Skrýtinn gígur við Skarðsheiði

Hann er furðulegur þessi gígur sem er á myndinni. Var að skanna slides-myndir og rakst þá á þessa. Myndin er tekin haustið 1981 í flugferð sem Arngrímur Jóhannsson, flugstjóri, sem þá var starfandi hjá Arnarflugi. Hann var í áætlunarflugi til Gjögurs og fannst einhvern veginn tilvalið að bjóða mér með.

Ég tók fjölda mynda í ferðinni, fæstar af þeim voru af nokkru gagni og notaði ég þær aldrei í útgáfu á tímaritinu Áfangar sem ég var með á þessum tíma en hafði þó ætlað mér það.

Svo fann ég þessa í gær. Gígurinn vakti athygli mína. Myndin er tekin skammt austan við Blákoll sem er fallegt fjall sunnan við Hafnarfjall í Leirársveit. Horft er til suðausturs og þarna er Skarðsheiði, Hvalfjörður og Botnsúlur.

Á litlu myndinni, sem tekin er úr kortasjá LMÍ, er gígurinn lengst til hægri. Nauðsynlegt er að smella nokkrum sinnum á myndina til að fá hana í góða stærð. Þá sést afstaðan miðað við þjóðveginn, en hann er lengst til vinstri.

Ég varð strax dálítið spenntur og fór að ímynda mér tóma vitleysu. Fyrst datt mér í hug að þetta væri gígur eftir loftstein, en það getur nú varla verið. Svo róaðist ég. Líklegast er þetta forn gígur frá því land var þarna í mótun. Samkvæmt korti er gígurinn sporöskjulaga. Um 160 metrar á skammveginn og rétt rúmlega 200 á þann lengri.

Ekki veit ég hvort gígurinn hafi eitthvað nafn en vonandi er einhver sem þekkir betur til og sendir mér línu í athugasemdadálkinn. Á eftir að ganga á Hafnarfjall og Blákoll og þá er gígurinn í seilingarfjarlægð.

Athugasemdir

[Brynjólfur Þorvarðsson, 6.7.2012 kl. 07:40]

Sæll Sigurður

Nú hef ég gengið talsvert á þessu svæði án þess að verða var við þennan gíg enda tekur maður sjálfsagt helst eftir honum á korti eða úr lofti (og þá er hann mjög greinilegur!).

Þetta er þó varla gígur í hefðbundinni merkingu, hvorki eftir eldgos né loftstein. Ef ég man rétt þá vantar þarna eina tvo kílómetra af jarðlagastafla ofaná sem ísaldarjöklar hafa rifið í burtu.

Þetta gæti verið óvenju stór gígtappi með mýkri kjarna, mishröð veðrun hefur svo skilið eftir sig gíglögunina. Af kortinu að dæma er "gígurinn" opinn til norð-vestur með n.k. "farvegi" þar sem efni gæti hafa skolast út. En best væri auðvitað að skoða þetta nánar.

Ég prófaði að skoða þetta í Google Maps, þar getur maður horft á fyrirbærið "frá hlið" úr vestri og þá líkist það reyndar frekar bergskriði en nokkru öðru. Þarna er mikið móberg (þetta er innan gamallar , mjög stórrar öskju) og svo gæti virst sem hálfhringlaga stykki hafi losnað úr fjallsbrúninni og skriðið fram til norð-vesturs og stöðvast þar. Úr lofti lítur þetta út eins og gígur, en frá hlið meira eins og stór sylla í fjallsbrúninni.

Ekki á ég heimangengt á næstunni til að skoða fyrirbærið en það gæti orðið næsta sumar, svæðið er óneitanlega skemmtilegt og fjallamyndanir norðan Blákolls og austan Hafnarfjalls eru mjög sérstakar.