Hroki Samgöngustofu vegna orða Páls Einarssonar

Það getur verið að þeir séu með einn flugpunkt yfir Heklu. Við vitum ekkert um það, en þeir fljúga bara inn á íslenskt yfirráðasvæði eftir ákveðnum hnitum. Það eru litlar líkur á því að Hekla gjósi og valdi slysi, af því að þetta tekur allt sinn tíma og Hekla er vel vöktuð. Þeir fljúga í 30.000 fetum þannig að líkurnar á að þetta valdi slysi eru engar, eða litlar.

Ofangreint er haft eftir starfsmanni í fræðslumálum hjá Samgöngustofu. Auðvitað er þetta hárrétt hjá honum enda hef ég það beint frá bílstjóra hjá Hreyfli að Hekla muni ekki gjósa á næstunni og þegar það gerist er það aldrei þegar flugvélar eru í nánd.

Annan þekki ég sem afgreiðir á kassa hjá Bónus. Hann tekur undir orð starfsmanns Samgöngustofu og segir engar líkur á að Hekla gjósi og valdi slysum.

Sama segir frænka mín sem er vel að sér í flugmálum, hefur oft flogið og jafnvel litið sem snöggvast inn í flugstjórnarklefa. Hún heldur því fram að Páll Einarsson verði nú að átta sig á því að flugvélar hafa stýri og sumarhverjar handbremsur.

Jafnvel hæstaréttarlögmaður, góður vinur minn, heldur því fram að það sé útilokað annað en að hægt sé að koma í veg fyrir slys þegar Hekla gjósi.

Ég held að allir þeir sem hér hafa verið nefndir hafi ekki hundsvit á því sem þeir eru að segja. Þar að auki er það ansi snöfurmannlegt hjá starfsmanni í fræðslumálum hjá Samgöngustofu að afgreiða sérfræðiáliti Páls Einarssonar, jarðeðlisfræðings, einn fremsta vísindamann þjóðarinnar með ofangreindum orðum. Sé þetta skoðun Samgöngustofu ætti að leggja hana niður. Þetta er eins og halda því fram að lítil hætta sé á slysum á mótum Miklubrautar og Kringlumýrarbrautar vegna þess að þar séu umferðaljós og lögreglan leggi leið sína þangað tiltölulega oft.

Með fullri virðingu fyrir starfsmanni í fræðslumálum hjá Samgöngustofu sem og öðrum starfsmönnum stofnunarinnar, þá væri þeim sæmast að taka mark á aðvörunarorðum manns sem gerst til þekkir og mælir af vinsemd og kurteisi. Slíkum manni á ekki að taka með stofnanahroka heldur þakka fyrir og fara að ráðum hans.

Varar við þotuflugi yfir Heklu

Athugasemdir

[Halldór Egill Guðnason, 30.7.2015 kl. 09:44]

Starfsmadur "fraedslustofu" Samgöngustofu veit greinilega ekkert meira en neinn annar um eitt eda neitt, vardandi hlughnit yfir landinu og aetti thví yfir höfud ekkert ad tjá sig um thau mál. Hálf nöturlegt ad lesa vidbrögd starfsmannsins og ljóst ad thar fer einstaklingur í kerfinu sem lítid gengur undan, en thannig er thví thví midur farid med allt of marga báknsstarfsmenn. Báknid er ekki lengur í okkar thágu, heldur kerfiskarla og kvenna, sem thar starfa, of oft med litlum sem engum sýnilegum árangri, thví midur. Hvad vard annars um slagordid "Báknid burt" sem svo rík áhersla var lögd á á sínum tíma medal ungra sjálfstaedismanna? Their ungu sjálfstaedismenn sem thá voru í sem mestum metum og urdu sídan rádherrar og ég veit ekki hvad, áttu eftir ad blása út báknid, sem aldrei fyrr, svo kaldhaednislegt sem thad nú var, en thetta er adeins útúrdúr frá inntaki pistilsins.

Gódar stundir, med kvedju ad sunnan. 

[S i g u r ð u r S i g u r ð a r s o n, 30.7.2015 kl. 09:51]

Bestu þakkir fyrir innlitið, Halldór Egill. Svarið er svona eins og þegar stuggað er við börnum: „Já, já, við vitum af því að eldur logar á efri hæðinni, en vertu ekki fyrir og farðu út að leika þér.“

Þetta er auðvitað ekki boðlegt svar vegna aðvörunarorða vísindamanns.

[Guðmundur Ásgeirsson, 30.7.2015 kl. 13:50]

Stofnanahroki er landlægt vandamál hér á Íslandi.

[Þorkell Guðnason, 30.7.2015 kl. 15:01]

Auðvitað er þetta hárrétt hjá honum enda hef ég það beint frá bílstjóra hjá Hreyfli að Hekla muni ekki gjósa á næstunni og þegar það gerist er það aldrei þegar flugvélar eru í nánd.

Þetta dustaði rykið af gömlu svari frá "skynsömum" viðskiptavini: "Hann sem er atvinnubílstjóri ætti nú aldeilis að vita það" O:)

[S i g u r ð u r S i g u r ð a r s o n, 30.7.2015 kl. 15:08]

Ég er alltaf jafn hissa þegar ég finn fyrir hroka hjá stofnunum íslenska lýðveldisins, Guðmundur.

Já, Þorkell, hefði átt að bæta þessu inn í þessar sögur. Frábært.

[Hrólfur Þ Hraundal, 31.7.2015 kl. 07:21]

Samgöngustofa  hét áður Siglingamálastofnun og sumt það fólk sem þar hafði stöðu taldi að Siglingamála stofnun væri þeirra einkasandkassi . 

Olli þetta þeim sem álpuðust inn á yfirráða þessarar stofnunar oftast vandræðum og var það því talið af sumum til bóta þegar nafni sandkassans var breitt, en aðrir töldu að best hefði verið að flytja kassann eitthvert norður, austur eða vestur þar sem fyndist fólk sem nennti að sinna skyldum sínum og kynni þó ekki væri nema gamaldags mannasiði.