Búið að reita foreldra til reiði og ekki von á góðu

Án stefnuskrár náði Jón Gnarr og flokkur hans kjöri í borgarstjórn Reykjavíkur og stofnaði til meirihlutasamstarfs við Samfylkinguna. Tæpu ári síðar mótmælir blómi Reykjavíkur, foreldrar barnanna í skólum borgarinnar, stefnuleysi þessara sömu aðila.

Er þetta ekki nöturlegt? Nýr flokkur kemur fram, býður upp á nýtt og án efa gott fólk en hefur nú ekkert fram að færa nema reita þá til reiði sem síst skyldi og það vegna smáaura. Stefnuleysið er algjört, engin stefnuskrá til að vinna eftir, ekkert nema grínið sem lagt var upp með en hefur nú snúist upp í andstæðu sína rétt eins og nafn flokksins. 

Gerir borgarstjórnarmeirihlutinn sér ekki grein fyrir því hversu mikilvægir foreldrarnir eru fyrir borgina, fyrir allt samfélagið? Þetta er hvorki meira né minna en fólkið sem býr til börnin, elur þau upp, er kjarninn í efnahag samfélagsins, uppistaðan í atvinnulífinu, stefnumótendur framtíðarinnar svo eitthvað sé nefnt.

Enginn ætti að reyna að gera þetta fólk að fífli. Það lætur hvorki Gnarr né aðra fikta í framtíð barnanna sinna, til þess er þeim málið allt of skylt.

Og reynsluleysi og glámskggni meirihlutans í borgarstjórn verður honum að falli því foreldrarnir eru svo fjölmennir að þeir geta dregið fram úr sínum röðum sérfræðinga á öllum sviðum. Meirihlutinn getur ekki einu sinni kallað til starfsmenn eða embættismenn borgarinnar sér til aðstoðar, því þeir eiga ekki nokkurn möguleika í að hrekja málstað foreldra. Best gæti ég trúað að stærsti hluti starfsfólks borgarinnar hafi einfaldlega megnustu andstyggð á framferði Gnarristanna, að minnsta kosti er það þannig með þá sem ég þekki og hef rætt við um þessi mál.

Samráð er samráð í orðsins fyllstu merkingu. Stjórn sveitarfélags, hvort sem það er lítið eða stórt, byggist á mildi en engu að síður festu. Lýðræði er ekkert annað en almennt samráð. Sé borgarsjóður blankur þarf að taka á þeim vanda á breiðum grundvelli og innan hans eru foreldar í borginni.

En er borgarsjóður blankur? Sjá menn fram á að hann verði blankur? Svarið er NEI. Borgarsjóður stendur ágætlega en hins vegar er sjálfsagt að hafa vara á sér á síðustu og verstu tímum.

Þess í stað veður Gnarrinn og félagar hans áfram án tillits til foreldra. Í skólum borgarinnar vofa yfir uppsagnir, mórallinn eru orðinn slæmur og enginn veit hvort hann fær að halda áfram störfum eða verði látinn hætta. Þetta eru ekki góðir stjórnunarhættir.

Tilraunastarfsemi borgarstjórnarmeirihlutans verður að linna. Í ljósi þess að ekki verður kosið til borgarstjórnar Reykjavíkur fyrr en eftir þrjú ár er ástæða til að beina þeirri ósk, sem svo margir Reykvíkingar bera í brjósti, til meirihlutans að Jón Gnarr og félagar hans hreinlega segi sig úr borgarstjórn og eftirláti öðrum stjórn borgarinnar.

Flestum er orðið fyllilega ljóst að Jón ræður ekki við starf sitt, hann hefur engan undirbúning undir það, leggur ekkert til og skilur fæst. Dettur einhverjum í hug að borgarstjórinn muni úr þessu ná að verða stefnumótandi í rekstri borgarinnar eða stjórnmálum?

Já, eitt hundrað milljónir eru ekki milljarður, en betra hefði verið að vita það fyrirfram.

Undirskriftir gegn breytingum

Athugasemdir

[Jón Sveinsson, 20.3.2011 kl. 15:59]

Sæll Sigurður

Vonandi notar fólkið reiði sína og segir nei við icesave sem borgastjóri vill klína á borgarana

[Guðlaugur Hermannsson, 20.3.2011 kl. 16:48]

Samfylkingin og Sjálfstæðismenn verða að taka saman höndum og mynda nýjan meirihluta. Dagur B Eggertsson er í fýlu út í Hönnu Birnu vegna ágreinings á fyrri stigum.

[S i g u r ð u r S i g u r ð a r s o n, 20.3.2011 kl. 17:00]

Núverandi borgarstjórnarmeirihluti ræður ekki við verkefnið. Gnarristarnir þurfa að hverfa úr borgarstjórn og þeir sem eftir eru eiga að taka höndum saman og mynda nokkurs konar „þjóðstjórn“ fram að næstu kosningum. Næg reynsla er fyrir hendi í þeim þremur flokkum sem eftir verða. Tími tilraunastarfsemi er liðinn. Meirihlutinn er einfaldlega vanhæfur svo gripið sé til kunnuglegs orðalags.

[Haraldur Rafn Ingvason, 20.3.2011 kl. 17:54]

Mér sýnist einna helst að Besti hafi hreinlega gengið í samfylkinguna... þetta er orðinn hálfgerður R-listi