Skýringarmynd og kort af Eyjafjallajökli

Nýjustu fréttir benda til þess að gosið sé í aðalgíg Eyjafjallajökuls. Ég hef lagað til skýringarkortið og birti það á á ný með þessari færslu.

 

Á kortinu má sjá hina vinsælu gönguleið yfir Eyjafjallajökul sem nefnd er Skerjaleiðin vegna þess að hún liggur meðfram Skerjum. Þau eru leyfa af gossprungu sem einhvern tímann í fyrndinni gaus þarna norðvestan í jöklinum.

 

Rauða stjarnan er sem sagt líklegasti gosstaðurinn.

 

Gula stjarnan er sá staður sem mestu jarðhræringarnar voru síðustu vikur og mánuði og margir héldu að þar myndi gjósa. Þess má geta að enn skelfur nákvæmlega á þessum stað 

 

Loks má sjá stjörnu á fimmvörðuhálsi og hún merki gosstaðinn þar. 

 

Enn birti ég mynd Eyjólfs Magnússonar sem ég tók ófrjálsri hendi af vef Jarðvísindastofnunar og aftur biðst ég velvirðingar á hnuplinu. Inn á myndina hef ég merkt sömu eða svipuð örnefni og stjörnurnar sem ég gat um.

Inn á myndina hef ég merkt helstu staðhætti sem getið er um á kortinu.

Svo skulum við hafa það á hreinu að gríðarstór gígur er efst í Eyjafjallajökli og er hann fullur af ís eða jökli. Skarð er í gígnum og fellur skriðjökull bratt niður úr gígnum og á láglendi. Hann fellur á milli tveggja skolta, Ytri-Skolts og Innri-Skolts. Bratti jökulsins er svo mikill að hann hefur verið nendur Falljökull.

Fyrir neðan hefur Gígjökull rutt upp landinu og síðan hann tók að hörfa hefur myndast lón.

Sé gos hafið í Gígjökli og mælingar sýna vaxandi vatn í Jökullóninu þá hafa vatnavextirnir gerst mjög hratt, slíkt er fallið 

 

Rennsli eykst undir Gígjökli

Athugasemdir

[Ásta , 14.4.2010 kl. 08:22]

Lónið heitir útfall Gígjökullóns. Gígjökull fellur beint niður úr toppgíg Eyjafjallajökuls. Toppgígurinn er í raun askja með brúnir í um 1650 m hæð.  Það er lán í óláni hversu gífurlega jökullinn hefur þynnst á síðustu tveimur áratugum.  Gígjökull ekki svipur hjá sjón. Við megum því búast við að hlaup verði miklum mun minna en árið 1821, en þá gaus á svipuðum slóðum.

Áhugavert væri að fá einnig fréttir af vatnsrennsli í Steinholtsá austur af toppgígnum. Sem og ánum vestan við; Sauða, Selá og Akstaðaá, en allar þessar ár voru nánast þurrar nema Steinholtsáin sem rann blátær, fyrir viku síðan.

 Enn enn eru vættir Eyjafjalajökuls þjóðinni hliðholl, gáfu tveggja daga lestrarfrí fyrir skýrsluna, og hófu svo landbyggingarstarfsemina aftur, því eldfjöll byggja uppland og ekki veitir af.

[S i g u r ð u r S i g u r ð a r s o n, 14.4.2010 kl. 08:31]

Takk fyrir innleggið, Ásta.

Heyri í útvarpinu misvel upplýsta fréttamenn tala um að vaxið hafi í ám. Raunar hefur aðeins vaxið í Lóninu og útfalli þess. Helmingsaukning sem þykir nú ekki mikið. Raunar nennir enginn að gera samanburð og halda því blákalt fram að 150 cm vatnshæð sem gríðarleg. Ég hef oft séð meira vatn í Lóninu vegna einfaldra leysinga.

[Kristinn Rúnar Karlsson, 14.4.2010 kl. 08:38]

Mjög fínar myndir hjá þér Sigurður! ...og alveg rétt hjá þér Ásta. Ég ætla ekkert að vera voðalega "picky", en hún heitir víst "Steinsholtsá"! Skemmst frá því að segja að ég hef þvælst um Þórsmörk og Goðaland allt síðan um 1970 (þá auðvitað lítill pjakkur), og taldi mig nokkuð glöggan á mörg staðarheiti þar innfrá, en það var ekki fyrr en í fyrrasumar, sem ég fór á Þórsmörk með bóndanum  í Syðstu-Mörk honum Guðjóni Ólafssyni, að ég fékk að vita þetta með Steinsholtsá!!

[S i g u r ð u r S i g u r ð a r s o n, 14.4.2010 kl. 08:48]

Sæll Kristinn.Ég tók ekki eftir þessu hjá Ástu en áin heitir Steinsholtsá, tvö eignarföll í þrísamsettu örnefni. Ekki beinlíns þjált að bera nafnið fram en svona er það.

Til viðbótar við það sem Ásta segir þá vil ég fullyrða að ég hafi aldrei ekið inneftir og séð allar læki og ár tóma þar til komið var að Lóninu. Þetta var um síðustu mánaðamót.

[Kristinn Rúnar Karlsson, 14.4.2010 kl. 09:03]

Já, það er alveg með hreinum ólíkindum Sigurður!