Skipulagðar gönguferðir á gosstöðvarnar úr Básum

Kominn tími til að Goðalandið verði opnað fyrir ferðalöngum. Gott til þess að vita að lögregluvakt verði á svæðinu en ég botna ekkert í því hvernig löggan ætlar að koma í veg fyrir að fólk fari sér að voða með því að staðsetja sig við mynni Hvannárgils og Hrunárgils.

Enginn gengur upp eftir Hvannárgili. Þeir sem vilja sjá hraunstrauminn ganga upp á Votupalla vestan við Útigönguhöfða og þaðan ofarlega í Hvannárgili þangað til komið er að Úthólmum þar sem hraunið er.

Sama á við með Hrunárgil. Hægt er að klöngrast niður í Ytra-Hrunárgil frá Foldum. Lögreglan getur einfaldlega ekki komið í veg fyrir að fólk fari sér að voða.

Hins vegar á lögreglan og björgunarsveitir að staðsetja sig við mynni Ytra-Hrunárgils og í Básum og vera þar til viðtals og viðvörunar. Staðreyndin er sú að hætt er við því að menn aki undir áhrifum um helgina.

Ferðamenn ættu hins vegar að nýta sér Útivist. Skáli félagsins í Básum verður opinn yfir páskana. Þaulkunnugir fararstjórar félagsins ætla daglega að bjóða upp á göngur upp að gosstöðvunum og á öryggum stöðum ofan Hvannárgils. Meðal annars er ætlunin að fara í kvöldgöngur.

Á myndinni eru fararstjórarnir Reynir Þór Sigurðsson (til vinstri) og Óli Þór Hilmarsson. þeir munu stjórna gönguferðum að gosstöðvunum og hraunfossunum um páskana.

Einnig mun Útivist bjóða upp á ferðir á Fimmvörðuháls frá Skógum og og þeim ferðum stjórna fararstjórar sem hafa mikla reynslu af ferðum um Hálsinn.

Þeir sem ekki þekkja til á þessum slóðum ættu tvímælalaust að nýta sér ferðir Útivisar frekar en að ana út í einhverja óvissu.

Litlar líkur á frekara gosi

Athugasemdir

[Guðmundur Ásgeirsson, 30.3.2010 kl. 14:11]

Nú er sagt að aðeins sé fært stórum rútum og breyttum jeppum, en hugsanlega er tekið svo sterkt til orða til þess að letja óreynda ökumenn á illa búnum bílum frá því að leggja í svaðilför. Það sama var nefninlega sagt um Emstruleiðina upp úr Fljótshlíð, að það væri bara jeppavegur, en ég fór þangað á Laugardaginn á fólksbíl og var í samfloti með fólki á smábíl sem komst langleiðina inn að Einhyrningi til móts við Húsadal hvaðan útsýnið var best.

Því spyr ég sem ekki veit, hversu mikið mál er fyrir vant fólk að komast inn í Þórsmörk? Er möguleiki að keyra að Steinholtsá eða Krossá og ganga þaðan annaðhvort í Bása eða Langadal? Er það löng ganga eða er jafnvel hægt að komast alla leið á fólksbíl? Ég spyr því að nú er mjög lítið í ánum vegna kulda og lítillar úrkomu undanfarið, en ég veit að í leysingum breytast þær í stórfljót.

Spyr sá sem ekki vill leggja út í algjöra óvissuför.

[S i g u r ð u r S i g u r ð a r s o n, 30.3.2010 kl. 14:31]

Sæll Guðmundur.

Það er tóm vitleysa sem komið hefur fram í fjölmiðlum um að færðin inn í Bása sé erfið!!

Staðreyndin er sú að þangað er færðin eins og á góðum sumardegi en lítið í ám. Hægt er að komast inn í Bása á óbreyttum jeppum.

Steinsholtsáin er vatnslítil, en hún getur oft verið til vandræða þar sem margir kunna ekki á vaðið.

Hvannáin skiptist í margar kvíslar við veginn og er vatnslítil.

Vegurinn inneftir er almennt grýttur og leiðinglegur yfirferðar en hann er langt í frá ófær og sama á við árnar. Þessar upplýsingar hef ég frá fólki sem ók inn í Bása um hádegið í dag.

Enginn skyldi aka á fólksbíl eftir Þórsmerkurvegi. Það er klár ávísun á tjón.

Ég vek athygli á því að Kynnisferðir verða með daglegar rútuferðir frá Hvolsvelli í Bása. Minnir að brottför sé klukkan tíu og lagt af stað til baka úr Básum klukkan 18. Betra er ekki í boði fyrir þá sem eru á fólksbílum. Og í Básum er boðið upp á skipulagaðar gönguferðir með fararstjórum og gengið að gosstöðvunum og víðar.

[S i g u r ð u r S i g u r ð a r s o n, 30.3.2010 kl. 15:14]

Ég fékk fyrir stuttu þær leiðu fréttir að Kynnisferðir ætli aðeins að vera með eina ferð í Bása á dag, ekki tvær.

Fyrirtækið verður með ferð kl. 9.30 frá Reykjavík og þá er komið í Bása um 13.30. Ekki verður um að ræða ferð úr Básum kl.18.

Þetta eru áreiðanlega mistök hjá Kynnisferðum. Meiri eftirspurn hlýtur að vera eftir dagsferðum í Bása en ferðum þar sem fólk þarf að gista innfrá.

Á móti kemur að nóg pláss er í Básum fyrir þá sem þar vilja gista yfir eina nótt eða fleiri um páskana.

Og aðeins fyrir þá sem eru á eigin jeppa eða gista í Básum er þessi frábæri möguleiki á kvöldgöngu að hraunfossinum í Hvannárgili.

[Sigurður Haraldsson, 31.3.2010 kl. 00:27]

Því miður verður slys um helgina.

Það eru of margir kálfar sem þarna verða á ferð.

[Guðmundur Ásgeirsson, 31.3.2010 kl. 02:34]

Já Haraldur, því miður er hætt við því að einhverjir af fjöldanum fari ógætilega. Ég er sjálfur mjög áhugasamur um að fara inn í Þórsmörk, og veit að ég gæti líklega komist þangað núna á fólksbíl. Myndi samt varla vilja taka sénsinn á að skemma bílinn eða vera til trafala ef eitthvað skyldi fara úrskeiðis þegar svona mikil umferð er um svæðið. Frekar taka rútu og þurfa ekki að hafa áhyggjur.