Bannsvæði er hættulaust bannsvæði

Eyjafjallajökul ásamt hluta af Mýrdalsjökli hafa verið bannsvæði samkvæmt yfirlýsingu Almannavarna ríkisins frá 27. apríl. 

Samkvæmt orðana hljóðan er óheimilt að fara inn á svæðið nema í undantekningatilvikum. Þau tilvik hafa verið vegna rannsókna á gosinu.

Yfirvöld hafa hótað hörðu viðurlögum við öllum brotum á þessu banni.

Ég hef hingað til setið á mér og ekki ögrað yfirvöldum. Eina undantekningin byggist á misskilningi lögreglumanns sem brúkaði kjaft við og hélt því fram að ég hafi farið úr Básum þann 31. mars í trássi við bann. Þetta var tóm della í manninum.

Af hræðslu minni við refsingu hef ég eftir að gosið hófst í Eyjafjallajökli ekki farið inn eftir Þórsmerkurvegi, yfir Markarfljót né upp á Fimmvörðuháls og síst af öllu á jökulinn sjálfan. Hef þó langað, verið nær viðþolslaus ...

Annað hvort stendur bannsvæði undir nafni eða ekki. Skiptir þá engu máli hvort ég fari inn á svæðið til þess að afla mér upplýsinga og taka myndir eða einhverjir amrískir sjónvarpsmenn. Hættan eða hættuleysið er hið sama hver sem í hlut á.

Klukkan 16.40 voru að minnsta kosti fjórir bílar við jökulgarðana þar sem lónið var. Þeir sjást á meðfylgjandi mynd. Trúið því hver sem er að þarna séu einhverjir vísindamenn að snuðra. Þetta eru einhverjir sem annars vegar komust yfir Markarfljót við Þórólfsfell og hins vegar fólk sem fékk að fara inn Þórmerkurveg þrátt fyrir vöktun björgunarsveitarmanna.

Nú er ég ekki lengur hræddur við lögguna, almannavarnir, björgunarsveitir eða ljóta kallinn sem kyndir upp í Eyjafjallajökli. Ég er farinn á jökulinn sem ég þekki svo vel. Vill einhver koma með? 

 

Athugasemdir

[Helga R. Einarsdóttir, 1.5.2010 kl. 18:18]

Ég hef einu sinni gengið á þennan jökul, eða yfir hann, eða eitthvað af honum.

Alla vega lifði ég þá ferð af og þakka fyrir það, en held ég láti gott boð framhjá mér fara.

En ég veit vel að þetta er stórkostlegt að sjá og ef ég þyrfti ekki að labba heilan dag, hmm- já - þá kennski?

[Haraldur Halldór, 1.5.2010 kl. 20:12]

Ég kem  með, hvort er það jeppinn eða tveir jafnfljótir ?

Svona án gríns þá finnst mér það ekki alveg tímabært að hleypa fólki upp á jökul til að skoða gosið, í það minnsta ekki í návígi.

Er sjálfur alveg til í að skoða þetta og fór tvær ferðir á Fimmvörðuhálsinn til að skoða litla túristagosið sem var þar en geri mér grein fyrir að þetta gos er ekki alveg í sama flokknum og hef því setið heima og látið vefmyndavélar duga ( þær duga samt skammt).

 En þetta er slæmt fordæmi og eins og staðan er í dag á eiga fáir erindi þarna upp og allra síst bandarískt fréttateymi!