Hver var nú glæpurinn í Gálgahrauni?

Ekki verður séð að það sé brýnt forgangsverkefni lögregluyfirvalda að ákæra borgara landsins fyrir friðsamleg mótmæli. Vafalaust hefur það verið tímafrekt fyrir lögreglu að þurfa að mæta ítrekað í Gálgahraun til að bera mótmælendur af svæðinu, en er ekki óþarfi að láta ólundina vegna þessa leiða til ákæru?

Þannig byrjar Kolbrún Bergþórsdóttir, blaðamaður á Morgunblaðinu, afar góða grein í dálknum Pistill í blaðinu í morgun. Hún ræðir um ákærurnar gegn mótmælendunum í Gálgahrauni, þessum sem ekki fóru að fyrirmælum lögreglu.

Yfirleitt er það þannig að okkur ber að fara eftir því sem lögreglan segir, hún er valdið og hefur undir vissum kringumstæðum leyfi til að taka á borgurunum. Kolbrún bendir hins vegar á muninn á friðsamlegum mótmælendum í Gálgahrauni og fólki í búsáhaldabyltingunni svo er oft nefnd. 

Samkvæmt orðum Kolbrúnar er staðreyndin þessi og undir það má með henni:

Mótmælendur í Gálgahrauni veittust ekki að lögreglumönnum, köstuðu ekki í þá steinum eða hrópuðu að þeim svívirðingar, eins og fólk gerði í búsáhaldabyltingunni – og komst upp með það. Þetta fólk sat á steini úti í hrauni eða lá þar í makindum og neitaði að færa sig, sem var óneitanlega óþægilegt fyrir þá sem unnu þar að framkvæmdum. Lögreglan mætti svo á svæðið og bar fólk burt meðan ljósmyndarar og kvikmyndatökumenn fjölmiðla kepptust við að ná sem bestum myndum.

„Glæpur“ fólksins í Gálgahrauni er á máli lögreglunnar „að brjóta gegn valdsstjórninni“. Vissulega var farið gegn skipunum hennar. Yfirstjórn hennar er með ólund enda fengið afar slæma kynningu vegna meðferðar á mótmælendunum. Hún heldur að lögsókn gegn friðsömum mótmælendum lagi stöðuna eitthvað. Því miður er það ekki svo. Því meir sem hún spriklar sekkur hún dýpra í kviksyndið.

Löggan veit að ef málið heldur áfram og fer fyrir dóm verður niðurstaðan létt áminning og skilorðsbundinn dómur nema því aðeins að málatilbúnaðurinn ónýtist og málinu verði vísað frá. Dómurinn verður aldrei sú fyrirbyggjandi aðgerð sem venjulega liggur til grundvallar ákæru saksóknara.

Svo er það hitt að lögreglan er í vanda. Hún hefur áttað sig á því hversu heimskuleg þessi lögsókn er en getur ekki bakkað út úr henni.

Samanburðurinn á mótmælendum í Gálgahrauni og grjótkösturum, brennuvörgum og ofbeldismönnum á Austurvelli haustið 2008 er mikill. Þess vegna er það mikil ávirðing á lögregluna að hengja Gálgahraunsfólkið en láta glæpahyskið sleppa.

Athugasemdir

[Ómar Ragnarsson, 30.1.2014 kl. 11:03]

Það var fáránlegt að loka umferð venjulegra borgara um Álftanesveg, koma með 60 manna flokk lögreglumanna í skotheldum vestum með gasbrúsa, handjárn og kylfur í fylgd stærsta skriðbeltatækis á Íslandi, sem sást bara þennan eina dag þarna, þegar það nægði að bera mig og aðra sem ekki hreyfðum legg né lið "um set" og láta þar við sitja.  

Hvað þá að fara með okkur inn í lögreglubíl, neita okkur um að spenna bílbelti og færa okkur í fangaklefa.

Með þessu var brotin lagaregla um meðalhóf, sem lögreglunni ber að fara eftir.

[Ásthildur Cesil Þórðardóttir, 30.1.2014 kl. 11:44]

Þetta mál er lögreglu og yfirvöldum til háborinna skammar og eins og Kolbrún bendir á, þeir geta ekki bakkað út núna, það hlýtur að svíða inn að beini.

[Jón Þórhallsson, 30.1.2014 kl. 12:26]

Með lögum skal land byggja/er það ekki?

19. gr. laganna, með því að hafa “ [...] neitað að hlýða ítrekuðum fyrirmælum lögreglu um að flytja sig um set [...]“ .

=Lögreglan er bara að vinna sína vinnu.

=Ef fólk er eitthvað ósátt þá ætti fólk að flykkja sér um AÐRA STJÓRNMÁLAFLOKKA sem hafa aðra stefnu í þessu máli; er það ekki?

[Sigurgeir Jónsson, 30.1.2014 kl. 18:07]

Grein Kolbrúnar ber með sér að hún telur beinlínis að sumir þegnar þjóðfélagsins þurfi ekki að fara að fyrirmælum lögreglu.Hún telur upp þá elítu sem hún telur yfir lög landsins hafin.Þetta er miskilningur hjá Kolbrúnu og fleirum að einhverju máli skipti að fólk sé rithöfundur, listmálari,prófessor,eða heiti Ómar Ragnarsson,Kolbrún Bergþórsdóttir,Sigurður Sigurðarson eða eitthvað annað,sé kona en ekki karl, sé gamall en ekki ungur, kalli sig hraunavin, eða hundavin,umhverfisverndarmann eða óvin náttúrunnar.Allir skulu jafnir fyrir lögum samkvæmt stjórnarskrá.Fólkið sem var að koma í veg fyrir framkvæmdir var ekki handtekið vegna þess að það var að mótmæla.Það var handtekið vegna þess að það var að leggast fyrir vinnuvélar og stöðvaði með því framkvæmdir. Það veitir engum forgang að stöðva vinnu að hann kalli sig moldar, eða álfavin og sé smásagnarithöfundur.

[S i g u r ð u r S i g u r ð a r s o n, 30.1.2014 kl. 20:29]

Ekki gleyma þátttakendum í búsáhaldabyltingunni, Sigurgeir. Hvers vegna voru þeir ekki kærðir sem til dæmis slösuðu fólk og skemmdu eignir í opinberri- og einkaeigu?