Spara gífuryrðin, bíða niðurstöðu

Við hverju eru að búast af embætti Ríkislögreglustjóra? Að sjálfsögðu fara menn þar að lögum. Ef ekki þá myndi nú aldeilis hrikta í kerfinu.

Muna menn hvað gekk á fyrir nokkrum vikum? Embættið fékk á sig miklar ávirðingar og margir voru undrafljótir að trúa öllu upp á það.

Man eftir að gamli skólabróðir minn úr MR Illugi Jökulsson sakfelldi og dæmdi í litlum pistli. Hann sagði þann 28. september sl.:

 Það stendur alveg skýrt í lögum að útboð skulu fara fram þegar kaupa á vörur fyrir ríkið fyrir hærri upphæð en fimm milljónir.

En ríkislögreglustjóri telur að þessi lög gildi ekki um sig.

 Hann segir að “ógerlegt hefði verið að fara að ýtrustu lögum” í málinu.

 Sjá hér.

Þessi málflutningur er algjörlega makalaus.

Vissulega er þetta ekki óalgengt viðhorf á Íslandi, það verður að viðurkennast.

En þessi maður er ríkislögreglustjóri, for crying out loud!!

Einhvern veginn grunar mig að óbreyttir lögreglumenn eigi ansi oft eftir að heyra þetta á næstunni þegar þeir reyna að koma í veg fyrir lögbrot.

“Ja, því miður, mér var bara ógerlegt að fara að ýtrustu lögum í þessu efni.”

Það verður fróðlegt, skulum við segja, að fylgjast með því hvort ríkislögreglustjóri kemst upp með þetta!

Jú, ríkislögreglustjóri komst upp með þetta vegna þess að þetta var aldrei neitt mál, hann braut ekki lög. Hvað skyldi Illugi segja núna? Og hvað skyldu þeir 16 segja sem rituðu athugasemdir við pistil hans? Sumir þeirra voru ótrúlega fljótir að trúa.

• „Halldór Á“ sagði: „Ég treysti á að Ögmundur Jónasson innanríkisráðherra veiti ríkislögreglustjóra áminningu fyrir þessi hreinu og kláru lögbrot.“ 
• „Kristján“ sagði: „Í öllum öðrum löndum í okkar heimshluta væri maður í þessari stöðu búinn segja upp starfi sínu. En ekki á Íslandi. Ólöglegt og siðlaust.“
• „Jafnaðarmaður“ sagði: „Ögmundur á að sjá sóma sinn í að setja þennan lögbrjót af á meðan málið er rannsakað.“

Í lokin kom þó einn skynsamur, Gunnar Th. Gunnarsson og sagði: „Hér sitja margir í dómarasæti. Þetta mál verður væntanlega rannsakað ofan í kjölinn. Held að menn ættu að spara gífuryrðin, þangað til niðurstaða liggur fyrir.“

Sannast sagna verður maður dálítið hissa á fólki, hvers vegna það er svona fljótt að samþykkja það sem kemur á prenti, sérstaklega ef það er eitthvað misjafnt. Betra væri ef við myndum spara gífuryrðin og bíða eftir niðurstöðum eins og Gunnar segir. En þá, enn og aftur, kemur áreiðanlega einhver og heldur því fram að það sé ekkert að marka Ögmund, hann sé jafnspilltur og aðrir stjórnmálamenn. Og nú er vissara að hætta áður en maður tekur undir þetta og það að óathuguðu máli ... 

 

 

Lögreglan fór að lögum við innkaup

Athugasemdir

[Skarfurinn, 18.10.2011 kl. 21:30]

Háalvarlegt mál að Ögmundur sem innanríkisraðherra skuli þarna verja meint lögbrot.

 Maðurinn sem mér fannst standa sif vel sem form. BSRB er að mínu mati algjörlega búinn að missa það og á í raun að skammast sín fyrir að lympast svona niður fyrir hrokagikknhum Haraldi Jóhanessen.

[S i g u r ð u r S i g u r ð a r s o n, 18.10.2011 kl. 21:36]

Eigum við ekki frekar að segja að ekki sé um neitt brot að ræða. Ráðuneytið kemst að þeirri niðurstöðu og ráðherrann er sammála. Vel má vera að Haraldur sé hrokagikkur en lunderni mannsins skiptir hér engu máli. Mikilvægast er að kunna að greina málið og blanda ekki saman óskyldum atriðum. Annars komumst við ekkert áfram í rökræðunni.

[Guðjón Sigþór Jensson, 18.10.2011 kl. 23:25]

Í raun er þetta smámál sem er blásið upp. Raunverulega hefðu Ríkiskaup átt að sjá um þetta, auglýsa í útboði og þá hefði þetta innkaupamál farið í hefðbundinn farveg en nokkuð tímafrekann. Ríkislögreglustjóri hefur farið þá leið að útvega fé og lögreglumenn hafa haft augastað á hvað þeir voru að leita að. Nokkrir lögreglumenn koma á fót innflutningsfyrirtæki og málið afgreitt. Þetta hefur tekið mun styttri tíma en hefðbundin leið gegnum Ríkiskaup.

En nú verður væntanlega þessi mál komin á hreint og það er auðvitað aðalatriðið!

Góðar stundir!

Mosi