Hörmuleg frammistaða Brynjars Níelssonar

Ég varð fyrir miklum vonbrigðum. Hlustaði á þáttinn „Í vikulokin“ á Ríkisútvarpinu. Þar var meðal annarra Brynjar Níelsson, gamall vinur minn sem náði góðum árangri í prófkjöri Sjálfstæðisflokksins í Reykjavík um daginn.

Ekki veit ég hvað hefur komið fyrir Brynjar en slakari árangur upprennandi stjórnmálamanns þekki ég ekki. Hann lét því ómótmælt er Ágúst Þór Ágústsson, samfylkingarmann, hélt því fram óátalið að ríkisstjórnin hefði staðið sig afburða vel vegna skuldastöðu heimilanna, verðtryggingunni, afskriftum lána og það væri allt lygi sem ASÍ, SA, Hagsmunasamtök heimilanna, stjórnarandstaðan og fjöldi annara hefðu fært rök fyrir.

Ekki hrökk upp úr Brynjari eitt orð þegar Ágúst fullyrti að hér væri allt með öðrum og betri blæ ef við værum í ESB og notuðum Evruna.

Hið eina sem Brynjar virtist hafa einhverja meðvitund um var um lögfræðileg málefni sem þó mátti misskilja hrikalega eins og gagnrýni hans á embætti sérstaks saksóknara. Hann veit líklegast ekki að þessu embætti var komið á fót fyrir atbeina Geirs H. Haarde og Björns Bjarnasonar. Í þokkabót fór hann að tala um verðtrygginguna og hélt því fram að verðtrygginguna væri líklegast ekki hægt að afnema. Svona úrtölur ganga hreinlega ekki.

Sjálfstæðismenn gera þá kröfu til forystumanna sinna að þeir séu vel að sér í sem flestum málum og verji þann málstað sem þeim er trúað fyrir. Það er einfaldlega ekki nóg að ná góðum árangri í prófkjöri og þegja svo þar á eftir eins og Brynjar og margir aðrir gera.

Krafan er sú að þeir afli sér þekkingar og læri þá einföldu aðferð að rökræða í viðtalsþáttum í fjölmiðlum.

Hér hef ég gagnrýnt Brynjar harkalega en það er einungis vegna þess að hann þarf að fá á sig gagnrýni ef hann stendur sig illa. Nóg er af já-fólkinu í kringum hann og þeir munu áreiðanlega mótmæla þessum pistli. En sá er vinur sem til vamms segir.

Athugasemdir

[Árni Gunnarsson, 15.12.2012 kl. 13:13]

Ég fylgdist ekki með þessum þætti.

Ég hef óskaplega lítið álit á pólitík sjálfstæðismanna.

Ég hef mikið álit á Brynjari Níelssyni sem glöggum lögmanni.

Það er eftirbreytnisvert þegar flokkshollir menn eins og þú þora að tjá sig af einurð og hreinskilni um frammistöðu pólitískra samherja í framlínu flokksins eins og þú gerir núna Sigurður.

Og þótt lof mitt sé léttvægt þá máttu vita að það hlýtur þú svo sannarlega fyrir þennan pistil.

Bestu kv.

[Ómar Geirsson, 15.12.2012 kl. 13:43]

Blessaður Sigurður.

Hefur ekki hvarflað að þér að forysta flokksins, sem réttilega hjá þér segir ekki mikið, að hún sé ekki ósátt við stefnu ríkisstjórnar Jóhönnu Sigurðardóttir???

Aðgerðarplan AGS var hornsteinn stefnu hennar lýsti Jóhanna yfir á fyrsta blaðamanni fundi bráðabirgðastjórnar hennar sem mynduð var í feb 2009, AGS hefur síðan reglulega hrósað árangrinum, núna síðast í fréttum Ruv í dag.

Má ekki færa rök fyrir að sá sem segir fátt, ætli að vinna kosningasigur út á óvinsældir ríkisstjórnar Jóhönnu en ekki út nýjar áherslur í efnahagsmálum.

Er ekki slakur árangur þeirra, sem töluðu fyrir skuldaleiðréttingu, í prófkjörum flokksins vísbending þar um???  Svo dæmi sé tekið.

Allavega hafið þið sjálfstæðismenn ekki langan tíma til að velta þessu fyrir ykkur, gangi þér vel með þessa umræðu Sigurður.

Kveðja að austan.

[Rafn Guðmundsson, 15.12.2012 kl. 14:01]

Engin ástæða fyrir okkur JÁ menn að mótmæla þessu hjá þér. Þetta var mjög fróðlegt að lesa. Sjaldan eða aldrei heyrt svona áður:

„Sjálfstæðismenn gera þá kröfu til forystumanna sinna að þeir séu vel að sér í sem flestum málum og verji þann málstað sem þeim er trúað fyrir“

Skítt með sannfæringuna

Hin dæmin þín tvö er ekkert meira um að segja

[S i g u r ð u r S i g u r ð a r s o n, 15.12.2012 kl. 15:50]

Rafn, þetta er útúrsnúningur. Menn eru varla í pólitík ef þeir hafa ekki sannfæringu fyrir málstað þess stjórnmálaflokks sem þeir þó styðja.

Ómar, þetta má alveg til sanns vegar færa hjá þér. Hins vegar hefur núverandi forysta Sjálfstæðisflokksins gagnrýnt ríkisstjórnina svo hart að hún kveinkar sér. Má bara nefna þingmenn eins og Guðlaug Þór Þórðarson, Pétur Blöndal, Jón Gunnarsson og fleiri og fleiri. Nei, menn eiga ekki að þegja í stjórnmálum. Afla sér upplýsinga og berjast fyrir því sem rétt er og sanngjarnt.

Árni, þú hefur nú oft gagnrýnt mig, en alltaf er kærkomið að fá hrós frá þér. Hins vegar hef ég mikið álit á Brynjari en ætla þó að leyfa mér að gagnrýna þá félaga mína sem ekki standa undir þeim frama sem þeir hafa öðlast.

[Svenni, 15.12.2012 kl. 20:24]

Jú jú, rétt hjá pistlahöfundi að allt var þetta meira og minna rangt hjá Brynjari, en hann er þó á réttu róli varðandi nektarstaðina, vændið og sönnunarfærslu gagnvart glæpamönnum, (þ.e. sýkna þá alla).

Sjáið fyrir ykkur piltar, Brynjar verður dómsmálaráðherra, Tryggvi Þór verður fjármálaráðherra og Bjarni Ben verður forsætis. Þvílíkt sóma lið. Getur Árni Johnsen ekki fengið eitthvað feitt og gott embætti, eins og hann á skilið?