Aurastefna hinnar norrænu velferðarstjórnar

Mikið óskaplega er ríkisstjórninni mislagðar hendur. Flestum ætti að vera það í fersku minni er hún reyndi að leggja því sem næst niður heilsugæslu víðast á landsbyggðinni. Mikil mótmæli urðu af þessum ákvörðunum og hún neyddist til að bakka með allt saman. Í stað þess að stórskaða heilsugæslu og byggðir lætur hún sér nú nægja að skaða þær með niðurskurði sínum.

Ráðherrann var með eindæmum klaufskur er hann hélt því fram að landsbyggðarfólk ætti að keyra til Akureyrar eða Reykjavíkur til að fá sér læknishjálp. Þá náði almenningur að brosa í gengnum tárin er ráðherrann komst ekki vegna ófærðar á fund á Blönduósi til að skýra mál sitt. Orð reyndust í því tilviki óþörf enda kallinn heimaskítsmát eins og það heitir.

Og nú ætlar ríkisstjórnin að loka höfuðborgarsvæðinu fyrir landsbyggðinni nema gegn gjaldi. Við sem búum utan við þetta háhelga svæði höfum dottið í hug að leggja okkar eigin skatt á umferð út á land, ekki á almenning heldur ríkisstjórnina og fylgismenn hennar.

Við höfum ekkert með þessa kújóna að gera, þeir eru aðeins til vandræða.  Þeir eru best geymdir í 101 Reykjavík sem og aðrir þeir sem hlynntir eru því að njósna um ferðir almennings með því að setja gps eftirlitstæki í bifreiðar. Nóg illt hafa þeir gert með því að hækka verð á bílum, rétt eins og fjórhjóladrifið sé munaðarvara. Og olíu og bensín hafa þeir hækkað svo um munar.

Við eigum sem sagt að lifa og deyja á landsbyggðinni nema við reiðum fram peninga fyrir eldsneyti, þokkalegum bílum og komumst í gegnum innheimtuhlið peningavalds hinnar norrænu velferðarstjórnar. Hið síðasta er að vísu aðeins í nösunum á meirihlutanum. Er ekki kominn tími á að snýta þeim?

Og svo þykist Ögmundur ekkert hafa gert og ekkert vita. Hann ætti þó manna best að vita að íslenskt samfélag er ekki stærra en svo að stjórnarráðið lekur og hefur alltaf gert það. 

„Engar ákvarðanir verið teknar um veggjöld“

Var fuglalífi á Íslandi útrýmt um áramótin?

Ekki er það nú sennileg skýring að fuglar hafi drepist úr hræðslu vegna nokkurra flugelda í Arkansas í Bandaríkjunum. Sé þetta rétt skýring ættu fuglar Íslands og raunar alls Norður-Atlantshafsins að hafa dáið út um síðustu áramót eða smám saman síðan skoteldar urðu vinsælir hér á landi.

Ég man ekki til þess að hafa heyrt um að sálarangist fugla á gamlárskvöld. Veit þó til að hross hafi fælst og kýr misst nyt. 

Ég sver það, að ég sá fugl í Reykjavík á laugardaginn. Hann var að vísu skrýtinn, gæti hafa verið undanvillingur úr Vinstri grænum. Miklu líklegra er þó að þetta hafi verið starri eða þröstur.

Finnst nú að blaðamaður mbl.is hefði nú getað spurt einhvern fuglafræðinginn um sálarlíf fugla svona almennt og með tilliti til skotelda. 

Fuglar drápust líklega úr hræðslu

Gjaldþrotalög gagnast ekki vegna vanskilakskráa

LÖG um að skuldir fyrnist tveimur árum eftir gjaldþrot er svo sem góðra gjalda verð. Í það vantar þó tvö mikilvæg atriði, án þeirra ná lögin ekki tilgangi sínum.

• Með gjaldþroti fer viðkomandi á vanskilaskrá sem í raun hefur miklu alvarlegri afleiðingar fyrir fólk en sjálft gjaldþrotið. Svo lengi sem það er á slíkri skrá er lífið afar erfitt og nær ómögulegt að taka lán og byrja upp á nýtt þó borðið eigi að heita nýtt. Allt verður að vera staðgreitt og jafnvel kreditkort fæst ekki útgefið þeim sem í gjaldþroti hafa lent.
• Fílsminni bankanna er stórkostlegt vandamál. Þeir hafa komið sér upp afar þróuðum hugbúnaði og í þeim er að finna þeirra eigin vanskilaskrá. Hafi banki, hvaða nafni sem hann nefnist, hversu oft hann hefur orðið gjaldþrota, hvort sem tilvera hans hófst fyrir eða eftir hrun, á þessari eða síðusu öld, þá man hann allt. Bankarnir samþykkja aldrei aftur þann sem eitt sinn hefur farið í gjaldþrot. Viðkomandi er sí og æ snýtt upp úr þessari lífsreynslu sem fólki verður um alla framtíð meinað að gleyma.

Til að lög um tveggja ára fyrningu skulda þurfi að ná árangri verður að jafnframt að þurrka út skráningu á vanskilaskrá og krefjast þess að bankarnir láti af mannvonsku sinni og ruddamennsku.

Breyting á gjaldþrotalögum tekur gildi

Krossferðariddarar ná sjaldnast neinum árangri

Þegar ekkert er að frétta úr stjórnmálunum og beðið er eftir uppgjörsfundi VG skemmta meðalmennin sér við að hártogast um orð sem utanríkisráðherra viðhafði um samþingmann úr öðrum flokki. Þetta er svo skrýtið að það minnir á einhvers konar Kremlarlógíu en það voru pælingar um meiningar sovéskra valdhafa. Þeir höfðu það fyrir reglu að tala aldrei hreint út. Hins vegar skipta orð litlu máli, það eru efndirnar sem eru aðalatriðið. Þessu gleyma svo margir, ekki síst margmálir stjórnmálmenn.

Staðreyndin er einfaldlega sú að Lilja Móses (þannig nefnir forsætisráðherra hana alltaf, líklega í niðurlægingarskyni) er hætt í VG. Hún er klár stelpa, hefur ákveðnar skoðanir, en rekst ekki flokki, hún er „lóner“ eins og það er nefnt. Slíkir eru óábyggilegir og erfiðir fyrir hvaða flokk sem er vegna þess að starf flokka byggjast á samkomulagi og samvinnu. Á móti kemur að Lilja hefur eldmóð og er stefnuföst, telur að stefna ríkisstjórnarinnar gagnist ekki almenningi. Þetta ber að virða.

Ásmundur Daði er á svipaðir skoðun en hann skortir hugrekki til að ganga sömu leið og Lilja, er líklega hræddur við umtalsilla samflokksmenn. Atli lögmaður mun ekki heldur yfirgefa VG vegna þess að hann er einfaldlega of linur og sérgóður. Báðir munu frekar láta flokkinn niðurlægja sig, þeir verða sviptir embættum og skammaðir á lokuðum þingflokksfundi. Þeir munu svo halda sér til hlés framvegis, sneyptir eins og sovéskur stjórnmálamaður sem slapp við gúlagið.

Niðurstaðan verður sú að Lilja Móses (þannig nefnir forsætisráðherra hana alltaf, líklega í niðurlægingarskyni) verður utanflokka til að byrja með en hættir svo á þingi með vorinu vegna þess að þegar allt kemur til alls hefur hún hvorki kjark eða dugnað til að vinna ein auk þess sem sú vinna mun engu skila fyrir almenning.

Þannig fer fyrir krossferðariddurum allra flokka, þeir geta ekki unnið innan þeirra og þeir ná engum árangri utan þeirra. Niðurstaðan er einfaldlega sú að samvinna og samkomulag er besta leiðin til að ná fram einhverjum bótum fyrir almenning.

Telur að Lilja eigi að sýna Össuri skilning