Er sameining stofnana fyrir Excel eða þjóðina?

Er ekki ágætt að hafa það í huga að Landspítalinn, Borgarspítalinn og Landakotsspítali urðu að Landspítala-Háskólasjúkrahúsi árið 2000. Þar með höfðu flest sjúkrahús í Reykjavík verið sameinuð. Sex árum síðar voru St.Jósefsspítali og Sólvangur sameinaðir í eitt og áru síðar sett undir Landsspítalann en raunar lokað.

Síðan hefur engin samkeppni ríkt á milli sjúkrahúsa vegna þess að sérfræðingar á borð við Jón Torfa Jónasson prófessor við HÍ, fundu það út að Excelskjal var miklu áhrifaríkara til sparnaðaraðgerða en tilveran sjálf. Svo ekki sé talað um fólkið sem vann í þessum gömlu sjúkrahúsum eða þá sjúklinga sem nutu umönnunar.

Nú er sjálfur Landspítalinn, margsameinaður, á heljarþröm fjárhagslega. Excel vann en almenningur tapaði.

Jón Torfi Jónasson stendur upp og vill sameina Háskóla Íslands og Háskólann í Reykjavík. Eflaust er hægt að fá Excel til að samþykkja að fjárhagslega hagkvæmara sé að reka einn skóla en tvo, við það sparast fjöldinn allur af embættum og stöðum. Hins vegar má ekki gleyma almenningi, fólkinu sem nýtir þjónustuna, námsmönnum og starfsmönnum. Ekkert bendir til að reksturinn verði á allar hliðar betri eftir sameiningu, þvert á móti benda líkur til þess að sameinaður háskóli muni stefna í sömu átt og sameinaður Landspítali, það er í tómt fjárhagslegt tjón, tap á starfsfólki og hæfileikaskorti.

Staðreyndin er einfaldlega sú að samkeppni getur ein verið sú hvatning sem þarf til að fólk geri betur. Rekstur á borð við ráðstjórn og einokun mun aldrei geta gagnast rétt eins og dæmin sanna, ekki síst hér á landi. Höldum háskólunum eins og þeir eru, reynum ekki sameiningar. Hitt er svo annað mál að gera má kröfur um aðhald í rekstri en um leið hvetja til akademískrar útrásar háskóla. Er það ekki veglegra markmið?

Excel er frábært forrit, eitt að þeim sem ég nota mest. Það hefur hins vegar engan skilning frekar en önnur. Furðulegast er þó að þeir sem nota Excel skuli verða eins og forritið, týna sjálfum sér.

Styrkur að sameina HÍ og HR

Athugasemdir

[Anna Sigríður Guðmundsdóttir, 12.10.2013 kl. 16:20]

Athygliverð grein eftir Benedikt Ó Sveinsson lækni, á bls. 20 í Fréttablaðinu, laugardaginn 14, september 2013.

Þar rekur hann þetta undarlega sameiningar-ferli spítalanna á mjög skýran og sannan hátt, og samkeppni-skorts-vandann sem fylgdi og fylgir enn, þeirri sameiningar-stefnu.

Ég hvet fólk til að finna þessa grein á netinu, og velta fyrir sér, á sjálfsábyrgan hátt, þróuninni og afleiðingunum af of mikilli og ábyrgðarlausri sameiningu á sumum sviðum samfélagsins.

M.b.kv.