Þolinmæði fólks að bresta eða er ríkisstjórnin með lífsmarki

Styrmir Gunnarsson, fyrrverandi ritstjóri Morgunblaðsins mælir oftast heilt. Á yfirvegaðan hátt skoðar hann það sem gerist í stjórnmálum og tjáir sig á hófsaman hátt í Evrópuvaktinni. Þar segir hann nýlega:

Þótt margt hafi breytzt í pólitíkinni og starfsemi launþegasamtaka hefur það þó ekki breytzt að launaþegafélögin eru enn hliðhollari vinstri stjórnum og andvígari samstjórnum Sjálfstæðisflokks og Framsóknarflokks.

Framundan er gerð nýrra kjarasamninga og framvinda mála á þeim vettvangi að undanförnu hefur ekki beinlínis ýtt undir að skynsemin ráði för. Ákvörðun kjararáðs um launabreytingar hjá forstöðumönnum ríkisstofnana á þar hlut að máli. Sömuleiðis bónusgreiðslur í Landsbanka Íslands, þótt dreifing hlutabréfanna til allra starfsmanna hafi dregið úr gagnrýni á þann gjörning,

Ný ríkisstjórn naut almennrar velvildar í fyrstu en vegna þess að lítið hefur frá henni heyrzt er þolinmæði fólks að bresta.

Valdi ríkisstjórnin verulegum vonbrigðum vegna aðgerðarleysis eða stefnuleysis er hættan sú, að kjarasamningar fari úr böndum og að launþegasamtökin standist ekki freistingar sínar. Það er mikilvægt að ráðherrar geri sér grein fyrir því andrúmslofti, sem er að verða til í kringum þá. Það getur gerzt á ótrúlega skömmum tíma að ráðherrar missi jarðsamband.

Ríkisstjórn Sjálfstæðisflokksins og Framsóknar hefur nú verið við völd í tæpa þrjá mánuði og við bíðum lausna.

Tvær sögur eru á kreiki. Sú fyrri er að ríkisstjórnin sé ekki með lífsmarki þó ráðherrar og stuðningsmenn hennar á þingi séu enn í fullu fjöri. Sú síðari hermir að innan skamms komi ríkisstjórnin með pakka sem inniheldur allar nauðsynlegar aðgerðir vegna skuldastöðu heimilanna, atvinnuleysis, efnahagsmála, fjárfestingar og annars sem á að losa þjóðina úr afleiðingum hrunsins og frostsins sem síðasta ríkisstjórn leiddi yfir okkur.

En guð hjálpi ríkisstjórninni og þó miklu frekar þjóðinni gangi sú síðari ekki eftir. það er nefnilega rétt sem Styrmir Gunnarsson segir í fyrirsögn pistils síns á Evrópuvaktinni: „Þolinmæði fólks er að bresta“.

Athugasemdir

[Óli Már Guðmundsson, 8.8.2013 kl. 09:23]

Ég hef ekki tekið eftir að hér sé nein stjórn, með ólíkindum að eftir öll loforðin sem áttu að koma til framkvæmda helst daginn áður en þeir tóku við sjást engin. Verra er að frá myndun stjórnarinnar hafa þeir verið í sumarfríi, gæti það hafa verið 100 daga aðgerðalistinn. Eina sem heyrist er þegar fjölmiðlar flytja fréttir af ráðherrum og þingmönnum spóka sig erlendis eða á hátíðum hingað og þangað um landið. Þessi stjórn hlítur að fara að fá verðlaun fyrir að koma minnstu í verk allra ríkisstjórna fyrstu 100 daga við völd.

[Eyjólfur Jónsson, 8.8.2013 kl. 22:04]

Ekki förum við nú að verðlauna þessa púka, en það er kominn tími á okkur Strákana að koma af stað byltingu og sópa út hyskinu og koma alvöru fólki í stjórn landsins.

[Jón Ingi Cæsarsson, 9.8.2013 kl. 06:50]

Ertu búinn að gleyma hruninu.  2007-8?