Landið bærir ekki á sér

Stundum bregður manni við þegar ekkert gerist. Skyndilega fellur allt í dúnalogn, vindurinn dregur sig til hlés, sólin skín, fáir bílar á götunni og krakkinn í næstu íbúð hættir að gráta á nóttunni. Þetta veit ekki á gott, hugsar maður, og býst við hinu versta.

Þetta hljóp í gengum kollinn á mér þegar ég leit á skjálftavefinn hjá Veðurstofunni og sá að landið lá kjurrt, eða því sem næst. Smávægilegar eftirhreytur af skjálftunum við Grímsey og Eldey en annars ekkert merkilegt.

Og hvað segja jarðfræðingar við þessu. Jú, ekkert öðru vísi en vanalega.

Hinn draumspaki ráðgjafi minn er ekki sama sinnis. Hann heldur því fram að nú verði allt vitlaust og það fyrir helgi. Hann dreymdi svo magnaða drauma og hrikalega að hann hélt ekki vatni.

Passaðu þig, sagði hann. Nú er ljótt í efni. Og hann sagði mér drauminn. Ég ræð hann öðru vísi. Held að hann sé fyrir snjóavetri þegar þar að kemur. Við sjáum hvað setur. 

Athugasemdir

[Emil Hannes Valgeirsson, 13.5.2013 kl. 14:41]

Það kemur að því að hinn draumspaki vinur þinn hitti á það að lokum.

Sjáum til hvað gerist síðar í mánuðinum en þá munu reikistjörnurnar Merkúr, Venus og Júpíter sjást í einum hnapp í vestri eftir sólsetur. Þetta gerðist síðast í maí 2011 þegar gaus í Grímsvötnum. Að auki verður fullt tungl þann 25. maí. Ef þetta veit ekki á gríðarlega atburði þá veit ég bara ekki hvað.

http://science.nasa.gov/science-news/science-at-nasa/2013/10may_sunsettriangle

[S i g u r ð u r S i g u r ð a r s o n, 13.5.2013 kl. 14:55]

Þeir atburðir sem þú efnir eru í sjálfu sér stórmerkilegir. Vonandi sér sá draumspaki ekki þessar athugasemdir frá þér, hann fengi taugaáfall.

[Anna Sigríður Guðmundsdóttir, 13.5.2013 kl. 16:13]

Lognið á undan storminum? Það hefðu ómetanlegu brjóstvits-spekingarnir okkar sagt.

Brjóstvitið er ómetanleg auðlind einstaklinganna. Brjóstvit er ekki kennt í skólum.

Þetta allskonar-vit er gott, hvað með öðru. Virðing fyrir annarra þekkingu og sjónarmiðum skemmir varla nokkurn, en hjálpar mörgum að víkka sjóndeildarhringinn.

M.b.kv.

[Sigurður Þór Guðjónsson, 13.5.2013 kl. 21:50]

Landið mun bylta sér allmjög þegar nýja ríkisstjórnin verður mynduð!