Friðum Fimmvörðuháls fyrir bílaumferð

Vegurinn upp á Fimmvörðuháls hefur verið afskaplega slæmur undanfarin ár. Honum hefur ekki verið viðhaldið á eins og öðrum fjallvegum. Og til hvers á að hafa veg upp á Hálsinn? Hann á einfaldlega að vera lokaður nema fyrir lögreglu og björgunarsveitum.

Þeir sem áhuga hafa á að fara á Fimmvörðuháls eiga að ganga. Gönguleiðin er frábær og einstaklega falleg. Þeir sem vilja fara hraðar yfir geta sleppt því að gagna fossaleiðina með Skógá og farið eftir veginum.

Gönguleiðin frá Básum, um Strákagil, Kattahryggi, Foldu, Morinsheiði og Bröttufönn er líka stórkostleg og hún er styttri en að vísu nokkuð erfiðari.

Fimmvörðuháls á að friða fyrir bílaumferð. Svo einfalt og ágætt er það. 

Lokað fyrir umferð að Fimmvörðuhálsi

Athugasemdir

[Hrólfur Þ Hraundal, 14.5.2011 kl. 11:12]

Sæll Sigurður,  tek undir málþitt.  En veist þú hvað þetta borgmyndaða fjall hét,  áður en farið var að kalla það Morinsheiði ?

[Þorvarður I Þorbjörnsson, 15.5.2011 kl. 08:39]

Takk staf þinn og gakk! 

Vissulega væri það frábært ef Sigurður gæti komið þeim sem ekki geta gengið eða ekki vilja ganga, til að skakklappast upp á Fimmvörðuháls.  En það er bara ekki á allra færi!

Vegurinn frá Skógum er hvorki betri né verri en hann hefur verið, en er ákaflega leiðinleg gönguleið og mér óskiljanlegt að göngufólk skuli endilega velja hann í stað þess að halda aðskilnaði við vélknúna umferð.

Einhver ljótari náttúruspjöll seinni tíma (fyrir utan Suðurstrandarveginn nýja frá Selvogi og vestur úr) er einmitt á gönguleiðinni upp á Fimmvörðuháls frá Básum.  Það væri búið að loka leiðinni, kæra viðkomandi og sekta ef skurðirnir væru eftir vélknúna umferð.

Virðum rétt ALLRA til að ferðast um landið okkar góða, og vinnum að því að gera það í sátt og samlyndi.

Ingi

[Olgeir Engilbertsson, 15.5.2011 kl. 10:52]

Ég  leyfi mér að mótmæla þessari lokunaráráttu nema fyrir gangandi . Ég er orðinn það gamall að ég get ekki gengið til dæmis upp á Fimmvörðuháls þó að ég feginn vildi. Spurning hvort þessi mismunun stendst jafnræðisreglu,en ég skil vel afstöðu bænda í Skógum sem hafa veginn við húsvegginn. Svipað var með þjóðveginn í Lóninu. Ef hurðin á vélageymslu í Hvalnesi var opin var annar vegarhelmingurinn þar með lokaður. Síðar var vegurinn færður frá bænum. Mér er ekki vel við vegi sem einhverjir valdir aðilar mega nota eins og sést hefur talað um í samband við Vatnajökulsþjóðgarð. Þar meiga trússbílar ferðaþjónustuaðila fara um en ekki trússbílar prívathópa. Ég efast um að þetta  stæðist fyrir dómi. Með ferðakveðju Olgeir E

[S i g u r ð u r S i g u r ð a r s o n, 15.5.2011 kl. 12:15]

Sælir allir þrír. Ég hef fylgst náið með Fimmvörðhálsi og jöklunum nokkuð náið í þrjá áratugi og tel mig vel kunngan á þessum slóðum.

Vegurinn upp hefur alltaf verið bölvaður troðningur. Þó hefur hann af og til verið lagaður. Aðstæður eru þó þannig að snjór lá á hluta hans oft langt fram eftir sumri og þá sneiddu ökumenn bara framhjá þeim, óku á gróðri og gróðurleysum. Þannig er þetta ennþá, nema hvað snjórinn er horfinn en vatnsagi hefur skemmt veginn, borið jarðveg í burtu og skilið eftir urð og grjót. Menn aka einfaldlega utanvega framhjá farartálmunum, sem eru oft fjölmargir.

Og nú hafa vinsældir Hálsins aukist að til muna vegna eldgossins. Fæstir gera sér grein fyrir því að aðeins er hægt að aka með góðu móti upp að Fúkka, þeim arma skála. Eftir það tekur við rúmlega klukkustundar ganga að eldstöðvunum. Það er því ekki þannig að allir geti komist akandi upp að eldstöðvunum vegna þess að akstur utan vega er einfaldlega bannaður.

Vinur minn, Olgeir Eingilbertsson, á því í nokkrum vanda, vilji hann komast á Hálsinn. Hann gæti þó ekið þangað að vetrarlagi t.d. frá Mýrdalsjökli. Aðra kosti á hann ekki.

Ég er þó sammála honum að þessi lokunarárátta er leiðigjörn. Ég get þó ekki fundið neina leið aðra en að loka veginum fyrir umferð. Hún er þegar orðin alltof mikil og svo ekki sé talað um óþægindin fyrir nafna minn að Skógum. Hefði þó aldrei trúað að ég ætti eftir að verja málstað þess manns sem hvað fúlastur barðist á móti byggingu Fimmvörðuskála Útivistar og beitti hann og félagar hans til þess lúalegum meðölum.

Ég skora á umhverfisráðherra og vegagerðina að sjá til þess að veginum upp á Hálsinn verði lokað.

[S i g u r ð u r S i g u r ð a r s o n, 15.5.2011 kl. 12:40]

Sæll nafni og þakka þér fyrir athugasemdina. Raunar eru aðeins um 14 km frá Skógum og upp að Fúkka. til viðbótar eru 5 km að eldstöðvunum, þannig að það er rétt hjá þér að leiðin fram og til baka eru ca 34 km. Einnig er það rétt hjá þér að um 15 km eru frá Básum og upp að eldstöðvunum og til baka.

Gaman að þú skulir hafa lesið þessar grobbsögur mínar. Þú ert hér með sá fyrsti sem vitnar til þeirra í opinberri umræðu ...

Veðrið getur verð erfiðasti hluti gönguferðar á Hálsinn. Maður hefur lent þarna í hrikalegum veðrum, jafnt sumar sem vetur. ... og einnig alveg stórkoslega góðu veðri. Maður er þó alltaf viðbúinn því versta.

Skemmtilegast er að ganga yfir á tveimur dögum. Ganga frá Skógum og upp í Fimmvörðuskála Útivistar t.d. á föstudagskvöldi. Og daginn eftir niður með viðkomu á eldstöðvunum.

Nei, nafni, vegurinn er ekki ?hinn ágætasti?. Hann er ferlegur og myndi fara hrikalega illa ef umferð um hann væri frjáls. Það er nú ekki það versta. utanvegaaksturinn verður alltaf mjög mikill, meðfram veginum upp á Hálsinn og frá Fúkka og upp á há Hálsinn.

Viljum við að ökuslóðir verði út um allt á Fimmvörðuhálsi?

Eftir því sem gönguferðir hafa aukist um Fimmvörðuháls þá hefur villuslóðum fjölgað og ekki síður gerist það sama og á veginum, slóðir grafast, vatn kemst í þær og þær dýpka. Fólk krækir framhjá þar sem þetta gerist og smám saman fjölgar slóðunum.

Í mörg ár hef ég varð við þessari stöðu og nú er þannig komið að á köflum er gönguleiðin hreinlega ónýt. Sums staðar er slóðin orðin á annan metra á dýpt. Annars staðar er enga fótfestu að fá og þá verða slysin.

Það sem þarf að gera er að lagfæra gönguslóðir, setja tröppur í brekkum, rétt eins og gert er við Skógafoss. Þar er þetta alveg til fyrirmyndar. Auðvitað er hægt að líta framhjá þessu öllu og leyfa hlutunum að danka. En erum við sátt við slíkt?