Misnotkun viðtengingarháttar í fyrirsögn

Er ekki kominn tími til að blaðamenn Morgunblaðsins læri að nota viðtengingarhátt rétt? Donald Trump var, samkvæmt fréttinni, ekki að hvetja Kínverja til að „nauðga“ Bandaríkjunum heldur fullyrðir að það sé reyndin. Hér er vissulega alhæft um alla blaðamenn Moggans en auðvitað á þetta aðeins við örfáa þeirra.

Þar af leiðandi á ekki að nota viðtengingarhátt í fyrirsögninni heldur framsöguhátt. Rétt væri fyrirsögnin svona: Kínverjar „nauðga“ Bandaríkjunum.

Misnotkun viðtengingaháttar er svo algeng að hún vekur furðu. Svo virðist að hún hafi smitast til allra fjölmiðla landsins. Gæti verið að hér sé um að ræða yngri blaðamenn og sökin sé fyrst og fremst menntun þeirra sem hafi veið ónóg eða menntunarleysi. Hvort tveggja er nóg til að vekja upp ágengar spurningar.

Svo er það hin efnislega athugasemd við orð Donalds Trumps. Ástæða er til að hafa áhyggjur af því að þessi maður verði forseti Bandaríkjanna. Hann er eins og margir aðrir í mannkynssögunni sem sækja sér skýringar eftir hentugleikum, býr til blóraböggla.

Kínverjar „nauðga“ Bandaríkjunum

Athugasemdir

[Þórhallur Birgir Jósepsson, 2.5.2016 kl. 13:13]

Rétt hjá þér, en ekki nógu rétt!

Þetta kunnáttuleysi í notkun viðtengingarháttar er nefnilega faraldur, ekki aðeins á mbl.is, heldur öllum netnmiðlum, segi og skrifa: Öllum! Jafnvel á blöðunum líka. Þetta virðist vera einhvers konar skyndifaraldur, sáust eitt og eitt dæmi stöku sinnum þar til í vetur að allt sprakk út með látum og er orðin meginregla.

Helst vil ég kenna um hirðuleysi við íslenskukennslu í grunnskólum og framhaldsskólum. Nú er það að koma áþreifanlega fram þegar nýjar kynslóðir koma til starfa og fá að leika lausum hala við lyklaborðið, þ.e. enginn les yfir.

[S i g u r ð u r S i g u r ð a r s o n, 2.5.2016 kl. 13:40]

Bestu þakkir fyrir innlitið, Þórhallur. Er alveg sammála þér. Misnotkun viðtengingarháttar er faraldur og nú orðin meginregla, eins og þú segir.

Eiður Svanberg Guðnason er sífellt að agnúast út í þetta en enginn hlustar. Fréttabörnin fá að leika lausum hala á lyklaborðinu og enginn les yfir. Sorglegt.

Annars er það stórfurðulegt hvernig hægt er að ruglast á viðtengingarhætti og framsöguhætti. Þetta er hugsanlega einhvers konar boðskiptavilla í taugaboðum í heila ... Má vera að hægt sé að lækna þetta með lyfjagjöf.

Ég hef þó þá trú að þó svo að hirðuleysi við íslenskukennslu sé um að kenna þá geti enginn sagt vel frá nema hafa alist upp hjá góðum sögumönnum eða tileinkað sér bóklestur frá fyrstu tíð. Hið seinna er mikilvægast. Þar af leiðir að of seint er að laga fréttabörnin nema ef til vill með lyfjagjöf (þetta er nú meiri vitleysan hjá manni).