Bifreið, bifreið, bíl, bifreð ... stolið

Lögreglan á höfuðborgarsvæðinu lýsir eftir bifreið númer JJ-P44, sem stolið var í gærkvöldi úr vesturbæ Kópavogs, á Facebook síðu sinni.

Bifreiðin er af gerðinni Toyota Land Cruizer 200 og er hún svört að lit en bíllinn er 2010 árgerð. Bifreiðin er með skíðaboga of mikið af skíðabúnaði og öðru í bifreiðinni, þar sem fjölskyldan sem á bifreiðina var á leið í ferðalag þegar bifreðinni var stolið.

Lögreglan óskar eftir því að hringt sé í neyðarnúmerið 112 ef að sést til bifreiðarinnar.

Þetta er stutt frétt á visir.is. Sá sem svona skrifar er ekki að þjónusta lesendur, hann er bara hroðvirkur.

Átta sinnum er getið um bifreið („bíl“, „bifreð“) í fréttinni. Einu sinni hefði dugað. Þar af fjórum sinnum í einni málsgrein.

Bifreiðin er með skíðaboga of mikið af skíðabúnaði og öðru í bifreiðinni, þar sem fjölskyldan sem á bifreiðina var á leið í ferðalag þegar bifreðinni var stolið.

Settu punkt sem oftast, hljóðar eitt gott ráð til þeirra sem sitja við skriftir. Fréttina hefði auðveldlega mátt stytta, til dæmis svona: 

„Lögreglan hefur á Facebook-síðu sinni lýst eftir svartri Toyota Landcrusier bíl sem stolið var í vesturbæ Kópavogs í gærkvöldi.

Fjölskyldan sem á bílinn var á leiðinni í skíðaferð. Í honum var meðal annars mikið af skíðabúnaði. Þeir sem hafa séð bílinn eru beðnir að hringja í neyðarnúmerið 112.“

Nei, þess í stað er eitthvað hripað niður, enginn les yfir hvorki höfundur né annar. Fjölmiðlar, prentaðir eða á vefnum, veita lesendum þjónustu. Þeir eru ekki fyrir blaðamenn eða aðra sem að útgáfunni koma. 

 

 


« Síðasta færsla | Næsta færsla »

Athugasemdir

1 Smámynd: Ómar Ragnarsson

Í gamla daga hefði séra Emil Björnsson fréttastjóri rekið starfmann, sem hefði vogað sér að hripa niður annan eins hroða, vegna þess að augljóst er að sá, sem skrifaði þetta er ekki einu sinni sendibréfsfær.  

Ómar Ragnarsson, 24.2.2017 kl. 10:42

2 Smámynd: Ómar Ragnarsson

En nýyrðið "bifreður" er skemmtilegt. 

Ómar Ragnarsson, 24.2.2017 kl. 10:43

3 Smámynd: S i g u r ð u r   S i g u r ð a r s o n

Fattaði ekki „nýyrðið“ fyrr en Ómar nefndi það. Hló upphátt.

Svona fréttir eru alltof algengar. Nú vantar menn eins og Eið heitinn Guðnason sem var ódeigur í gagnrýni sinni á málfar í fjölmiðlum.

S i g u r ð u r S i g u r ð a r s o n, 24.2.2017 kl. 10:50

4 identicon

lýst eftir svartri Toyota Landcrusier bíl 

Greinilega fleiri en blaðamenn sem geta flýtt sér of hratt....

:-)

ls (IP-tala skráð) 24.2.2017 kl. 11:02

5 Smámynd: S i g u r ð u r   S i g u r ð a r s o n

Úbbs...

Breyti þessu ekki. Orðinu „bíl“ er þarna ofaukið því tegundaheitið tekur af allan vafa um að þetta er bíll ... ekki flugvél. 

S i g u r ð u r S i g u r ð a r s o n, 24.2.2017 kl. 11:07

6 Smámynd: Már Elíson

Ef þú í stolti þínu breytir þessu ekki (bíl) þá læturðu ambögu þína standa. Það er þér til vansa. - Þú gætir þá látið svo lítið að setja fyrir framan "svartri........bifreið" eða "svörtum Toyota.....".

Már Elíson, 24.2.2017 kl. 14:22

7 Smámynd: S i g u r ð u r   S i g u r ð a r s o n

Már, auðvitað er það mér til vansa að gagnrýna málfar annarra og klikka sjálfur á einfaldri beygingu lýsingarorðs. Ég átti það val að breyta og láta eins og ekkert væri eða þá að leyfa lesendum eins og þér að sjá mistökin. Valdi það síðara. Þetta kennir mér bara að vanda betur yfirlesturinn.

S i g u r ð u r S i g u r ð a r s o n, 24.2.2017 kl. 14:27

Bæta við athugasemd

Ekki er lengur hægt að skrifa athugasemdir við færsluna, þar sem tímamörk á athugasemdir eru liðin.

Innskráning

Ath. Vinsamlegast kveikið á Javascript til að hefja innskráningu.

Hafðu samband