Stjórnarkreppa, ríkisstjórn ABCD eða nýjar kosningar

Stjórnmálamenn sem og allir aðir þurfa að átta sig á einu. Stjórnarkreppa ríkir á Íslandi. Ekki er nokkur leið að mynda ríkisstjórn sem hefur nægan meirihluta. Sú eina stjórn sem er tæknilega möguleg væri ef Sjálfstæðisflokkurinn (21 þingmaður), Björt framtíð (4), Viðreisn (7) og Framsóknarflokkurinn (8) næðu samkomulagi en samanlagt hafa þessir flokkar 40 þingmenn.

Ljóst er að þessi ríkisstjórn yrði ekki framhald þeirrar sem ríkt hefur frá 2013. Ástæðan er einfaldlega sú að hið pólitíska landslag gjörbreyttist í síðustu kosningum. Sjálfstæðisflokkurinn styrktist, Viðreisn varð til og Framsóknarflokkurinn tapaði stórt. Þetta yrði því ný ríkisstjórn á nýjum forsendum.

Hins vegar er þetta ekki góð ríkisstjórn. Fjögurra flokka ríkisstjórn þýðir eiginlega að hálft löggjafarþingið verður háð utan veggja Alþingis og á öðrum tímum. Slíkt væri hið mesta hallæri og erfitt í vöfum.

Skynsamlegast er auðvitað að kjósa aftur. Þingið sitji með starfandi ríkisstjórn þangað til kosið verður í febrúar eða mars. 

Ekkert er mælir á móti því að kjósa aftur, með því að leitað til þjóðarinnar og kannað hvernig hún vilja leysa úr stjórnarkreppunni.

„Erum nú bara venjulegt fólk“

Athugasemdir

[Guðbjörg Snót Jónsdóttir (IP-tala skráð) 2.12.2016 kl. 13:52]

Sammála, enda eru flestir á því, að það þurfi að kjósa aftur, og það verði kosningar aftur í vor, - þær kosningar, sem hefðu með réttu átt að halda þá, ef þessi stjórnarandstaða hefði ekki heimtað annað. Mér eins og fleirum finnst líka, að starfstjórnin geti bara setið áfram þangað til. Það liggur varla svo á að mynda stjórn, enda varla mögulegt undir þessum kringumstæðum, þegar Benedikt er líka með þetta mikilmennskubrjálæði og hroka, að vilja ekkert við aðra tala, nema að hann stjórni ferðinni og verði forsætisráðherra. Hann hefur miklast fullmikið af sigrinum í kosningunum. Píratar eru líka að þvælast þarna fyrir. Ég skil heldur ekkert í kosningasigri þeirra, eins og þeir eru. Við megum þakka fyrir, ef Samfó lifir aðrar kosningar af, og gott ef þeir þurrkast ekki út hér í borginni í næstu borgarstjórnarkosningum, eins og Dagur og Hjálmar eru nú búnir að haga sér við okkur borgarbúa. Ég stórefast líka um, að BF græði mikið á því að vera í þessarri gíslingu Viðreisnar og klessa sig alltof mikið upp við þann flokk. Ég efast líka um, að Viðreisn muni koma vel út úr næstu kosningum, bæði vegna BF og hroka Benedikts og óbilgirni. Þetta hjálpast allt að. Við skulum bara vona, að Sjálfstæðisflokkurinn haldi sínu og Framsókn nái að vinna þannig úr sínum málum, að flokkurinn nái aftur vopnum sínum og fái sem mest í næstu kosningum, svo að hann geti verið í stjórn með Sjálfstæðismönnum, og helst tveggja flokka stjórn. Bjarni og Sigurður Ingi hafa staðið sig vel, sérstaklega Bjarni, sem ég gæti alveg séð fyrir mér sem næsta forsætisráðherra. En mér finnst engin spurning, eins og ástandið er núna, að það verði kosningar aftur í vor, og málin ættu að geta skýrst betur þá.