Tilboð sem ekki er hægt að hafna

Þessi „lögregluskattur“ er einstaklega furðulegur og ekki lítill fjárhagslegur baggi á Frönskum dögum. Svo virðist sem að lítið samræmi sé á milli lögregluembætta um hvort og þá hversu mikið gjald þarf að reiða fram þegar bæjarhátíð er haldin og vel þess virði að skoða hvort að þar njóti allir sammælis í þessum efnum. Til dæmis grunar mig að höfuðborginni berist varla himinhár reikningur frá lögreglunni fyrir hverja Menningarnótt.

Þetta segir Hafþór Eide Hafþórsson hjá franska safninu á Fáskrúðsfirði í viðtali í Morgunblaðinu en framundan eru franskir dagar þar í bæ. Vandinn við hátíðina og raunar margar bæjarhátíðir er krafa lögreglunnar um löggæslu.

Ekki hef ég mikla reynslu af  vinnubrögðum mafíunnar nema úr bókum og bíómyndum. Þar hef ég þá þekkingu að mafían gefur fyrirtækjum og einstaklingum kost á „verndargjaldi“. Um er að ræða tilboð sem ekki er hægt að hafna vegna þess að þá er illt í efni fyrir viðkomandi.

Þetta minnir mann óneitanlega á kröfu löggunnar sem býður hátíðarhöldurum upp á að greiða fyrir löggæslu. Sé tillagan ekki samþykkt verður engin hátíð, leyfi til að halda hana fæst einfaldlega ekki. Hér er dálítið sterkt tekið til orða en hitt verður að segja mörgum lögregluyfirvöldum til varnar að sum hver hafa allt aðra á þessu heldur en ráðuneyti innanríkismála í Reykjavík.

Þannig hefur lögreglan átt drjúgan þátt í því að bæjarhátíðir hafa breyst og sumar hverjar lagst af. Þetta þekki ég eftir að hafa komið að nokkrum bæjarhátíðum. Sú stærsta sem haldin er á landinu er viðkomandi sveitarfélagi algjörlega að kostnaðarlausu og er þá átt við menningarnótt í Reykjavík. 

Athugasemdir

[Kolbrún Hilmars, 18.7.2013 kl. 18:13]

Alls ekki nýtilkomið fyrirkomulag. 

Fyrir tæpum 40 árum vorum við skólasystur, um 30 talsins, að minnast útskriftarafmælis og leigðum okkur sal hjá stjórnmálaflokki sem leigði hann út fyrir prívatsamkvæmi til þess að nýta húsnæðið.  Konan sem sá um reksturinn útvegaði okkur matinn, en við þurftum sjálfar að fá vínveitingaleyfið hjá sýslumanni.  

Sem fékkst með þeirri kvöð að kaupa eitt stykki lögregluþjón með!  Segi ekki meir...

[Eyjólfur G Svavarsson, 19.7.2013 kl. 09:23]

Þetta er bara eins og það hefur alltaf verið.Landsbyggðin hefur alltaf þurft að halda öllu uppi, á meðan "Bjarnfreðarsynir"(  Ekki bara í hans tíð) Sleppa vel.