Svindl fjölmiðla um völvur og spádóma fyrir næsta ár

Meirihlutinn í borgarstjórn Reykjavíkur á í vök að verjast allt árið að því er fram kemur í kristalskúlu Völvu DV. Kúturinn sem Dagur B. heldur í raun í og heldur honum á floti, er máttlaus stjórnarandstaða í borginni. Sú lélegasta um áratugaskeið.

Fjárhagsstaða borgarinnar er myllusteinn Dags og þegar sífellt kemur betur í ljós að embættismenn og kjörnir fulltrúar draga ekki úr utanlandsferðum og dagpeningagreiðslum molnar úr undirstöðum sem Dagur hefur treyst á.

Svo segir völva dv.is um framtíðina í borgarstjórn Reykjavíkur. Afar sennilegt ...

Óvandaðir fjölmiðlar halda því fram að hægt sé að horfa fram í tímann og segja til um hvað þá gerist. Auðvitað er það ekki hægt. Enginn getur spáð fyrir um hvað gerist.

Sannarlega er hægt að giska á hvað muni gerast með því að draga ályktanir af því sem þekkt er. Þannig er mjög líklegt að kalt verði fram á vor og hlýrra að sumarlagi en að vetri til.

Gera má ráð fyrir að ríkisstjórn sem situr með stuðningi þrjátíu og átta þingmanna af sextíu og þremur muni halda áfram út kjörtímabilið. Um leið er líklegt að illskeytt stjórnarandstaða muni ekki láta af þeim tilburðum sem hún hefur sýnt síðustu mánuði. Ekki þarf völvu eða spámann til að semja líklega atburðarás með þessari forskrift.

Um veðrið er auðvelt að spá, það er í raun og veru alltaf eins frá ári til árs en þó koma af og til fram einhverjir ófyrirséðir atburðir til dæmis miklir stormar.

Verða einhver eldgos á næsta ári? Hugsanlega. Engin gat þó spáð fyrir um eldgosin á Fimmvörðuhálsi, í Eyjafjallajökli, Vatnajökli eða í Holuhrauni. Enginn spáði fyrir um efnahagshrunið 2008.

Svona spámennska í fjölmiðlum er auðvitað ekkert annað en tilraun til að selja blöðin. Völvur eða spákonur eru einfaldlega samantekin ráð á ritstjórnum um sennilegar ágiskanir. Síst af öllu eru þetta staðreyndir og fjarri lagi um einhver vísindi að ræða.

Jarðskjálftahrina mun lengi vel hrista Suðurland og miðhálendið áður en krafturinn leysist í læðingi. ­Mikið jökul­vatn mun hlaupa fram en á óbyggðu landi. Rafmagn mun fara af og bæir einangrast en mannskaði verður ekki. Umbrotin standa ekki lengi.

Þessi auma spá kemur líka úr dv.is. Er eiginlega ekkert frambærilegra en þetta að fá frá völvu DV?

Jarðskjálftar sem munu „lengi vel hrista Suðurland og miðhálendið ...“ en umbrotin standa ekki lengi ... en samt „lengi vel“. Þvílíkt bull og vitleysa. Látum það þó vera en kann enginn að skrifa á DV og er enginn yfirlestur greina á fjölmiðlinum.

Verst að ekki finnast neinir fjölmiðlar sem geta flett ofan af svindli fjölmiðla í spámennsku fyrir næsta ár.

Athugasemdir

[Ásthildur Cesil Þórðardóttir, 30.12.2015 kl. 18:41]

Er þetta ekki meira svona til gamans gert?  Held það, enginn tekur þessu alvarlega, en það er bara gaman að lesa það sem fram kemur.  Við erum nú einu sinni forvitin þjóð og ekki langt í barnið í okkur 

[Gunnar Heiðarsson, 30.12.2015 kl. 20:27]

Tek undir með Ásthildi, þetta er meira gaman en alvara. A.m.k. vona ég að fólk fari ekki að lifa eftir slíkum "spádómum".

Hins vegar verður gamanið frekar lítið þegar sömu spár koma fyrir ár eftir ár, án þess að rætast. Völva Vikunnar virðist föst í einhverjum slíkum hjólförum og lestur hennar boðskaps gerði lítið fyrir manna annað en að ruglast á áramótum. Hélt jafnvel, meðan á lestir þess boðskaps stóð, að nú væri árið 2014 að líða og 2015 að taka við.

En hvað um það, spádómar eru alltaf SPÁdómar. Engin sannindi liggja þar að baki. Sumir eru betri en aðrir að lesa í atburðarás líðandi stundar og spá fyrir um framtíðina. Aðrir sjá þarna tækifæri til að koma á framfæri einhverskonar pólitískum áróðri.

[S i g u r ð u r S i g u r ð a r s o n, 30.12.2015 kl. 20:35]

Ég held að þetta sé fyrst og fremst sölutrix enda má sjá endurteknar fréttir hjá DV um þetta, nokkurs konar „teaserar“ sem ætlað er að fá fólk til að kaupa blaðið með „spádómunum“.

Á þessum fréttum um völvu og spámenn og til dæmis fyrsta aprílgöbbum er stór munur. Í síðarnefnda tilvikinu er í marga daga tuggið á sömu fréttinni til að selja. Í fyrrnefnda tilviku er einn dagur að hluta lagður undir hjá fjölmiðlum og allir hlægja og skemmta sér.

Lítil skemmtun er í völvufréttum enda vantar lykilatriðin sem gera þannig fréttir skemmtilegar.

[Anna Sigríður Guðmundsdóttir, 30.12.2015 kl. 21:52]

Tek undir með Áshildi.

Það er hinsvegar óskiljanlegt hvað hægt er að teygja lopann hjá hagfræði-spámönnum fjármála/lífeyris/bankasjóða-spámönnum heimsins?

Ég skil ekki þannig spádóma, þótt það þyki víst alveg marktækt spádómsrugl hjá ýmsum ábyrgðarlausum "hagfræði"-spáspekingum?

Einn spáði meira að segja heimsendi, sem var spilað með á ábyrgðarlausan hátt, af fjöl-"miðla"-blekkingar-stjórnun heimsins?

Ótrúleg meðvirkni það?

M.b.kv.