Golf og kvöldsólarstemming

Skyndilega er komið vor og Háagerðisvöllur er 

orðinn grænn og grínin snöggslegin rétt eins og kollurinn á mér. Tvisvar á síðustu þremur dögum hef ég farið níu holur. Árangurinn er svo sem ekkert til að hrósa sér af. Orðið allt of langt síðan ég spilaði golf síðast en þetta kemur aftur með æfingunni.

Er að hugsa um að fá tilsögn hjá golfkennara. Man eftir að Skúli heitinn bróðir minn sagði oft að sá sem vildi ná árangri í golfi þarf reglulega á tilsögn að halda. Veit núna að það var rétt hjá honum og er óendanlega þakklátur fyrir að hafa munað eftir þessum orðum hans.

Síðasta þriðjudagskvöld spilaði ég einn hring með Ingibergi Guðmundssyni vini mínum. Sólin var hátt á lofti, það var nær logn og mófuglarnir léku við hvern sinn fingur og krían tók undir eins og hún gat.

Hvað er eiginlega betra en golf við slíkar aðstæður? Jú, kannski góð fjallganga, hlaup, sund, gott koníak, góður vinahópur ... Það spillti jafnvel ekki þótt ein vinur minn botnaði upptalninga með þessum orðum: „ .... já og góðar hægðir“.

Já, er ekki lífið gott. 

Athugasemdir

[Baldur Hermannsson, 21.5.2009 kl. 21:20]

Fátt er unaðslegra en að taka golfhring með góðum félögum - og veðrið þarf ekki einu sinni að vera neitt sérlega gott til þess að við njótum dagsins. Ég skrapp upp á Akranes í dag með Runka, Steina og Óla. Ég púttaði 5 sinnum fyrir fugli en rak aldrei niður. Óli og Steini unnu með 2 punktum.

Flatirnar voru dálítið þurrar, sendnar og gróðurlitlar og héldu illa línu. En maður má ekki gera of miklar kröfur svo snemma sumars. Þetta er flottasti völlur landsins þegar gróðurinn er búinn að taka við sér.

Vel á minnst, hvar er Háagerðisvöllur?

[S i g u r ð u r S i g u r ð a r s o n, 21.5.2009 kl. 22:45]

Kæri Baldur. Háagerðisvöllur er hinn ágæti golfvöllur Skagstrendinga. Láttu engan vita af því en þetta er frábær völlur ...

[Baldur Hermannsson, 21.5.2009 kl. 22:50]

Ég hef alveg örugglega spilað hann og sennilega oftar en einu sinni. Spilaði einhverja 9 holu velli þarna norður frá þegar ég fór með félögunum í Blöndu. Þessu slær öllu saman í kollinum á manni. Er ekki ein holan þannig að maður þarf að slá annað höggið yfir einhverja kletta til að komast inn á flötina?  Man að það var skemmtilegur völlur.

[S i g u r ð u r S i g u r ð a r s o n, 21.5.2009 kl. 23:47]

Jú, þú ert nálægt því í endurminningunni. Setti eina mynd á bloggið, svona til hjálpar.

[Baldur Hermannsson, 22.5.2009 kl. 00:19]

Jú það hlýtur að vera þessi völlur. Gúglaði völlinn - myndir - en fann bara fólk að skemmta sér.