Hraunað yfir andstæð rök

Afstaða bæjarstjórnar Garðabæjar og Vegagerðarinnar er slæm. Nú er svo komið að báðir þessir aðilar telja það nauðsyn að standa á fyrri skoðun, breyting sé merki um veikleika. Ekki virðist örla fyrir neinum skilningi á rökum gegn framkvæmdunum, sem er enn verra.

Verst er þó að bæjarstjórnin og Vegagerðin gera enga tilraun til að bera saman álíka umferðarþunga og ætlað er á hinum nýja vegi við þann sem er á álíka stöðum á höfuðborgarsvæðinu. Væri það gert kæmi í ljós að vegurinn nýi er ofmat á aðstæðum.

Það sem upp úr stendur er samt stórkostlegar skemmdir á afar fallegri hraunbreiðu sem á ekki sinn líka innan marka höfuðborgarsvæðisins. Vont er að kjörnir fulltrúar skuli ekki sjá þetta. Ekki örlar á tilraun til að koma til móts við andstæð rök heldur einfaldlega hraunað yfir þau, ef svo má að orði komast.

Breyta ekki fyrri áætlun

Athugasemdir

[Ómar Ragnarsson, 22.5.2013 kl. 09:39]

Þetta er að mínum dómi hárrétt lýsing hjá þér heldur er málið enn verra, því að framkvæmdaleyfið er útrunnið. Það fara 90 þúsund bílar um Miklubrautina yfir Elliðaárna við stærstu krossgötur landsins, en síðan ætla þessir herrar í Garðabænum í oflæti sínu að 22 þúsund bílar verði á ferðinni út á Álftanes! Áratugum saman hefur sami valdhópurinn haft völdin í Garðabæ og það, hvernig hann hagar sér núna minnir á orðtakið að vald spilli og mikið og langvarandi vald gerspilli.

[S i g u r ð u r S i g u r ð a r s o n, 22.5.2013 kl. 09:44]

Nýtt fólk eftir hverjar kosningar, ekki gleyma því, Ómar. Eina vandamálið sem ég sé er rökræðan og vilji til að ná niðurstöðu. Hræddur um að menn taki þetta alltof persónulega og geti ekki samið, það sé merki um veiklega. Svo er hins vegar alls ekki.

[Eiður Svanberg Guðnason, 22.5.2013 kl. 21:32]

Það er ömurlegt að bæði Vegagerð ríkisins og bæjarstjórnarmeirihluti Sjálfstæðismanna í Garðabæ skuli byggja afstöðu sína á útúrsnúningum. Halda því fram fullum fetum að vegagerðin um hraunið hafi hafist þegar gert var hringtorg við Bessastaðaafleggjarann. Meirihlutinn og Vegagerðin halda greinilega að fólk sé fífl og starfa samkvæmt því.

[S i g u r ð u r S i g u r ð a r s o n, 22.5.2013 kl. 23:30]

Ég er nú „hissastur“ á því hversu gamaldags stjórnvöld í Garðabæ og embættismenn í Vegagerðinni eru að neita að ræða málin, komast að niðurstöðu sem samfélagið getur sætt sig við.

Ómar Ragnarsson færði ágæt rök fyrir þessum málum á bloggsíðu sinni í dag. Hann sagði:

„Í hvaða heimi lifir meirihluti bæjarstjórnar Álftanes að gera ráð fyrir fjórföldun umferðar út á Álftanes upp í 22 þúsund bíla á dag til byggðar, þar sem 2700 manns búa?“

Andri Snær Magnason benti á heimasíðu sinni hversu rökin eru undarleg að eitthvað annað eigi að liggja til grundvallar vegi út á Álftanes en gerist og gengur með aðra vegi og götur á höfuðborgarsvæðinu, hann nefndi Skeiðarvog sem dæmi.

Og svo eru það rökin um gamlar götur í Gálgahrauni, algjörlega ósnortið hraun sem runnið hefur í sjó fram og fleira sem Eiður Guðnason hefur minnst á í blaðagreinum.

Ég er Sjálfstæðismaður og er tiltölulega sáttur við minn flokk en hins vegar get ég óhikað staðið upp og rökrætt mismunandi áherslur annarra í flokknum. Sjálfstæðismenn þurfa alls ekki að samþykkja allt sem frá forystumönnum flokksins kemur, hvorki í sveitarstjórnum eða annars staðar. Sama gildir með stefnu fólk úr öðrum stjórnmálaflokkum.

Staðreyndin er einfaldlega sú að hér er ekki um flokkspólitískt mál og ég sætti mig ekki við ákvörðun bæjarstjórnar Garðabæjar. Nú eru líklega 35 ár síðan ég lagði fyrst leið mína um Gálgahraun. Mér þótti þá hraunið stórkoslegur staður og hef ekki breytt um skoðun síðan.