Löglegt en siðlaust að gefa hlut í bankanum

Landsbankinn er að stærstum hluta í eigu ríkisins eða 98% og rest á bankinn sjálfur. Nú ætlar eigandinn að gefa starfsmönnum bankans 1% af hlutafé hans og enginn hreyfir mótmælum.

Hvers á þjóðin að gjalda að eign hennar er gefinn örfáum? Hvað með Orkuveitu Reykjavíkur, Landsvirkjun, Rafmagnsveitur ríkisins og önnur fyrirtæki sem ríkið á. Er ætlunin að gefa starfsmönnum hluta þeirra?

Ég þyrfti eflaust að senda fjármálaráðherra bréf og mótmæla þessari gjafmildi hans sem handhafa eignarhluta ríkisins. Jafnframt ætti ég að krefjast míns hlutar fyrst verið er á annað borð að gefa ríkiseigur.

Líklega er þetta löglegur gerningur en, svei mér þá, gjörsamlega siðlaus. 

Starfsmenn bankans eignast um 1%

Athugasemdir

[Jón Þórhallsson, 18.7.2013 kl. 09:20]

Er það ekki Bjarni Ben Sjálfstæðismaður/fjármálaráðherra sem fer með æðsta vald á þessum vettvangi fyrir hönd ríkisins?

Hvað er til ráða; að kjósa annan flokk í næstu kosningum?

[Jónatan Karlsson, 18.7.2013 kl. 13:45]

Ég er þér algjörlega sammála Sigurður. Auðvitað á ríkisstofnun ekkert með að gefa völdum gæðingum og starfsmðnnum ríkiseignir. Þetta var svipað og þegar Orkuveitan og Rey ævintýrið ætluðu að hygla vinum og vandamönnum hér um árið og voru það ekki líka ákveðnir þingmenn úr flestum flokkum sem högnuðust um tugi milljóna á sölu hlutabréfa í SPRON, áður en lýðnum varð ljóst rýrt raungildi bréfanna, auk þokukenndra útskýringanna á tilurð eignarhaldsins.

Nú sitja margir svangir við katlana sem þeir Sigmundur og Bjarni hræra í svo ærin ástæða er til að halda vöku sinni.