Hálfkjörinn þingmaður situr í stjórn Ríkisútvarpsins

Hvenær er maður kjörin á þing og hvenær ekki? Þetta er ein mikilvægasta spurningin sem hrokkið hefur upp úr þeim stjórnmálamanni sem telur sig hvorki kjörinn né ókjörinn. Líklegast er hann hálfkjörinn.

Málavextir eru þeir að varaþingmaður Samfylkingarinnar, Mörður Árnason, situr á vegum hennar í stjórn Ríkisútvarpsins. Svo segir í lögum íslenskum að sá megi ekki sitja í stjórninni sem er kjörinn á þing eða í sveitarstjórn.

Mörður segist varaþingmaður og þurfi því ekki að víkja nema þegar hann sitji þingfundi til vara fyrir þann sem er aðal. Hann sé því ekki kjörinn, bara hálfkjörinn.

Engu að síður bauð hann sig fram í kosningum, var í fjórða sæti Samfylkingarinnar í Reykjavíkurkjördæmi suður. Það var sumsé staðföst ákvörðun frambjóðandans og flokksins hans að hann færi á framboðslista og með hálfum huga samþykktu kjósendur flokksins í þingkosningunum 2013 að Mörður væri hálfkjörinn en ekki alkjörinn.

Ekkert segir um hálfkjörna menn í lögum um stjórnarsetu hjá Ríkisútvarpinu. Mörður getur því skákað í því skjólinu að hann megi sitja í stjórn fyrirtækisins. Hér er alveg hægt að taka undir þessa frumlegu lögskýringu ... og þó.

Hvenær er annars Mörður kjörinn á þing og hvenær ekki? Sá má teljast óétinn sem sest við matarborðið en fyllir ekki maga sinn. Fór sá ekki í sund sem lét sér nægja að fara í heita pottinn? Gekk sá á Esjuna sem fór aðeins upp að „steini“? Er hægt að vera hálffullur eða alfullur? Er hægt að hálfbrjóta lögin ...? 

Má vera að þetta sé tóm vitleysa og misskilningur, að minnsta kosti hálfvitleysa og hálfmisskilningur. Auðvitað er þetta hálfvitagangur hjá mér enda jólaundirbúningur að hálfdrepa mig.

Myndin er af þeim hluta Marðar sem var kjörinn á þing.

Athugasemdir

[Halldór Egill Guðnason, 22.12.2015 kl. 14:41]

Kallast þetta ekki að vera hálf slappur ?

[Rafn Haraldur Sigurðsson (IP-tala skráð) 22.12.2015 kl. 19:39]

Væri ekki nær að skera helminginn af myndinni lárétt og nota neðri partinn.

[S i g u r ð u r S i g u r ð a r s o n, 22.12.2015 kl. 23:49]

Þú átt ábyggilega við mig, Halldór Egill. Og það mun vera rétt ályktað.

Hvernig sem myndin er skorin, Rafn, þá er maðurinn alltaf hálfur ... Ekki satt?

[Halldór Egill Guðnason, 23.12.2015 kl. 01:05]

Nei, Sigurður. Ég á ekki við þig, svo því sé haldið til haga og áréttað. Ég á við viðfangsefni pistilsins. Hálfir þingmenn finnast sennilega hvergi á byggðu bóli, nema á Íslandi.

Góðar stundir, með kveðju að sunnan.

[Gunnar Heiðarsson, 23.12.2015 kl. 07:28]

Mörður sagðist reyndar ekki hafa verið hálfkosinn, heldur að hann væri bara alls ekki kosinn.

Hvert á maður að leita til að fá að vera varaþingmaður? Ég gæti alveg hugsað mér að taka svona eins og einn mánuð í að sitja á þingi, skilst að ellilífeyririnn hækki verulega við slíkt. Ef ekki þarf kosningu til þess hlýt ég að geta sótt um. Spurningin er bara hvar!