Upptökin við Draumadalagil

Samkvæmt upplýsingum af vedur.is eru upptök skjálftans í Bláfjöllum, á sjálfum Bláfjallahryggnum, örskammt frá þar sem heitir Draumadalagil. Það er aðeins norðan við skíðasvæði Fram í Eldborgargili.

Meðfylgjandi mynd er af skíðasvæðinu en nær ekki nógu langt til vinstri til að Draumadalagilið sé þar með.

Ekki veit ég hvaðan örnefnið Draumadalagil er komið. Hins vegar hef ég farið bæði upp og niður gilið að vetrarlagi og þá á skíðum. Síst af öllu finnst mér svæðið vera neinn draumur. Þarna er mikil hætta á snjóflóðum að vetrarlagi. Raunar minnir mig að þar hafi orðið banaslys fyrir allmörgum árum er skíðamaður lenti þar í snjóflóði.

Jarðskjálfti upp á 4,6 stig

Athugasemdir

[Guðmundur Ásgeirsson, 30.8.2012 kl. 21:03]

Er einhver staður á landinu þar sem þú hefur ekki stigið niður fæti? :)

Spyr ég grínandi, því þú hefur augljóslega komið víða og hefur greinilega jafn mikið yndi af landinu og ég hef sjálfur.

Takk fyrir fróðleiksmolana.

[S i g u r ð u r S i g u r ð a r s o n, 30.8.2012 kl. 21:18]

Það er langt í frá að ég hafi farið um allt landið, Guðmundur. Hins vegar var ég alveg gáttaður að hafa ekki handbæra mynd af þessu gili, svo oft sem ég hef farið þarna um eða framhjá, ofan á hryggnum eða fyrir neðan.

Óli Þór er hefur til dæmis áreiðanlega farið víðar um landið en ég.

[Emil Hannes Valgeirsson, 30.8.2012 kl. 22:36]

Slysið var örlagaárið 1995, sama ár og Vestfjarðaflóðin féllu.