Kemur sjöundi flöturinn upp á tengingnum?

Ekki vekur þessi frétt mikla athygli. Hún er þó án efa ein sú merkilegasta í dag. Umboðsmaður Alþingis óskar eftir því að fá að vita á hvaða lagagrundvelli Seðlabanki og Fjármálaeftirlit telja sér heimilt að beina ákveðnum tilmælum til fjármálafyrirtækja vegna dóms Hæstarétttar um gengistryggingar lána.

Fyrir þá sem ekki vita er Seðlabanki Íslands sjálfstæð stofnun. Sama á við Fjármálaeftirlitið. Hvorug lýtur skipunum ríkisstjórnar eða ráðuneyta um viðfangsefni sín. 

Komi í ljós að lagagrundvöllur þessara „tilmæla“ sé enginn er kominn nýr flötur upp á tengingnum, sá sjöundi, og hann á ekki að vera til. 

Án þess að hér sé verið að gera að því skóna að þessar tvær stofnanir taki þátt í pólitískum leik, þá verður spennandi að sjá hvernig þær svara umboðsmanni.

Í upphafi var ríkisstjórnin á hálum ís í vegferð sinni að reyna að breyta dómi Hæstaréttar í einhverja málamiðlun. Það vakti strax athygli að Seðlabankasstjóri skyldi fyrstur gegna fram fyrir skjaldborg ríkisstjórnar og bera út þau boð að dómurinn væri slæmur. Og svo bættist forstjóri Fjármálaeftirlitsins og loks viðskiptaráðherra í hóp þeirra sem töluðu dóminn niður. Hins vegar hafa forsætisráðherra og fjármálaráherra haft vit á því haldið sér að mestu til hlés þó svo að skoðun þeirra sé öllum ljós.

Við bíðum spennt eftir því hvernig Seðlabankinn og Fjármálaeftirlitið snúa sér úr þessum vanda. Af öllu má þó vera ljóst að á Alþingi er ekki meirihluti fyrir þeim lögum sem nú eru í undirbúningi í fjármálaráðuneytinu, viðskiptaráðuneyti og Seðlabanka um afturvirka ákvæði sem breyta dómi Hæstaréttar og minnka þann rétt sem skuldarar fengu með honum.

Umboðsmaður óskar eftir skýringum

Athugasemdir

[Kolbrún Hilmars, 8.7.2010 kl. 14:22]

Sæll Sigurður. Ég held að þú vanmetir þá athygli sem þessi frétt vekur, þótt ekki endurspeglist í athugasemdum á blogginu. Nú eru flestir bloggarar nefnilega búnir að fá sér notalegt sæti og fylgjast með óviðjafnanlegum fjórleik þeirra afla sem eiga hlut að máli. Allt í boði fjölmiðla.

Dómstólar: Opnugrein fv.hæstaréttardómara í MBL

Ríkisstjórn: Skrif félagsmálaráðherra í Fréttablaðinu

Þolandi: Ofangreind fyrirspurn Umboðsmanns Alþingis

Gerandi: "Sanngirniskrafa" Lýsingar fyrir héraðsdómi

Það mun engum leiðast þótt boltanum sé að ljúka.

[S i g u r ð u r S i g u r ð a r s o n, 8.7.2010 kl. 14:31]

„Það mun engum leiðast þótt boltanum sé að ljúka.“ Frábær athugasemd, Kolbrún. Bestu þakkir.

Þó svo að gömlu nýlenduveldin ráði nú lögum og lofum í boltanum, að Úraguvæ undanskildu, þá held ég að úrslitin í fjórleiknum um fjöregg almennings verði önnur en þau að kerfið fái sínu framgengt. Dómur Hæstaréttar mun standa rétt eins og hæstaréttardómarinn fyrrverandi heldur fram.

[Jón Bragi Sigurðsson, 8.7.2010 kl. 16:14]

Vel mælt Sigurður!

Sammála um að það verður athyglisvert að sjá hvað kemur útúr þessu og hvort að mönnum verður eitthvað ágengt í því að reyna að kveða niður þennan dóm með afturvirkum lögum sem gera úrskurð Hæstaréttar óvirkan. Ef þeim tekst það þá er réttarríkið Ísland virkilega á varasamri braut.

Stjórnmálamennirnir verða í framtíðinni að reyna að vera jafn röskir og Berlusconi sem tekst alltaf að breyta lögunum sér í hag rétt áður en á að fara að ákæra hann og dæma