Ærðir álitsgjafar

Allt í einu byrjaði einhver að garga: Þöggun! Þöggun! Álitsgjafarnir ærðust og löptu þessa orðaleppa upp hver eftir öðrum - greinilega margir hverjir án þess að hafa sjálfir lesið tilmæli lögreglustjórans. Í þeim er nefnilega ekki að finna snefil af tilburðum til þöggunar né tilmæli um slíkt. Aðeins vel rökstudd sjónarmið um tímasetningu á upplýsingagjöf með hagsmuni fórnarlambanna að leiðarljósi. Að kalla þetta þöggun er rökleysa og misnotkun á hugtakinu.

Staðreyndir málsins hindruðu þó ekki alls konar fólk í að stökkva upp á þennan útúrsnúninga- og fordæmingarvagn og óbrjálaðir menn voru jafnvel farnir að halda því fram í virðulegum útvarpsþætti að lögreglustjórinn væri sennilega að gæta einhverra vafasamra fjárhagslegra hagsmuna í Vestmannaeyjum með þessum tilmælum (sic!). Og alltaf varð ég meira og meira hissa á því hverjir tíndust upp á vagninn. Og mest hissa varð ég þegar talskona Stígamóta brást við útúrsnúningunum og ruglinu eins og um staðreyndir væri að ræða.

Þannig skrifar Páll Magnússon, fyrrverandi útvarpsstjóri, í Fréttablaðið í dag. Vel skrifað hjá Páli. Fleiri en ég voru undrandi á herferðinni gegn lögreglustjóranum í Vestmannaeyjum sem gaf það út fyrir þjóðhátíð að vegna rannsóknarhagsmuna yrði ekkert sagt um hugsanlegar nauðganir fyrr en mál væru komin á rekspöl.

Furðulegt var hve sæmilega vel gefið fólk gat æst sig út af þessari yfirlýsingu og reiknað hana til annars en hún var meint. Ég og fleiri þurftum að lesa yfirlýsinguna margsinnis og gátum þó ekki skilið hana á þann veg sem álitsgjafarnir héldu fram. Síst af öllu var yfirlýsingin einhver þöggun og þá hugsanlegum fórnarlömbum til frekari vandræða né heldur var hún fram sett til að gæta annarra hagsmuna en fórnarlamba þeirra skelfilegu árása sem nauðganir vissulega eru.

Þó ekki væri anna en af þessu þarf að taka því sem sjálfskipaðir álitsgjafar með mikilli varúð.

Og svo segir Páll:

Þá bar svo til að ung kona, hugrakkur þolandi tveggja nauðgana, steig fram og lýsti opinberlega heilshugar yfir stuðningi við þau sjónarmið sem fram komu í tilmælum lögreglustjórans. Ætla álitsgjafarnir og talskona Stígamóta líka að saka þessa konu um tilburði til þöggunar - eða skilningsleysi á hlutskipti þolandans?

Athugasemdir

[Axel Jóhann Hallgrímsson, 12.8.2015 kl. 20:32]

Góður pistill hjá Páli og þér Sigurður, þörf umræða. Maður varð hálf klumsa þegar talskona Stígamóta tjáði sig um málið, hvar hún fór afar hörðum orðum um lögreglustjórann í Eyjum. Sem betur fer er lögreglustjórinn í Eyjum kona, ég get rétt ímyndað mér hvernig kveðjur Stígamótakonunnar til lögreglustjórans hefðu verið, væti hann karlmaður.

[Anna Sigríður Guðmundsdóttir, 13.8.2015 kl. 02:22]

Í landi þöggunar er ekkert undarlegt að almenningur tortryggi löggæslunnar réttlætingar og "rannsóknir". Um óvandaða lögreglurannsókn bæði fyrr og enn þann dag í dag um ýmis mál, snýst í raun þetta Eyjapartý-verslunarmannahelgar-mál.

Svona fjöldasamkvæmispartý-hátíð býður uppá ýmis afbrot sem löggæslan ræður ekki við.

Páll Magnússon ætti nú að vita að ekki er allt heilagt í glæparannsóknum hér á eyjunni bankaræningjaspilltu. Hann er nú ekki fæddur í gær, hann Palli blessaður gamli fréttamaðurinn í þöggunarlandinu.

M.b.kv.

[Stefán Örn Valdimarsson, 13.8.2015 kl. 09:56]

Ætli þetta sé ekki enn eitt dæmið að fjölmiðlum er ómögulegt að fjalla um mál sem tengist þeim sjálfum.  Fjölmiðlum mislíkar að þeir fái ekki að velta sér upp úr mannlegum hörmungum og þá er sett af stað stórt sjónarspil.  Hver álitsgjafinn grafinn upp á fætur öðrum og jafnvel mörgum sinnum í hverjum fréttatíma sem allir eiga það sannmerkt að finna tilælum lögreglstjóran allt til foráttu.  Ég efast um að hugsanleg innrás N-Kóreu inn í S-Kóreu hefði fengið meira pláss í fréttatímum.  Engin má styggja fjölmiðlanna þá skal viðkomandi fá fyrir ferðina.