Bókin um Gönguleiðina yfir Fimmvörðuháls

Ég auglýsti bókina mína „Gönguleiðin yfir Fimmvörðuháls“ Morgunblaðinu í gær. Þetta er vegleg bók um vinsælustu gönguleið landsins og þar er henni gerð ítarleg skil. Að mínu mati, ódýr og hagnýt jólagjöf fyrir alla aldurshópa.

Landið okkar er stórkostlegt og Fimmvörðuháls einstakleg fallegur og góður til gönguferða.

Ég fór fyrst yfir Fimmvörðuháls í lok júní 1979. Fáir gengu yfir Hálsinn á þeim tíma, aðeins ein eða tvær ferðir á vegum Ferðafélags Íslands. 

Um tuttugu árum síðar tók ég þátt í að byggja Fimmvörðuskála Útivistar efst á Hálsinum, þar sem skáli Fjallamanna stóð, en hann var byggður árið 1940 og var ónýtur. Mikið ævintýri var að byggja skálann enda ekkert áhlaupaverk þarna uppi í eitt þúsund metra hæð.

Ég skrifaði síðan bók um gönguleiðina yfir Fimmvörðuháls og kom hún út árið 2002. Árið 2010 tók náttúran í taumana og breytti landslaginu. Þá gaus svo að segja á gönguleiðinni sem hvarf fljótlega undir hraun. Þá var ekkert um annað að gera en að endursemja hluta bókarinnar.

Gönguleiðin yfir Fimmvörðuháls var vinsæl fyrir gos en eftir það hefur hún tvímælalaust orðið sú vinsælasta af þeim gönguleiðum sem teljast í flokknum drjúgar dagleiðir. 

Fjórir áfangar

Fyrsti áfangi gönguleiðarinnar fjallar um Fossaleiðina meðfram Skógárgljúfri. Þetta er ægifögur leið og fjöldi fossa prýðir landið.

Fyrir ofan svokallað vað á Skógaá (raunar er göngubrú yfir ána) tekur við sérkennilegur áfangi um klettaborgir og lítil dalverpi allt upp að Fimmvörðuhrygg. Þar uppi er Fimmvörðuskáli Útvistar.

Þriðji áfangi leiðarinnar er frá Fimmvörðuskála og að Bröttufönn. Mörgum finnst þessi stutti kafli leiðarinnar sá merkilegasti, að minnsta kosti liggur nú leiðin yfir hraunið sem rann árið 2010 og með gígunum tveimur, Magna og Móða.

Fjórði og síðasti áfanginn er niður frá Bröttufannarfelli, yfir Morinsheiði, Foldir og Kattahryggi og að Básum. Einnig er hægt að fara aðra frábæra leið í Bása en hún liggur um hið stórbrotna Hvannárgil.

Laus kort fylgja bókinni sem henta vel á göngu.

Ódýr en góð jólagjöf

Bókin um Fimmvörðuháls fæst aðeins í póstverslun hjá mér.

Bókin kostar 1.990 krónur.

Hægt er að greiða fyrir hana með kreditkorti eða millifæra.

Pöntunarsíminn er 864 9010.

Bókin fæst ekki annars staðar.

 

 

 

 

 

 

 

Athugasemdir

[Ívar Pálsson, 7.12.2016 kl. 15:48]

Já, Sigurður, bók þín er praktísk og fróðleg, hverrar krónu virði. Kortin komu sér líka mjög vel, laus frá bókinni og nægilega ítarleg til þess að alltaf var ljóst hvar maður var staddur.

Þetta er bók til þess að eiga, gangi þér vel. Svo kemur þú með aðra eftir öskufallið úr komandi Kötlugosi! 

[S i g u r ð u r S i g u r ð a r s o n, 7.12.2016 kl. 15:52]

Gleður mig að þú ert ánægður með bókina, Ívar.

Hins vegar verður æði langt að bíða eftir Kötlugosi. Sko, draumspakur maður kom að máli við mig og sagði að minnsta kosti tíu ár það, að minnsta kosti þeirrar gerðar sem næði upp úr ísnum. Sel þetta ekki dýrara en ég keypti. Sá spaki hefur líka talsverðan skilning á jarðfræði fyrir utan aðrar gáfur.