Fjölmiðlamenn gleypa við öllu

Góðan daginn Vörður varðstjóri. ég er með eitt smávægilegt vandamál. 

Lát heyra, Gáttaþefur, lögregluþjónn.

Jú, við vorum að rúnta um Selfoss í góða veðrinu í nótt og þá hittum við Nonna glæp. Hann benti okkur á að Logi lögbrjótur væri með maríjúana heima hjá sér. Auðvitað fórum við heim til Loga og tókum hann fastan. Og hvað heldurðu? Hann var bara með efnið uppi á stofuborði.

Það er nú aldeilis gott hjá þér Gáttaþefur, lögregluþjónn.

Já, þakka þér fyrir Vörður varðstjóri. Alltaf gott að fá hrós fyrir vel unnin störf þó launin séu lág. Hins vegar erum við í vanda með fréttatilkynninguna. Nonni glæpur setti það sem skilyrði að við segðum ekki frá því að hann hefði ljóstrað upp um Loga lögbrjót. Ella á hann það á hættu að Logi kjafti frá næst þegar Nonni brýtur lögin.

Auðvitað verðum við að virða nafnleynd heimildarmanna okkar. Hins vegar er þetta ekkert vandamál.

Gat nú skeð, Vörður varðstjóri. Þú ert alltaf með ráð undir hverju rifi.

Tja, maður er nú ekki fæddur í gær. Sko, nú skrifar þú fréttatilkynningu og segir í henni að tveir lögreglumenn hafi verið akandi á eftirlitsferð í góða veðrinu og þá hafi þeir bara fundið lyktina af 100 gr af maríjúnana!

Nei, getum við haldið því fram? Enginn trúir því að einhver geti fundið lykt af 100 gr efní gegnum hús og bíl ...

Jú, blessaður vertu. Þú heitir nú ekki Gáttaþefur fyrir ekki neitt. Segðu bara að lögreglumennirnir hafi ekið afar hægt og verið með gluggana opna af því að veðrið var svo gott. Og fjölmiðlafólkið gleypir við þessu eins lax flugu. Ég skal veðja að fyrir klukkan sjö verður komin frétt um þetta í mbl.is án nokkurra athugasemda. Og Rúv mun skemmta sér afar vel yfir þessu í morgunútvarpinu.

En verðum við ekki að passa okkur á helvítis bloggurunum, þeir gera örugglega athugasemdir.

Ertu eitthvað verri? Gáttaþefur lögreglumaður. Bloggarar eru bara kverúlantar sem enginn tekur mark á.

Runnu á lyktina af maríjúana

Athugasemdir

[Inga Sæland Ástvaldsdóttir, 20.7.2010 kl. 11:44]

heheh já góður, algjörlega hárrétt hjá þér. Stóri bróðir er með nafnlausa símann og ótrúlega margir samfélagsþegnar tilbúnir að klaga náungann. Svona er Ísland í dag.

[Vendetta, 20.7.2010 kl. 14:13]

Þú mátt alveg koma með fleiri sögur í þessum dúr.

[S i g u r ð u r S i g u r ð a r s o n, 20.7.2010 kl. 14:23]

Sko ... ef einhver heldur að ég hafi samið þetta þá er það mikill misskilningur. Fékk bara senda upptöku af þessu samtali frá Wikileaks. Get sannað það ef ég fyndi bannsetta upptökuna ...

[Vendetta, 20.7.2010 kl. 14:49]

Ég sagði ekki að þú hefðir samið söguna. Enda finnst mér ósennilegt að löggan skyldi hafa runnið á kannabislykt nema eftir að hafa fengið ábendingu og verið komin inn í stofuna hjá viðkomandi fólki.

[S i g u r ð u r S i g u r ð a r s o n, 20.7.2010 kl. 15:08]

Það væri ljóta málið ef löggan héldi að sagan væri uppspuni ...