Þrjú þúsund og þrjú hundruð jólakveðjur út í tómið

Í morgun gekk ég út á svalir, eins og ég geri jafnan árla á Þorláksmessu, dró nokkrum sinnum djúpt andann og hrópaði síðan af öllum kröftum:

Sendi ættingjum og vinum bestu óskir um gleðileg jól og heillaríkt nýtt ár. Þakka allt á árinu sem er að líða.

Svo beið ég í dálitla stund þangað til svörin bárust:

Já, sömuleiðis, gleðileg jól, kallaði einhver.

Haltu kjafti, helv... þitt. Fók er að reyna að sofa hérna, öskraði rámur kall.

Ha ..., kaseiru? hrópaði skræk kona.

Hundur gelti, annar tók umsvifalaust undir og köttur mjálmaði.

Ég gekk inn í stofu, nennti ekki að hlusta á hundgá, jafnvel þótt fyrr eða síðar myndi hundur sonar míns, hann Fróði (sko hundurinn heitir Fróði ekki sonurinn) hugsanlega gelta, mér eða einhverjum öðrum til ánægju.

Engu að síður velti ég því samt fyrir mér hvort ekki væri skynsamlegra að senda jólakort eða tölvupóst. Þetta hef ég hins vegar gert á Þorláksmessu frá því ég var barn og með því sparað mér ótrúlegar fjárhæðir í kaupum á jólakortum og frímerkjum.

Nú kann ábyggilega einhver að misskilja mig og halda að ég sé að gagnrýna þann hálfra aldar gamla sið að senda jólakveðjur á gufunni Ríkisútvarpsins.

Nei, nei, nei ... Því er nú víðsfjarri, en úr því að verið er að brydda upp á þessu, man ég aldrei eftir að hafa heyrt jólakveðju til mín eða þeirra sem ég þekki.

Nú má vel vera að enginn sendi mér jólakveðju í útvarpinu, sem í sjálfu sér er dálítið sorglegt. Hitt kann þó að vera jafn líklegt að útilokað sé að hlusta með einbeittri athygli á þrjú þúsund jólakveðjur lesnar í belg og biðu í tvo daga samfleytt og ná að grípa þá réttu. Ýmsum kann að finnast það álíka sorglegt.

Fyrst verið er að misskilja viljandi tilganginn með þessum skrifum mínum vil ég nefna, í fullkominni vináttu, kurteisi og virðingu fyrir hefðum fólks, þá staðreynd að það er ábyggilega ódýrara og markvissara að hrópa kveðjur af svölunum en að borga Ríkisútvarpinu fyrir að lesa þær út í tómið.

Þá hrekkur þetta eflaust upp úr lesandanum:

En það er svo gasalega jólalegt að hlusta á jólakveðjulesturinn á gufunni.

Já, því skal ég nú trúa. Það er líka obboðslega jólalegt að tala til þjóðarinnar úti á svölum á Þorláksmessumorgni.

(Vilji svo til að einhver glöggur lesandi telji sig hafa lesið ofangreindan pistil á Þorláksmessu á síðasta ári skal tekið fram að höfundur fer jafnan út á svalir þennan dag)

(Myndin er af sérútbúnu ökutæki við dreifingu á jólakveðjum Ríkisútvarpsins. Hugsanlega  blandast einhver snjór með kveðjunun, en það er nú bara svoooo jólalegt)

3.300 jólakveðjur lesnar í ár

Athugasemdir

[Ásthildur Cesil Þórðardóttir, 23.12.2015 kl. 18:56]

Góður, ég sendi þetta bara út á netið, sjálfri mér til ánægju og sennilega nágrönnum mínum til mikillar gleði En gleðileg jól til þín og takk fyrir skemmtileg skrif oft á tíðum.  

[S i g u r ð u r S i g u r ð a r s o n, 23.12.2015 kl. 18:58]

Þakka þér fyrir, Ásthildur. Alltaf gaman að fá skrif frá þér. Gleðileg jól og megi næsta ár verða þér og þínum gott.

[Ásthildur Cesil Þórðardóttir, 23.12.2015 kl. 21:08]

[Jósef Smári Ásmundsson, 23.12.2015 kl. 22:40]

Þetta á sennilega eftir að koma. Kosmósið er alltaf svolítið lengi á leiðinni. En þangað til:gleðileg jól til þín og þinna.

[S i g u r ð u r S i g u r ð a r s o n, 23.12.2015 kl. 22:46]

Þakka þér fyrir, Jósef Smári, og sömuleiðis, gleðileg jól til þín og þinna.

[Anna Sigríður Guðmundsdóttir, 23.12.2015 kl. 23:34]

Það verður aldrei öllum gert til hæfis. Ég hlusta á jólakveðjurnar og það gleður mig. Það eru ekki allir á ferð og flugi, né í fullu fjöri, utan ríkisútvarps-hljóðdreifingarinnar leyfðu hlustunar.

Kannski er þetta of dýrt fyrir svona ræfla eins og okkur öryrkjandi gamlingjana. En megum við ekki hafa eitthvað eftir af gömlu kjölfestunni, í stjórnlausa lífeyris/bankaræningja-stjórnsýslu-umróti nútímans?

Eða eru jólakveðjurnar kannski of dýrar, af því þær skila kannski of mikilli ánægju til landsmanna, án gífurlegs hagnaðar falsaðra peninga lífeyris/bankaránanna?

Til hvers er þetta líf eiginlega kæra fólk, ef enginn má gera neitt sem ekki skilar bönkum og lífeyris/fjármálaræningjastofnunum hagnaði?

Gleðileg jólakveðja til ykkar sem eruð í nútímalegu og ferðafrjálsu fjöri, óháð heimasetunni, og utan þarfa ríkisútvarpsins.

M.b.kv.