Rannsóknin gengur vel, þeir fundu húfu ...

Fréttin er um að húfa sem strokufangi kann að eiga hafi fundist. Með réttu ætti fréttin að fjalla um slaka öryggisgæslu á Litla-Hrauni, ómögulegt skipulag lögregluyfirvalda sem þremur dögum eftir að maðurinn strýkur eru loksins komnir með mannskap til að kanna hvernig hann komst út.

Húfan hans er utan girðingar en getur nokkuð verið að maðurinn sé enn innandyra. Á ekki eftir að leita þar? 

Svona vinnubrögð ganga ekki. Strok fanga er ekki hversdagslegur atburður heldur háalvarlegt vantraust á kerfið. Í þokkabót reyna yfirvöld að trylla landsmenn með því að vara fólk við strokumanninum, segja hann stórhættulegan og ekki megi nálgast hann á neinn hátt.

Hvað er að gerast í fangelsismálum landsins? Hvað er lögreglan að hugsa þegar hún loks þremur dögum eftir strokið birtist við girðingar Litla-Hrauns og með ljósmyndara Morgunblaðsins og líklega fleiri fjölmiðla með sér. Og á myndinni stendur liðið og patar höndum út í allar áttir. Hvaða jólasveinar eru þetta? Jú, Geiri, Grani, Gáttaþefur og Bjúgnakrækir eða hvað?

Er þetta fagmennskan hjá lögreglunni eða bara ómerkilegur PR áróður? Og hvað eru björgunarsveitarmenn að gera á staðnum? Sjá þeir um rannsókn málsins? Þvílík rugl sem þetta mál er allt komið út í.

Þegar stórhættulegur glæpamaður hefur ekki fundist á þriðja degi er ástæða til að spyrja hver beri ábyrgðina og hvernig sú ábyrgð er öxluð. 

Líklega verður þeim Geira og Grana sagt upp störfum í einn eftirmiðdag.

Húfa Matthíasar fundin

Athugasemdir

[Hvumpinn, 19.12.2012 kl. 16:04]

Sammála hverju orði og að blanda björgunarsveitunum í lögregluverkefni er hreint rugl.

En svo er stjórnarseta VG og sér í lagi Ögmundar búin að ganga nærri öryggiskerfinu að það er komið að fótum fram.

En RÚV tiltók sértaklega að Margrét Frímannsdóttir væri á staðnum.  Það er nú aldeilis gott, en er þetta ekki annars vinnustaður hennar?

Húfan hefði náttúrulega átt að finnast korteri eftir að mannsins var saknað.  Hver var að fylgjast með úti? Er sá enn í vinnu?

[S i g u r ð u r S i g u r ð a r s o n, 19.12.2012 kl. 16:06]

Nei, þeir eru allir úti af því að þar fannst húfan. Fanginn er líklega í kústaskápnum á annarri hæð til hægri við hliðina á skrifstofu Margrétar ...

[corvus corax, 19.12.2012 kl. 16:37]

Var að frétta eftir traustum heimildum að tannbursti sem talinn er tilheyra strokufanganum hafi fundist í glasi inni á baðherbergi skammt frá klefanum hans. Lögreglan ályktar að hann hafi ekki ætlað að vera lengi fjarverandi fyrst hann tók ekki tannburstann með sér. Til öryggis eru verslunareigendur á suðvestur horninu beðnir að hafa augun hjá sér ef einhver kaupir tannbursta, sérstaklega ef um unga karlmenn er að ræða.

[S i g u r ð u r S i g u r ð a r s o n, 19.12.2012 kl. 16:39]

Þessi var góður ...!