Eru Húnavellir í eða á Svínavatni?

Varla munu Húnvetningar samþykkja upphaf þessarar frétta enda skjöplast Mogganum mínum enn einu sinni í landafræðinni og það ekki í fyrsta sinn. 

Húnavellir eru að minnsta kosti rúman einn kílómetra frá strönd Svínavants eins og glögglega má sjá á meðfylgjandi korti frá Samsýn á ja.is. Gula línan er mælilína sem ég setti inn á kortið og er nákvæmlega 1,15 km.

Fyrir utan þessa meinlegu villu er ekki hægt að segja að „vélsleðamaður hafi farið niður um ís á Svínavatni á Húnavöllum“ nema því aðeins að Húnavellir séu á ísnum eða fljótandi á vatninu sem er vissulega ekki reyndin.

Svo efast ég um að lesendur viti hvað F1-Rauður er, því sagt er að björgunarsveitir„voru kallaðar út á F1-Rauðum þar sem óttast var að maðurinn myndi kólna hratt niður í vatninu.“ Kannski er sá rauði bíll, fjórhjól eða jafnvel snjóbíll. Hver veit?

Hitt er nokkuð auðskiljanlegt að sá sem fellur í vök á ísilögðu vatni mun án efa kólna mjög hratt (hvorki upp né niður). 

Annríki hjá björgunarsveitum

Athugasemdir

[Þorsteinn H. Gunnarsson, 24.3.2012 kl. 19:01]

Eðlileg málvenja væri segja að vélsleðamaðurinn hefði farið niður um ís fyrir landi Reykja en það er jörðin sem liggur þarna að Svínavatni.

Húnavellir er hinsvegar grunnskóli sem Húnavatnshreppur rekur og stendur á Reykjajörðinni.

Á árunum 1986-1999 bjó ég á jörðinni. Oft fór ég ríðandi út á vatnið og veiddi niður um ís. Þá þarf maður alltaf að vera sér meðvitaður um þykkt íssins.

Þegar komið er fram á þennan tíma er varhugavert að vera ferðast á ísnum sérstaklega ef hlýindi hafa verið.

Aftur á móti er röng staðsetning af Jörundarþúfu þarna en hún sýnist út í vatni en á að vera nær merkjum Orrastaða og Reykja.

[S i g u r ð u r S i g u r ð a r s o n, 24.3.2012 kl. 20:19]

Kortið vill oft hliðra til örnefnum þegar sú.mmad er inn í það.

[Stefán Júlíusson, 24.3.2012 kl. 21:00]

Hvað merkir eiginlega F1-rauður?

[S i g u r ð u r S i g u r ð a r s o n, 24.3.2012 kl. 21:15]

Frá Neyðarlínunni: http://www.112.is/neydarlinan/neydarthjonusta/f1-f2-f3/:

Greiningin F-1, F-2 og F-3 er notað í öllum tilfellum við greiningu á neyðaratvikum, hvort sem er slys, eldur eða veikindi.

F stendur fyrir FORGANGUR og númeraröðin stendur fyrir mikilvægi.

Rauður, gulur og grænn er viðbót í boðun, aðallega vegna björgunarsveita.

Hér er stutt samantekt yfir almenna forgangsskiptingu í boðun viðbragðsaðila í gegnum 112.

F-1 Rauður

Forgangur 1 Rauður, er aðgerð sem skv. hjálpargögnum neyðarvarða er metin í efsta forgang og sem lífsógn. Sjúkrabíll og/eða annað björgunarlið er sent í forgangsakstri. T.d. þar sem allt tiltækt björgunarlið væri með aðkomu, stóreldur, fjöldaslys eða einstaklingsslys með alvarlegum áverkum.

F-2 Gulur

Forgangur 2 Gulur er aðgerð sem skv. hjálpargögnum neyðarvarða er metin í næst efsta forgang. Sjúkrabíll og /eða annað björgunarlið er sent í forgangsakstri en aðeins í atburði án lífsógnar.

F-3 Grænn

Forgangur 3 er aðgerð sem skv. hjálpargögnum neyðarvarða er metin til afgreiðslu strax en án forgangs. Aðeins viðeigandi hluta björgunarliðs er kallaður, staðbundin aðgerð sem krefst hvorki forgangs eða fjölda manns.

[Stefán Júlíusson, 24.3.2012 kl. 21:20]

Þakka þér fyrir upplýsingarnar.

Nú veit ég hvar ég á að skoða þetta.

Ég þekki landið ekki nógu vel.  Líklega ekki margir sem þekkja allt landið og hvaða staðir eru í hvaða sveit.

Það væri samt sem áður frábært ef fréttamenn myndu spyrja ákveðnar spurningar svo það komi rétt fram í fréttunum þeirra.

[S i g u r ð u r S i g u r ð a r s o n, 24.3.2012 kl. 21:26]

Fór aðeins inn á bloggið þitt, Stefán. Vil í því sambandi benda á að atvinnuvegurinn sem byggir á þjónustu við ferðafólk nefnist einfaldlega ferðaþjónusta. Ferðaiðnaður er hins vegar ekki til enda orðið „iðnaður“ á íslensku ekki í samræmi við „industry“ á ensku. Ferðaþjónusta er bæði fallegt og lýsandi orð og ég held að það sé almenn ánægja með það.

[Stefán Júlíusson, 24.3.2012 kl. 21:39]

Sigurður, ég skrifaði í einni athugasemd af hverju ég skrifa ferðaiðnaður.

þjónusta og framleiðsla = iðnaður.

Ég skoða þetta í náinni framtíð.