúðaskuldum heimilanna í landinu svo bankarnir gætu hagnast enn betur á gjöfinni.

Þessari konu ferst að skálda upp dónaskap á núverandi þingmeirihluta. Hið eina sem Svandís gæti í raun og veru gagnrýnt meirihlutann fyrir er að stytta yfirstandandi kjörtímabil og kjósa í haust í stað þess að kjósa eftir eitt ár. Það er eina ávirðingin sem hún hefur en notar ekki.

Svandís er ekki þjóðin en hún þykist vera það.

 

Dónaskapur gagnvart þjóðinni

Athugasemdir

[Kristján Jón Sveinbjörnsson, 24.4.2016 kl. 16:08]

Það er vert að rifja upp hvernig hlutirnir voru hjá kellu:

Svandís Svavarsdóttir umhverfisráðherra hefur ítrekað komið í veg fyrir atvinnuuppbyggingu með ólögmætum tafaleikjum til að hamla gegn nýtingu orkuauðlinda og uppbyggingu iðnaðar á Íslandi. Framganga hennar hamlar gegn hagvexti og er þjóðfélaginu dýr. Svandís hefur misbeitt valdi sínu til að koma í veg fyrir atvinnuuppbyggingu og hún hefur gengið út á ystu nöf til að tefja fyrir mikilvægri uppbyggingu í iðnaði á tímum þegar við þurfum mest á því að halda. Þannig mun enn dragast að hagvöxtur náist aftur á Íslandi með batnandi hag almennings, minna atvinnuleysi og betri möguleikum til að verja velferðarkerfið.
Þegar hún horfist í augu við annan áfellisdóminn í röð – nú frá Hæstarétti, sem staðfestir sektardóm undirréttar yfir henni – þá leyfir hún sér að segja: Hér er um „túlkunarágreining“ að ræða. Það virðist vera allt og sumt! Og bætir svo við: Allt sem ég geri er pólitík. Hún má hafa sína pólitík í friði, en hún getur ekki haft lög landsins og dómstóla í friði fyrir sig. Ráðherra er embættismaður og ber sem slíkum að virða lög landsins, óháð stjórnmálaskoðunum sínum. Sem alþingismaður getur Svandís Svavarsdóttir unnið skoðunum sínum brautargengi á alþingi með lagabreytingum eða þingsályktunartillögum, en henni er ekki heimilt að brjóta lög í þágu skoðana sinna. Ekki frekar en öðrum landsmönnum. Eða eru hugsjónir og viðhorf stjórnmálamanna hafin yfir lög og æðsta dómstól þjóðarinnar, Hæstarétt? Ef svo er, þá ber nýrra við.

http://www.mbl.is/greinasafn/grein/1367778/

[Jóhann Kristinsson, 24.4.2016 kl. 16:15]

Ekki gleyma að Svandís Svavarsdóttir var dæmd í Hæstarétti Íslands fyrir afglöp í starfi sem ráðherra.

Ekki sagði Svandís af sér ráðherraembættinu og það sem furðar mig ennþá meir, hún bauð sig fram til endurkjörs og náði kjöri. Ef þetta er ekki dónaskapur við þjóðina, þá veit ég ekki hvað er dónaskapur.

Kveðja frá Las Vegas

[Helga Kristjánsdóttir, 25.4.2016 kl. 00:54]

Við gerum út ríkisútvarp; ekki minnist ég þess að fréttir um brot Svandísar og annara vinstri manna þyki fréttnæmar þar á bæ. Kastljósið ætti að beinast að þeim,fá þá í settið án fyrirsátar og skylda fréttamenn(samkv. hlutleysisreglum)að krefja þá svara.   
 

[Hrólfur Þ Hraundal, 25.4.2016 kl. 06:45]

Rétt hjá þér Helga Kristjánsdóttir, hið svonefnda RUV sem áður var Ríkisútvarp okkar allra landsmanna er það ekki lengur.  Þökk sé ólíðræðissinnum en skömm okkar lýðræðissinna.

Það er ómetanlegt fyrir andstæðinga þjóðar að hafa öflugasta fjölmiðilinn á bakviðsig.