Hríðskota- og vélbyssulaus sveitarfélög

Umræðan um byssur, hríðskotabyssur og vélbyssur er dálítið undarlegt. Margir skjóta án afláts en spyrja aldrei. Sannleikurinn er þeirra hverjar svo sem staðreyndirnar eru. Margir eru hríðskjótandi að stjórnvöldum en svörin eru aukaatriði. Aðrir eru sannkallaðir vélbyssukjaftar og vanda engum kveðjurnar hvar svo sem sannleikurinn liggur.

Þeir eru ekki margir sem kunna að stilla sig og ræða málin af ró og yfirvegun. Jafnvel bæjarstjórinn í Hafnarfirði vill ekki sjá vélbyssu í bænum, hvað þá lögreglumann með vélbyssu.

Það minnir mann á ályktanir sem tíðkuðust mjög fyrir nokkrum árum er hvert sveitarfélagið á fætur öðru vildi ekki sjá kjarnorkusprengju á sínu landi. Hafnarfjörður lýsti sig kjarnorkuvopnalaust svæði og sama var með önnur sveitarfélög á höfuðborgarsvæðinu. Þannig var það líka með öll önnur sveitarfélög landsins enda eðli máls vegna ótækt ef nágrannasveitarfélagið leyfði kjarnorkuvopn á sínu landi. Svipað eins og ef Skagabyggð væri kjarnorkuvopnalaust en Skagaströnd leyfði slíkt tól á sínu landi (fyrir þá sem ekki vita umlykur fyrrnefnda sveitarfélagið það síðarnefnda, það er að segja landfræðilega ...). 

Nú er það bara spurningin hvort friðarsamtök efni ekki til annars átaks og boði hríðskotabyssulaus sveitarfélög og jafnvel vélbyssulaus sveitarfélög. Hér er auðvitað átt við lögregluna sem og almenning rétt eins og þegar sveitarfélögin lýstu sig kjarnorkuvopnalaus þá var ábyggilega átt við að hvorki einstaklingar né löggan mætti eiga slík vopn, hvað þá brúka þau. 

Þegar ég var í sumarlöggunni í gamla daga var skammbyssa í hanskahólfinu á sumum vegalögreglubílum. Ekki veit ég til þess að neinn hafi meiðst þess vegna nema stöku svartbakar. Hins vegar veit ég ekki til þess að kjarnorkusprengja hafi verið í neinum bíl.

Sé ætlunin að sveitarfélög álykti gegn hríðskota- og vélbyssum hjá löggu og landhelgisgæslu þyrfti að jafnframt að álykta gegn vopnahaldi misyndismanna. Þá er hugsanlegt að jafnvægi komist á.

En hugsið ykkur, hvernig væri nú staðan ef löggan væri betur vopnum búin en vonda liðið ...?

Athugasemdir

[Ólafur Björn Ólafsson, 27.10.2014 kl. 15:15]

Góður, ef ekki snilldarpistill hjá þér.

Stöku svartbakar... Hahaha... :)

Með kveðju

[Ásgrímur Hartmannsson, 27.10.2014 kl. 16:21]

Ég skil ekki af hverju fólk heimtar alltaf afvopnun. Hefur þeð aldrei heyrt um Tyrkjaránið, og við hvaða aðstæður það gekk sem best?

Og hvernig finnur fólk út að best sé að lögreglan hafi einhvern einkarétt á almennilegum vopnum?

Lærði fólk ekkert af verkum Breivik? Hvað með svo mörg þjóðarmorð þar áður og ennþá?

Ég skil ekki fólk.

[Bjarne Örn Hansen (IP-tala skráð) 28.10.2014 kl. 09:09]

Þetta mál er Íslandi til skammar, svo ekki sé meira sagt.  Lögreglan á Íslandi, eru frægir fautar og fantar, svona smápattar sem dreyma um að verða eins og löggan í Bandríkjunum.

Að láta hríðskotabyssur í hönd á þessum óvitum, er alveg fyrir neðan allar hellur.

Í Kína, gengur lögreglan vopnlaus um göturnar ... á þessu litla krummaskuði úti í Atlantshafi, þurfa menn hríðskotabyssur, í skottinu. Þetta eru kanski allt saman bara þorskar og sauðir á landinu, þörf á algeru lögregluríki yfir þessum sauðahóp ...

[Halldór Egill Guðnason, 28.10.2014 kl. 13:03]

Bjarne getur varla verið meira en fimm ára.