Þrjú þúsund jólakveðjur út í tómið

Í morgun gekk ég út á svalir, eins og ég geri jafnan árla á Þorláksmessu, dró nokkrum sinnum djúpt andann og hrópaði síðan af öllum kröftum:

Sendi ættingjum og vinum bestu óskir um gleðileg jól og heillaríkt nýtt ár. Þakka allt á árinu sem er að líða.

Svo beið ég í dálitla stund þangað til svörin bárust:

Já, sömuleiðis, gleðileg jól, kallaði einhver.

Haltu kjafti, helv... þitt. Fók er að reyna að sofa hérna, öskraði rámur kall.

Ha ..., kaseiru? hrópaði skræk kona.

Hundur gelti, annar tók umsvifalaust undir og köttur mjálmaði.

Ég gekk inn í stofu, nennti ekki að hlusta á hundgá, jafnvel þótt fyrr eða síðar myndi hundur sonar míns, hann Fróði (sko hundurinn heitir Fróði ekki sonurinn) hugsanlega gelta, mér eða einhverjum öðrum til ánægju.

Engu að síður velti ég því samt fyrir mér hvort ekki væri skynsamlegra að senda jólakort eða tölvupóst. Þetta hef ég hins vegar gert á Þorláksmessu frá því ég var barn og með því sparað mér ótrúlegar fjárhæðir í kaupum á jólakortum og frímerkjum.

Nú kann ábyggilega einhver að misskilja mig og halda að ég sé að gagnrýna þann hálfra aldar gamla sið að senda jólakveðjur á gufunni Ríkisútvarpsins.

Nei, nei, nei ... Því er nú víðsfjarri, en úr því að verið er að brydda upp á þessu, man ég aldrei eftir að hafa heyrt jólakveðju til mín eða þeirra sem ég þekki.

Nú má vel vera að enginn sendi mér jólakveðju í útvarpinu, sem í sjálfu sér er dálítið sorglegt. Hitt kann þó að vera jafn líklegt að útilokað sé að hlusta með einbeittri athygli á þrjú þúsund jólakveðjur lesnar í belg og biðu í tvo daga samfleytt og ná að grípa þá réttu. Ýmsum kann að finnast það álíka sorglegt.

Fyrst verið er að misskilja viljandi tilganginn með þessum skrifum mínum vil ég nefna, í fullkominni vináttu, kurteisi og virðingu fyrir hefðum fólks, þá staðreynd að það er ábyggilega ódýrara og markvissara að hrópa kveðjur af svölunum en að borga Ríkisútvarpinu fyrir að lesa þær út í tómið.

Þá hrekkur þetta eflaust upp úr lesandanum:

En það er svo gasalega jólalegt að hlusta á jólakveðjulesturinn á gufunni.

Já, því skal ég nú trúa. Það er líka obboðslega jólalegt að tala til þjóðarinnar úti á svölum á Þorláksmessumorgni.

 

Athugasemdir

[Jón Sveinsson, 23.12.2014 kl. 14:57]

Ég er með hasperur í eirum eftir bergmálið frá þér og skrifa því þér og Óska þér og þínum Gleðilegra Jóla og Farsæld á nýu ári 

[Ásthildur Cesil Þórðardóttir, 23.12.2014 kl. 16:39]

Þú ert frábær, Gleðileg jól og takk fyrir skemmtilega bloggvináttu. 

[S i g u r ð u r S i g u r ð a r s o n, 23.12.2014 kl. 17:48]

Bestu þakkir, Jón.

[S i g u r ð u r S i g u r ð a r s o n, 23.12.2014 kl. 17:50]

Þakka, Ásthildur. Óska þér og þínum gleðilegra jóla. Vonandi ganga húsnæðismálin þín upp. Synd ef þetta fallega kúluhús ykkar fái ekki að standa. Vonandi tekst ykkur að laga húsið eftir óhappið.

[Ásthildur Cesil Þórðardóttir, 23.12.2014 kl. 17:57]

Takk Sigurður minn, þetta fer eins og það fer.  Ég þarf að taka afdrifaríka ákvörðun eftir áramótin, um hvort við leggjum í að gera við þakið, sem mun kosta um 10. milljónir, málið er reyndar að við myndum sennilega gera það, ef bankinn væri ekki á hliðarlínunni til að sölsa það undir sig vegna skuldar sem við stofnuðum til vegna eins barnsins okkar.  En það verður einhvernveginn að skoða þetta mál vel.  Ég er ekki búin að gefast upp, og ætla að berjast eins og ég get.  En svo mun bara koma í ljós hvort það heppnast.  Eg eigðu gleðileg jól og takk fyrir skemmtilegan félagsskap hér á blogginu. 

[Wilhelm Emilsson, 24.12.2014 kl. 00:04]

Þessi pistill er með betri jólasögum sem ég hef lesið. Gleðileg jól og farsælt komandi ár!

[S i g u r ð u r S i g u r ð a r s o n, 24.12.2014 kl. 00:20]

Mín gleðleg jól geti einhver skemmt sér yfir svona sögum. Þakka þér Wilhelm.