Að alvöru málsins í miðri hrifningunni?

Meðan fréttamenn og stara á virðulegan fossinn, gerast skáld eða rifja upp tengsl sín við gossögu Íslands væri ekki úr vegi að beina sjónum að öðrum málum. Kannski að jarðfræðingar gætu svarað þessum spurningum:

 

• Hvaða líkur eru nú á því að þessi lausa gosefnahrúg uppi á Fimmvörðuhálsi, sem sumir kalla fell, jafnvel fjall, skríði út undan sér til vesturs og hraunstraumurinn breyti um farveg og falli í Hvannárgil? 
• Er farvegur Hrunaár þurr neðan við Hrauntunguna?
• Mun hraunið leita niður á Krossáreyrar þegar það kemur út úr Hrunárgili?
• Mun hraunið loka Krossáreyrum og stífla Krossá? 
• Er ástæða til að reyna að verja skóginn í Þórsmörk og Goðalandi fyrir glóandi hrauni og halda því á miðjum áreyrunum eða eigum við að láta náttúruna hafa sinn gang og spilla vinsælum ferðamannastöðum? 

 

Hraunfoss á við tvo Dettifossa

Athugasemdir

[Einar Steinsson, 25.3.2010 kl. 19:28]

Í mínum huga er náttúran ein með leifi til að hrófla við Þórsmörk, ef henni finnst við hæfi að gera einhverjar breitingar þá á ekki að grípa inn í það. Skaðinn verður varla mikill, þó að Krossá stíflist tímabundið þá mun hún að lokum finna sér leið yfir hraunið og halda áfram að streyma sinn veg.

Ef að náttúrann gerir breitingar þá er það ekkert endilega spjöll, bara annar vinkill.

[Guðmundur Ásgeirsson, 25.3.2010 kl. 20:29]

Það er ekkert sem segir að okkur mannfólkinu tækist betur upp þó við reyndum hafa áhrif á gagn náttúrunnar, víðast þar sem mannshöndin kemur of mikið nálægt verður umhverfið malbikað, hornrétt og steingelt.

En Þórsmörk er einmitt svo sérstakur staður vegna þess hve hrá hún er og full af andstæðum sem móðir náttúra hefur hamast við að móta undanfarnar árþúsundir.

Ég held að við mannfólkið ættum ekki að reyna að standa í vegi fyrir þessari nýjustu viðbót hennar við eitt af sínum meistaraverkum.

Góðar stundir.

[Guðmundur Ásgeirsson, 25.3.2010 kl. 20:31]

"þótt við reyndum að hafa áhrif á gang náttúrunnar"

Biðst velvirðingar á þessum lyklaborðs-hamförum. 

[S i g u r ð u r S i g u r ð a r s o n, 25.3.2010 kl. 20:39]

Þetta eru alveg gild viðhorf. Á móti kemur að margt hefur verið gert í Þórsmörk, Goðalandi og víðar til að bæta aðstöðuna.

Meðal hanns hafa verið gerðir varnargarðar til að temja Krossá sem valdið hefur gríðarlegum „skaða“ á grónu landi beggja vegna.

Strákagilslækurinn hefur verið settur í ákveðinn farveg því þrátt fyrir sakleysislegt nafn leynir hann á sér.

Við Steinsholtsá hefur vaðinu verið margbreytt, fyrirstöður færðar úr því til að gera það öruggara.

Það sem ég á einfaldlega við; er réttlætanlegt að varðveita náttúruna fyrir náttúrunni? Þessari spurningu þarf eflaust að svara á næstu vikum.

Persónulega finnst mér sú tilhugsun ógnvekjandi ef þetta fallega svæði yrði ónýtanlegt næstu áratugi. En kannski er maður bara svona eigingjarn.

[Jón Steinar Ragnarsson, 25.3.2010 kl. 20:47]

Hér er bara eitt að segja: Það verður sem verður.

Spurningin er kannski hvort þú náir að slaka á yfir þessu öllu?  Þú villt kannski ekki að menn sendi jarðvinnutækii þarna inn til að ryðja upp varnargörðum hist og her svona "just in case"? 

Kannski springur þetta allt í loft upp. Kannski ekki. Svarar það einhverjum spurningum?

[Anna Ragnhildur, 25.3.2010 kl. 22:14]

Náttúran þarf að hafa sinn gang. Við þurfum að laga okkur að henni, ekki hún að okkur. Ég sé fyrir mér stórfenglegann foss þegar hraunið er búið að stífla Krossá. Vatnið finnur sér farveg. Það er ekki hægt að segja að náttúran sé að skemma sjálfa sig...skemma Þórsmörk eða Bása. Hvað varðar hús og gróður megum við þakka fyrir að þarna eru engin hamfaraflóð þarsem gosið kom ekki uppúr jökli. En hver veit hvað býður okkar. Það er enn þensla þrátt fyrir gos. Það er lifandi listaverk í gangi og spennandi að sjá hvernig það lítur út fullskapað...

[Gunnar Th. Gunnarsson, 25.3.2010 kl. 22:25]

Sammála Önnu

[Sigurður Viktor Úlfarsson, 26.3.2010 kl. 00:55]

Sem gamall skálavörður í Básum deili ég þessum vangaveltum með þér.

Mér finnst nú ólíklegt að skálarnir í Básum fari.  Hins vegar gæti hraunið tekið t.d. miðasöluskúrinn úti við veg og kroppað eitthvað í varðeldalautina og svæðið þar í kring.  Ég á frekar von á því þar sem það kemur niður Hrunárgilið, væntanlega eftir árfarveginum að það haldi áfram eftir honum, þ.e. niður farveg Krossár.

Krossáin hægir væntanlega eitthvað á hrauninu en á þessum tímapunkti verður hraunið búið að þurrka upp Hrunánna þannig að Krossá verður væntanlega töluvert minni en hún hefur verið.  Þetta þurrkar væntanlega upp Krossánna sem rennur þá inn í hraunið og gufar upp með látum og jafnvel sprengingum.  Slíkar sprengingar gætu reyndar skutlað hrauni upp úr árfarvegnum.

Hrunárgilið er frekar mjótt gil og þá má vera rosalegt magn af hrauni ef það á eftir að fara mikið upp úr farvegi Krossár, myndi ég ætla.

Maður veit hins vegar aldrei.

[Gunnar Th. Gunnarsson, 26.3.2010 kl. 01:59]

Er ekki eftirsjá í þessu Hrunárgili?

[Gunnar Th. Gunnarsson, 26.3.2010 kl. 02:00]

Ég man eftir Stakkholtsgljúfri (minnir mig að það heiti) ... það er rosalega flott

[S i g u r ð u r S i g u r ð a r s o n, 26.3.2010 kl. 09:07]

Innra-Hrunárgil er afar djúpt og þröngt og þangað hefur alltaf verið stórhættulegt að leggja leið sína. Ég hef aðeins einu sinni komið ofan í gilið og það var rétt við Heljarkamb. Var þeirri stundu fegnastur þegar ég kom upp. Engin eftirsjá eftir því gili.

Ytra-Hrunárgil er með allt öðrum brag, er breiðara og á hvoruga hliðina eru hengiflug, aðeins aflíðandi hlíðar. Þar er fallegt en ég held að skemmdir af hrauni verði ekki tiltakanlegar.

Stakkholstgjá er perla. Hún er hins vegar fjarri því hraunrennsli sem hugsanlegt er, sem betur fer.