Össur reynir að réttlæta ár sín sem ráðherra

Allt síðasta kjörtímabil var þrýst á síðustu ríkisstjórn að taka á skuldastöðu heimilanna. Ríkisstjórnin hlustaði ekki, taldi sig vita betur hvað þjóðin vildi. Hún lagði upp með gjaldþrotaleið fyrir almenning og því fylgdi eingöngu atvinnuleysi. Í dag spretta þeir fram fyrrum ráðherrar og áður þingmenn stjórnarmeirihluta og hafa allan skilning, þekkingu og vilja til að bjarga almenningi. 

Þeirra á meðal eru Össur Skarphéðinsson, þingmaður og fyrrum ráðherra. Skyndilega er skilningurinn fyrir hendi hjá honum.

Í vitali í þættinum Sprengisandur á Bylgjunni í gær og sagt er frá í Morgunblaðinu í dag ræðst Össur undir hinni rauðu kratarós á fyrrum forsætisráðherra og formann Samfylkingarinnar og Steinrím J. Sigfússon, fyrrum alltmögulegt ráðherra og formann Vinstri grænn. Þessi tvö lögðust gegn öllum góðum málum sem Össur hugsaði en lagði aldrei til.

Um leið og lið eins og Össur reyna að gera upp fjögurra ára kjörtímabil vinstri stjórnar glittir í „besserwisserinn“, þá sem allt vita best og kunna. Þeir ráðast með offorsi á núverandi ríkisstjórn sem þó gerir á hálfu ári allt það fyrir heimilin í landinu sem Össur og félagar ætluðu að gera á fjórum árum.

Valt er að treysta á minni Össurar. Hann og félagar hans voru næstum því ... búnir að hjálpa heimilunum í skuldavanda þeirra.

Hann man hins vegar ekkert eftir Icesave rugli síðustu ríkisstjórnar, ekkert eftir stjórnarskrármálinu sem var ríkisstjórninni til skammar, landsdómsmálinu sem er stærsta einelti sem um getur í íslenskum stjórnmálum. Og hann man ekkert eftir því að ríkisstjórnin skrökvaði (... jæja, beinlínis laug) að þjóðinni um aðlögunarviðræður að ESB, héldu því fram og gera enn, að hægt væri að gera samning um aðildina að ESB.

Og það sem Össur man skilgreinir hann allt á nýjan hátt undir hraðsoðnu orðalagi manns sem með félögum sínum gerði meira ógagn fyrir Ísland en fæstum hefur áður tekist. Hafi einhvern tímann verið ástæða til að setja upp rannsóknarnefnd á Alþingi þá er ágætt tilefni til að fara ofan í saumanna á verkum síðustu ríkisstjórnar.

Annars var það ágætt sem Steingrímur J. Sigfússon segir á forsíðu Moggans í morgun, hann fær þó prik fyrir það:

Í öðru lagi ætla ég ekki að láta toga mig út í það að fara að taka þátt í rökræðum við einhverja sem vilja búa til þá mynd af sér að þeir hafi viljað vera betri en aðrir í fyrrverandi ríkisstjórn.

Er þetta ekki málið í hnotskurn? Sá sem veit upp á sig skömmina heldur því fram að fyrrum ráðherrar eigi að standa saman og taka þannig afleiðingum gjörða sinna og aðgerðaleysis. 

 

Samfylking fari í naflaskoðun

Athugasemdir

[Halldór Egill Guðnason, 30.12.2013 kl. 10:46]

Beinlínis ömurlegt að fylgjast með því hvernig Össur hagar sér. Ekki það, að hegðun hans komi mikið á óvart. Dæmigerður tækifærissinnaður tjórnmálamaður, sem sér aldrei til sólar í einu eða neinu. Hann hlýtur að stefna á að ryðja Árna Páli úr formannssætinu og taka völdin í SF.

[S i g u r ð u r S i g u r ð a r s o n, 30.12.2013 kl. 10:53]

Eru þessir menn sem sátu í síðustu ríkisstjórn búnir að gera út um pólitíska framtíð sína, Halldór.

[Halldór Egill Guðnason, 30.12.2013 kl. 11:16]

Miðað við málflutning þessara kappa, sem sátu í síðustu ríkisstjórn, virðist ekki vera mikið fararsnið á þeim úr hérlendri pólitík, því miður.

[S i g u r ð u r S i g u r ð a r s o n, 30.12.2013 kl. 11:23]

Rétt, en sem betur fer er valdið hjá kjósendum en ekki stjórnmálamönnunum sjálfum.