Hvaða embætti á eiginkona forsætisráðherra að segja af sér?

En þrátt fyrir allt sem að ofan er sagt, má augljóst vera að svona flókið eignarhalds- og fjárfestingadæmi hjá gjaldkera Samfylkingarinnar – jafnaðarmannaflokks Íslands er lítt til þess fallið að fókusera umræðuna sem nú stendur yfir um aflandsfélög og skattaskjól á það sem máli skiptir: ríkisstjórnina og stjórnarmeirihlutann í landinu.

Ég hef því ákveðið að segja af mér embætti gjaldkera Samfylkingarinnar, og styð stjórnarandstöðuna eindregið í því að kalla fram ábyrgð ríkisstjórnarflokkanna á sínu fólki.

Þetta segir gjaldkeri Samfylkingarinnar, Vilhjálmur Þorsteinsson, í niðurlagi pistils á bloggsíðu sinni. Vilhjálmur er skarpgreindur maður, ágætur penni og rökfastur. Ég á ekkert erfitt með að viðurkenna þessa staðreynd þó svo að ég byggi hana á öllu öðru en persónulegum kynnum.

Engu að síður er nauðsynlegt að gera athugasemdir við ýmislegt sem hann segir.

Margir hafa lofað Vilhjálm fyrir að segja af sér sem gjaldkeri, aðrir hafa bent á að hann sé ekki gott dæmi um „spillingu“ þar sem hann er ekki stjórnmálamaður. Aðrir segja að í sjálfu sér geti til dæmis forsætisráðherra notað sömu rök og Vilhjálmur og setið sem fastast.

Sem sagt, orðræðan er afar misvísandi enda rammpólitísk. Stjórnarandstæðingar nota arfsmál eiginkonu forsætisráðherra til að koma höggi á ríkisstjórnina. Margir sjá aðeins fyrirsagnirnar og heyra eftir það einungis sem þeir vilja heyra. Hins vegar eru málin oftast einfaldari og skýrari þegar þau eru krufin. Orðræðan er um spillingu, siðferðisbrest og annað álíka.

Mér finnst ástæða til að fara varlega og gæta að efni máls. Það gera ekki allir, síst af öllu stjórnarandstæðingar og þeir sem eiga þá ósk heitasta að ríkisstjórnin segi af sér, til dæmis heiftræknir vefmiðlar sem gera engan greinarmun á blaðamennsku eða persónulegum skoðunum.

Víkum aftur að máli Vilhjálms og skoðum það með hliðsjón af því sem varðar eiginkonu forsætisráðherra. 

Athygli vekur að sameiginlegt eiga þau þetta:

• Vilhjálmi græddist fé við sölu fyrirtækis hér á landi, eiginkonu forsætisráðherra tæmist arfur.
• Hvorugt geymir fé sitt í íslenskum bönkum. Eiginkonu forsætisráðherra hefur verið hallmælt fyrir það.
• Bæði hafa alla tíð talið fram á íslenskri skattskýrslu erlendan bankareikning sinn og borga skatta hér á landi. Honum finnst þetta aðalatriði en þegar hún heldur því sama fram er ekki hlustað
• Vilhjálmur segir eftirfarandi og eiginkona forsætisráðherra hefur sagt svipað: „Persónulegar skattgreiðslur mínar eru nákvæmlega þær sömu og ef eignarhaldsfélagið hefði verið íslenskt.“
• Vilhjálmur segir hið sama og eiginkona forsætisráðherra: „Félagið er ekki í Lúxemborg vegna skattahagræðis.“ 

Þetta er nú hluti af því sem Vilhjálmur segir sér til réttlætingar og allt er það sama og eiginkona forsætisráðherra segir. Á móti kemur eftirfarandi sem Vilhjálmur og frúin eiga ekki sameiginlegt:

• Hann gefur ekki upp fjárhæðina sem hann geymir erlendis, hún gerir það.
• Hann stundar atvinnurekstur hér á landi, niðurgreiðir meðal annars pólitískan vefmiðil. Hún hreyfir ekki við fé sínu.

Ég veit ekki hvað öðrum finnst en mér þykir ofangreint ansi athyglisvert. Ekki síst sú staðreynd að sem fram kemur í tilvitnuninni í upphafi, að Vilhjálmur styðji pólitískt upphlaup stjórnarandstöðunnar, sem Vilhjálmur orðar svona: „...að kalla fram ábyrgð ríkisstjórnarflokkanna á sínu fólki“. Væntanlega mun hann halda áfram að fjármagna hinn pólitíska vefmiðil í þessum tilgangi.

Er staðan eitthvað einfaldari eftir að Vilhjálmur er hættur sem gjaldkeri í Samfylkingunni, samanber tilvitnunina í upphafi pistilsins?

Nei, fókusinn á umræðuna er kristalskýr. Hann sýnir einfaldlega að hún er pólitísk, rammpólitískt upphlaup stjórnarandstöðunnar, ekki fólksins í landinu. Tilgangurinn er auðvitað sá að hafa áhrif á almenning og helst afvegaleiða hann í umræðunni.

Vilhjálmur hefur nú skrifað syndaaflausn sjálfum sér til handa, sagt af sér embætti og vonast standa svo hvítþveginn á eftir, að hann geti haldið áfram pólitískri baráttu gegn ríkisstjórninni. Það sem hann telur ávirðingu á aðra á ekki við í eigin tilviki.

Hafi Vilhjálmur ekki gert neitt rangt með sínum aflandsreikningum hefur eiginkona forsætisráðherrans ekki heldur gert það. Eða hvaða embætti á hún að segja af sér til að fá sömu syndaaflausn? 

Athugasemdir

[Jónas Ómar Snorrason, 31.3.2016 kl. 22:31]

Mér finnst þú einfalda hlutina um of kæri Sigurður. Þú gerir sjálfan þig að hluta meðvirkan með því að einblína á konu SDG. Hún er ekki í umræðuni, alveg sama hvað þú lemur hausnum oft við steininn með hana. það er SDG forsætisráðherra, segji enn og aftur SDG forsætisráðherra. Ég vil spyrja þig: Hefði framsóknarflokkurinn getað lagt upp með sína stradegíu í kostningabaráttu sinni fyrir síðustu kostningar með þessa vitneskju uppi á borðum, sem nú er vitað? Hefði sjálfstæðisflokkurinn fengið þá kostning sem hann fékk með þessa vitneskju uppi á borðum, sem nú er vitað? Þú getur sett út á ef og hefði, þetta eru engar heimsspekilegar spurningar, ef þú reynir að skorðast undan að svara þeim, bara plain og simple. 

[Jónas Ómar Snorrason, 31.3.2016 kl. 22:34]

Ég gleymdi að nefna Vilhjálm. Hann virðist einfaldlega hafa axlað sína ábyrgð, út af fyrir sig ekkert meira um hann að segja. Nema auðvitað eiga þeir þjóðkjörnu að gera það sama þeigjandi og hljóðalaust.

[S i g u r ð u r S i g u r ð a r s o n, 1.4.2016 kl. 08:15]

Ég veit afar lítið um strategíu Framsóknarflokksins eða hvernig þeir haga sínum málum. Þar að auki veit ég ekkert um hug kjósenda svona almennt, ég stunda ekki kannanir á skoðunum fóls, mér og öðrum yrði líka ómögulegt að kanna hvað hefði orðið ef ... Þetta er svona eins og að spyrja hvernig sagan hefði orðið ef Alois Hitler and Klara Pölzl hefðu misst öll börnin sín í æsku þeirra. 

Já, og svo er það þetta með hinn ágæta mann, Vilhjálm. Greinilegt er að Samfylkingin hefur misst góðan mann úr forystu sinni. Er sannfærður um að þar inni er ekki nokkur maður sem er jafnfær. Hins vegar axlaði Vilhjálmur enga ábyrgð. Hann fór og er jafnstöndugur og áður samanber fréttirnar í Morgunblaði dagsins. 

Hvaða þjóðkjörnin eiga að segja af sér? Bjarni Benediktsson og Ólöf Nordal fyrir að eiga ekkert í skattaskjólum? Sigmundur Davíð Gunnlaugsson vegna þess að konan hans á peninga í útlöndum og hefur talið þá alla fram, alla tíð, rétt eins og áðurnefndur Vilhjálmur? 

Er ekki bara best að þú segir af þér?