Myndir af umhverfinu og frá því fyrir gos

Esta myndin er úr Moggganum og er afskaplega góð. Hún sýnir umhverfi gosstöðvanna mjög vel. Ekki eru allir vel að sér í landsfræðinni á þessum slóðum og þess vegna er ástæða til að merkja inn á hana kennileiti.

Þarna hlykkjast gönguleiðin upp á Fimmvörðuháls og þegar loks er komið efst upp a Bröttufannarfell, í rúmlega 1000 m hæð, er fyrsti og eini faratálminn, gosstöðvarnar. Sagt er að sumir geti gengið á glóandi kolum en ekki yndi ég vilja ganga á glóandi hrauni með spúandi eldfjall við hliðina.

  

Myndin hér fyrir neðan var tekin fyrir nokkrum árum í suðurhlíð Bröttufannarfells. Til vinstri má sjá skíðamann á svipuðum slóðum og eldsprungan varð til aðfararnótt sunnudagsins síðasta.

Þennan dag var afar falleg kvöldsól og varpaði hún töfrandi birtu á gönguleiðina milli Bröttufannarfells og Miðskers. Ég reyndi að grípa hana með myndavélinni. Stikurnar sem þarna sjást eru nú að öllum líkindum bráðnaðar og uppleystar í gígnum.

Neðst er mynd af göngumönnum nákvæmlega á þeim stað sem eldgosið kom upp. Horft er í suður að Miðskeri. utan í því er litli gígurinn sem margir muna eftir en gönguleiðin lá þar austan í honum. 

Á dagskránni í mars var að fara upp á Fimmvörðuháls með félögum mínum en þeir hafa umsjón með Fimmvörðusskála fyrir Útivist.

Nú er það spurningin hvort við fáum yfirleitt að fara þangað upp þar sem fimm kílómetra radíus frá gosstöðvunum er yfirlýst bannsvæði. Fimmvörðuskáli er tvo kílómetra frá þeim.

Að þessu mæltu skal ég fullyrða að um næstu helgi verða hundruð manna gangandi, akandi á jeppum eða vélsleðum á leið upp á Fimmvörðuháls. Fleirum en mér langar upp á Háls til að skoða eldstöðvarnar. Ég geri ráð fyrir að leggja af stað svona um tíu leytið frá Skógum, þá er löggan farin með þá sem komu fyrstir í fangaklefann á Hvolsvelli. Þá hleypur lýðurinn upp enda hefur löggan ekki mannskap til að fylgjast með okkur hinum vitleysingunum.

Litlar breytingar á gosinu

Athugasemdir

[Guðmundur Ásgeirsson, 23.3.2010 kl. 16:58]

Skemmtilegt niðurlag á pistlinum!

[KRISTJÁN SVEINBJÖRNSSON, 23.3.2010 kl. 17:54]

Forræðishyggja sýslumanns og lögreglu getur valdið því að almenningur hunsar boð og bönn á svæðinu.

[Jón Steinar Ragnarsson, 24.3.2010 kl. 07:30]

Nú í morgun var gosið að aukast og hvikuhreyfing er stöðug undir jöklinum. Maður myndi ætla að það sé ok að fara þarna uppeftir, ef ekki er farið of nærri. Þarna verða gríðarlegar gufusprengingar og ein slík í morgun, svo þetta er ekki hættulaust, en ég myndi ætla að engin hætta sé á að flóð og vatnsgangur geti hamlað neinu þarna, jafnvel þótt gyri í jöklinum. Það eina sem mér dettur í hug að menn ættu að varast, er að dvelja í lægðum og hvíltum, þar sem vondar gastegundir gætu safnast. Það gerist þó tæplega í því roki, sem er núna.