Aldrei nema rökstuddur grunur sé um lögbrot!

Rannsóknarskattstjóri og lögregla geta með úrskurði fengið aðgang að bankareikningum sé grunur um lögbrot fyrir hendi.

Það er hins vegar afar varahugavert ef snúa á þessu við og yfirvöld geti fengið að skoða bankareikninga til þess eins að finna út hvort lög hafa verið brotin t.d. í ljósi bankakreppunnar. Hins vegar er fordæmið mjög slæmt. Hvað næst? Hvað gerist ef rannsóknarmenn finna eitthvað sem er bitastætt en ekki lögbrot? Hversu lengi eru hlutirnir ekki fljótir að berast út með aðstoð Gróu á Leiti? Hvar á að draga línuna, hvaða upplýsingar eiga erindi til opinberra aðila? Svo má auk þess mistúlka allt.

Nei, ég held að það sé nauðsynlegt að viðhalda bankaleynd nema rökstuddur grunur sé um lögbrot.

Bankaleyndin víki vegna rannsóknar

Athugasemdir

[Héðinn Björnsson, 14.11.2008 kl. 14:08]

Bankaleynd er kannski minnsta vandamál sem við þurfum að gæta að þessa stundina. Verði ekki farið á trúverðugan hátt í uppgjör á þeim gjörningum sem eru að kosta fólk ævisparnaðnum verður enginn friður hér á landi. Verði þetta ekki gert af þinginu á trúverðugan hátt er hætt við að uppgjörið verði gert persónulega við fólk sem slúðursögur telji að hafi valdið einhverju í bankasvindlinu.

[S i g u r ð u r S i g u r ð a r s o n, 14.11.2008 kl. 14:13]

Ég gæti nú lifað áhyggjulaus þó svo að einhverjir væru að slúðra. Ég mun þó ekki samþykkja afslátt frá almennum mannréttindum vegna „sérstakra aðstæðna“. Annað hvort gilda lög og reglur undantekningalaust eða ekki.

[Fréttahaukur, 14.11.2008 kl. 15:14]

Sammála Sigurði.  Þó ástandið sé slæmt þá er það ekki svo slæmt að ástæða sé til þess að afnema mannréttindi.  Ef farið er að aflétta bankaleynd án gruns um lögbrot þá er það einungis upphafið að ferli sem ekki er gott að sjá fyrir endann á.   Getur maður þá ekki gengið áhyggjulaus um án þess að þurfa sífellt að líta um öxl vegna þess að "stóri bróðir" er að fylgjast með hverri hreyfingu ?

Ruglið er nóg þessa dagana og máttleysi sem og úrræðaleysi stjórnvalda algert.   Ef fara á að hnýsast ofan í veskin okkar og rannsaka bankareikninga í leit að einhverju sem mögulega er hægt að hanka fólk á og dæma fyrir þá er illa komið fyrir íslensku samfélagi.

Ég treysti því að endurskoðendur og síðan ef þörf krefur skattyfirvöld fari þannig yfir bókhald og ársreikninga Rauðsólar ehf. þegar að því kemur að ljóst sé að fjármunir bárust ekki inn í það félag með óeðlilegum hætti.  Séu þeir hlutir í lagi - hvað þarf þá að rannsaka fyrirfram ?  Ekki skjóta fyrst og spyrja svo.

Á ég kannski sem einstaklingur í þessu landi á hættu að vera kallaður inn á teppið í Alþingi ef ég staðgreiði bifreið sem ég kynni að fjárfesta í ?  Eða ef að ég myndi kaupa hlut í fyrirtæki ?

Ef Jón Ásgeir eða einhver annar greiðir með reiðufé (seðlar eða millifærsla) þá skiptir bara nákvæmlega engu hvernig þeir peningar urðu til.

Allt öðru máli gegnir með rannsókn skattrannsóknarstjóra á Stoðum (áður FL Group).  Þar leikur grunur á að menn hafi ofmetið eignir og selt sjálfum sér fram og til baka til þess eins að sýna fram á hagnað sem ekki var raunverulegur.

[S i g u r ð u r S i g u r ð a r s o n, 14.11.2008 kl. 15:56]

Skynsamlegt innlegg frá Fréttahauki. Þökk fyrir.