Neysla kæstrar skötu veldur verðbólgu, jarðskjálftum og getuleysi

Síðustu daga hef ég sem endranær ekið framhjá fiskbúð nokkurri og af fnyknum sem frá henni leggur er víst að verið er að selja Þorláksmessuskötu, dauðkæsta og baneitraða. Jafnvel bíllinn minn tók að hiksta þegar ég ók framhjá fiskbúðinni og má það beinlínis rekja til lyktarinnar enda ljóst að fátt er verra fyrir bílvél en andrúmsloft mengað skötufnyk.

Ótrúlegt er til þess að hugsa að nokkur maður skuli vilja slafra í sig skemmda skötu og telja sér um leið trú um að hún sé holl og bragðgóð. Dæmin eru mörg. Ég þekki fólk sem reynir svo mikið að falla inn í umhverfi sitt að það segir þvert gegn hug sér að skemmda skatan sé góð. Þetta fólk byrjaði á sömu forsendu að reykja. Svo þegar reykingar féllu úr tísku hætti það að reykja af samfélagsástæðum.

 

Ég á systur sem var alin upp í guðsótta og góðum siðum, rétt eins og ég, en tók upp á því að byrja að anda að sér tóbaksreyk. Það tók nokkra áratugi að venja hana af reykingum. Þá tók hún upp skötuát á Þorláksmessu. Við svo búið mátti ekki standa og var skömmu síðar send til Suður-Afríku. Þar hafa innfæddir séð svo um að hún borðar ekki skötu enda blómstrar stúlkan sem aldrei fyrr og yngist með hverju árinu sem líður og nálgast brátt það útlit sem hún hafði um fermingu.

 

Út af fyrir sig er ekkert við það að athuga þó frjálsir landsmenn skófli í sig skötu, svo framarlega sem það er gjört án þvingana af nokkru tagi. Hitt er verra og það er hversu náttúran skaðast af vinnslu og áti skötu. Alþjóðlegar rannsóknir hafa sannað að fátt eyðir ósónlaginu en skötuát enda fylgir því afar mikil þarmagasframleiðsla og losun þess sem er gríðarlega hættuleg.

 

Ég hef það fyrir satt að jarðvísindamenn hafi fundið sönnun fyrir því að skötuát á Þorláksmessu auki hættuna á auknu kvikustreymi frá iðrum jarðar með tilheyrandi jarðskjálftum og jafnvel eldgosum. Mér skilst að Jarðfræðistofnun Háskóla Íslands hafi þegar afhent forsætisráðherra illþefjandi skýrslu um málið.

 

Líffræðingar hafa fundið mjög mikil líkindi með getuleysi karlmanna og neyslu þeirra á skötu. Þetta verður gert opinbert á vegum Íslenskrar erfðagreiningar eftir áramótin.

 

Raunar mælast áhrif skötuneyslunnar á efnahag þjóðarinnar. Á vegum Seðlabankans hafa rannsóknir sýnt að verðbólga vex í réttu hlutfalli við sölu á skötu.  

 

Af þessu má sjá að skötuneysla er stórhættuleg fyrir þjóðina, ríkið, náttúru lands og ... manna og ekki síður sjálfan alheiminn. Mál er komið að hætta þessari vitleysu, hreinlega banna skötuneyslu og bjarga þannig heiminum. Tökum nú höndum saman og hættum þessari ómenningu.

 

 

Athugasemdir

[Sigurður Bjarklind (IP-tala skráð) 17.12.2018 kl. 16:19]

Já, þetta grunaði mig alltaf. Gleymum svo ekki hákarli, signum fiski og hamsatólg og öðrum náttúrulega rotvörðum matvælum. Allt saman stórhættulegt. Sleppa Svíar með surströming?

[S i g u r ð u r S i g u r ð a r s o n, 17.12.2018 kl. 16:42]

Nei, nafni. Svíar eru sko flokkaðir með Skotum og Íslendingum. Í kjallaranum í neðsta víti er sérstök geymsla fyrir illþefjandi sálir syndara sem hafa mengað anda sinn með neyslu skemmdra matvæla. Jafvel sá sem þar ræður ríkjum finnst nóg um.

[Erla Magna Alexandersdóttir, 17.12.2018 kl. 20:39]

 sammála síðasta ræðumanni !

[Halldór Egill Guðnason, 17.12.2018 kl. 23:45]

 Skötufnykurinn er svo rosalegur þessa dagana, að engu tali tekur. Hvaða handbók gæti hugsanlega upplýst mann um það, hvernig útskýra beri gasfnykinn fyrir útlendingi, þá hann gengi inn á matsölustað, með skötu á matseðlinum? "Do not worry, you aint seen nothing yet"? 

 Það þarf ekki brotthvarf WOW til að fækka ferðamönnum, svo mikið er víst, meðan skatan kraumar;-)

 Góðar stundir, með jólakveðju að sunnan.