Lélegur kjúklingur í verslunum og skemmist fljótt

Lítið framboð virðist vera af kjúklingi upp á síðkastið og í þokkabót þolir hann illa geymslu og skemmist þar af leiðandi fljótt. Hjá mér hefur það gerst oftar en nokkru sinni áður að kjúklingur í ísskápnum er farinn að lykta illa allt að fjórum dögum fyrir síðasta söludag. Munum að sú dagsetning miðast eingöngu við sölu, ekki að fæðan sé ónýtt.

Hvernig getur kjúklingur skemmst í kæli öðru vísi en að hann sé þar annað hvort of lengi eða hann hafi verið skemmdur fyrir.

Mér finnst þetta nú ekki einleikið og þegar ég skilaði enn einu sinni skemmdum kjúkling spurðist ég fyrir hjá Bónusinu og Krónunni. Vildi vita hvort ég einn væri svona óheppinn eða hvort fleiri hefðu lent í því sama.

Svörin voru sláandi. Fjöldi fólks kvartar og skilar illa lyktandi kjúklingi.

Þá skoðaði ég framboðið af kjúklingi. Það er núna margfalt minna en var fyrir verkfall. Áður voru troðfullar hillur af ferskum kjúklingi en nú eru pakkarnir í samanburðinum afar fáir. Eitthvað hefur gerst og eitthvað veldur því að kjúklingurinn þolir ekki geymslu.

Án þess að hafa neitt fyrir mér giska ég á að verkfallið í vor hafi farið illa með kjúklingaræktendur og það sé langt að bíða eftir því að framleiðslan komist í samt lag. Um leið getur verið að frosinn kjúklingur sé þýddur og svo sendur í búðir eða þetta gerist í verslunum. Líklega er geymsluþol afþýdds kjúkling minna en fersks og því skemmist hann löngu fyrir síðasta söludag.

Þegar öllu er á botninn hvolft er gjörbreytt ástand á markaði með kjúklingakjöt.

Athugasemdir

[Kolbrún Hilmars, 8.8.2015 kl. 09:54]

Ég kannast líka við þetta með illa lyktandi "ferskan" kjúkling nokkrum dögum fyrir síðasta söludag.  En það er ekki bara kjúklingurinn sem er varasamur; léttmjólkin breytist ítrekað í fúla súrmjólk x-mörgum dögum fyrir lokadag.

[Hrólfur Þ Hraundal, 8.8.2015 kl. 10:05]

Rétt til getið Sigurður, fnykurinn af verkfallsmönnum svífur en þá yfir . Alla kjúklinga sem þú kaupir skaltu senda hinum fátæku verkfallsmönnum svo þeir geti  fengið almennilega skitu, sér og sínum að kostnaðar lausu.

[Jón Páll Vilhelmsson, 8.8.2015 kl. 11:38]

Lentum í þessu um daginn með Krónukjúkling. Ein hryllilegasta lykt sem ég hef upplifað um æfina. Hef ekki getað borðað kjúkling síðan. Kannski er það bara gott mál!