Flestir þegja um örlög Gálgahrauns

Morgunblaðið á hrós skilið fyrir að fjalla dag eftir dag um Gálgahraun sem komið er á eyðingarlista Vegagerðarinnar og Garðabæjar. Mogginn á þakkir skyldar fyrir framtakið.

Flestir hinna sjálfskipuðu náttúruverndarsinna þegja nú þunnu hljóði um vegagerð yfir hraunið sem mun fara nálægt því að eyðileggja það. Hún er líklega of nálægt til að vekja athygli og eflaust halda náttúruminjar á höfuðborgarsvæðinu séu frekar ómerkilegar.

Auðvitað mun Vegagerðin og Garðabær fá sínu framgengt. Á hvorugum staðnum er nokkur skilningur fyrir gildi náttúruverndar. Á móti er gripið til fjárhagslegra raka. Alltof dýrt er að leggja veg í stokk. 

Svona rök hefur maður heyrt víða. Rarik og Orkuveitunni finnst alltof dýrt er að leggja rafstrengi í jörðu. Orkuveitunni fannst ekki svara kostnaði að ganga vel um Kolviðarhól og Hellisheiði og þess vegna er ástandið þar eins og á æfingasvæði Alkaída. 

Mér finnst eiginlega nóg komið. Ég er nú bara ósköp einfaldur Sjálfstæðismaður, einn af þessum í grasrótinni. Mér gremst svona framkoma en ég veit að fjölmargir aðrir eru sömu skoðunar og ég. Við þurfum hins vegar að hafa hugrekki til að standa upp og hvetja stjórnvöld til að breyta um stefnu. annars er ekki ólíklegt grasrótin rísi þá upp og taki völdin.

Athugasemdir

[Ómar Ragnarsson, 28.9.2012 kl. 20:29]

Ég hef ítrekað fjallað um þau stórkostlegu náttúruspjöll sem nú ganga yfir í næsta nágrenni höfuðborgarsvæðisins og inni á því. Raunar byrjaði ég að sýna þau 1985 í Stikluþáttum. Ítrekað hef ég í áratugi til dæmis fjallað um malarnámur, ofbeit, spjöll af völdum bíla og vélhjóla og  hvernig farið er með Kaldá, eitt merkasta náttúruundur svæðisins að ekki sé talað um svæðið við Trölladyngju, þar sem gersamlega að óþörfu hefur verið valdið stórfelldum spjöllum. Samtök áhugafólks um náttúruvernd í landnámi Ingólfs hefur lengi reynt að opna augu fólks fyrir ástandi svæðisins og nýstofnuð Náttúruverndarsamtök Suðvesturlands hafa reynt hvað þau geta. Það er hins vegar til marks um sýn fjölmiðla á þessi mál, að þegar Reynir Ingibergsson gaf út ljósmyndabók um gönguleiðir á Reykjanesskaga sagði Morgunblaðið frá bókinni með því að birta mynd af Bláa lóninu með texta um það hve það lón væri fallegt!  

[S i g u r ð u r S i g u r ð a r s o n, 28.9.2012 kl. 20:55]

Sæll Ómar. Þú hefur vissulega verið óþreytandi í því að benda á skaða sem náttúra höfuðborgarsvæðisins hefur orðið fyrir. Orðum mínum í pistlinum er alls ekki beint gegn þér.

Hins vegar finnst mér fáir hafa komið að því að verja Gálgahraun, um það fjallaði pistillinn öðru fremur. Umræðan ætti að beinast að þeim framkvæmdum sem þar eru fyrirhugaðar.

Hvað varðar gamlan kunningja, Reyni Ingibergsson, mikinn fróðleiksbrunn og dugnaðarfork í umhverfismálum, þá rekur mig ekki minni til óheppilegrar myndbirtingar með fréttinni um útgáfu bókar hans sem ég þó vissulega tók eftir.

Þó ég hafi leyft mér að hæla Morgunblaðinu finnst mér óþarfi af þér, Ómar, að hnýta í blaðið vegna einfaldrar myndbirtingar með ljósmyndabók. Ég get ekki séð að í því felist einhver skilaboð þó útlitshönnuði eða blaðamanni verði það á að velja óviðeigandi mynd.

Í sumar kom út bókin mín um gönguleiðina yfir Fimmvörðuháls. Mogginn sagði ákaflega fallega frá útgáfu hennar og blaðamaður spurði mig hvaða mynd ég mælti með að fylgdi fréttinni. Fyrir þessar móttökur Moggans stend ég í mikill þakkarskuld fyrir enda hef ég ekkert fé að tök á að standa í neinni kynningarstarfsemi.

[S i g u r ð u r S i g u r ð a r s o n, 28.9.2012 kl. 20:57]

Gaf Reynir ekki bara út eina bók, sem var um gönguleiðir á Reykjanesi? Rekur ekki minni til þess að hann hafi gefið út ljósmyndabók. Það gæti þó hafa farið framhjá mér.