Vondur, verri, verstur

Leiðtogahæfileika felast ekki í því að hafa setið áratugum saman á Alþingi. Mér finnst þó að formaður Vinstri grænna hafi sýnt ágæta leiðtogahæfileika sem formaður stjórnarandstöðuflokks í marga áratugi. Vonandi fær hann þá stöðu sem fyrst aftur. Sem fjármálaráðherra er'ann afleitur.

Einhvern veginn var formaður Samfylkingarinnar þess viss að hennar tími myndi koma sem formaður og hún fékk spá sína uppfyllta og gott betur. Hafi Jóhanna Sigurðardóttir verið góður þingmaður þá var hún slakari ráðherra og enn verri sem forsætisráðherra.

Vonbrigði þjóðarinnar með þessa tvo stjórnmálamenn eru mikil. Um það geta þeir borið vitni sem standa á Austurvelli og mótmæla stefnu ríkisstjórnarinnar. 

Sagði að tími Jóhönnu væri liðinn

Athugasemdir

[Helgi Þór Gunnarsson, 4.10.2010 kl. 23:10]

Sæll Sigurður, sannar þetta ekki þá kenningu mína að stjórnmálamenn ráða engu, það er að mér finnst vera embættismenn og auðvaldið, það er að segja þau sem eiga mikið að peningum og stjórna fyrirtækjum.

Kær kveðja frá Eyjum.

[S i g u r ð u r S i g u r ð a r s o n, 4.10.2010 kl. 23:36]

Eitthvað er til í þessu hjá þér, Helgi.

Ásta Möller fyrrverandi alþingismaður, hélt því fram í ritgerð sinni í almennri stjórnsýslufræðum, að annað hvort tæki sá sem skipaður er ráðherra yfir ráðuneytið eða það tekur hann yfir. Það sem hún á við er að ekki verða allir sterkir ráðherrar heldur láta ráðuneytið leiða sig frekar en að stefna þeirra ráði.

Svo er það þetta með aðvaldið ... Læt umfjöllun um það bíða seinni tíma, þú fyrirgefur.

[Helgi Þór Gunnarsson, 5.10.2010 kl. 11:07]

Sæll Sigurður, já ég fyrirgef þér, ég er þolinmóður.

Kær kveðja frá Eyjum.

[Guðjón Sigþór Jensson, 5.10.2010 kl. 22:50]

Sleggjudómur þinn um Steingrím sem fjármálaráðherra finnst mér ekki vera rökstuddur að neinu leyti. Líklega hefur enginn fjármálaráðherra landsins staðið frammi fyrir jafn miklum erfiðleikum og Steingrímur og á hann flest skilið betur en fremur léttvæga dóma einhvers hægri manns.

Aldrei stóðu fjármálaráðherrar Sjálfstæðisflokksins frammi fyrir jafn miklum erfiðleikum. Eg leyfi mér að líta á svona hjal sem meðmæli fyrir því að við eigum afburða fjármálaráðherra enda hefur Alþjóðagjaldeyrissjóðurinn borið honum vel söguna. Hins vegar er bönkunum stjórnað af últra hægri mönnum og þeir eiga skilið þá gagnrýni sem þú ættir að beina í rétta átt.

Mosi

[S i g u r ð u r S i g u r ð a r s o n, 6.10.2010 kl. 00:11]

Sæll, Guðjón, þökk fyrir innlitið. Niðurstaðan er engu að síður sú að allt sem skiptir máli hefur farið úrskeiðis hjá fjármálaráðherra nema það eitt að njörva framtak landsmanna í marvíslegar viðjar. Hvers vegna mótmælir fólk á Austurvelli, hvers vegna lagðist fólk gegn Icesave samningnum alræmda, hvers vegna mótmælir fólk landsbyggðarárásunum, hvers vegna eru þúsundir landsmanna atvinnulausir? Svona má lengi telja. Árangur ríkistjórnarinnar er enginn, hún kann ekki til verka og ekki heldur fjármálaráðherrann. Fólk vill hann í burtu en hann skilur ekki grasrótina.

Þetta eru ekki léttvægir dómar „einhvers hægri manns“. Þetta er álit almennings í landinu. Þetta er ekki „hjal“. Þetta er blákaldur sannleikurinn.

Tal þitt um „últra hægri menn“ er barnalegt. Það gengur ekki hjá þér að spyrða einhverja bankamenn við stjórnmálastefnu og reyna þar með að gera lítið úr skoðunum okkar sem framar öllu vilja að landinu sé vel stjórnað og komist sem fyrst úr kreppunni. Það er hvorki hagur hægri né vinstri manna að kreppan framlengist.