Förum með ruslið í ráðhúsið

Það er göfugt markmið og gott að hreinsa til í kringum sig, skiptir engu hvaðan ruslið kemur. Hins vegar má velta vöngum yfir því hvernig stendur á þessu átaki, „Allir út með ruslapoka“. Er það vegna þess að Reykvíkingar eru sóðalegri en áður og kasti frá sér rusli? Eru kannski nýjar kynslóðir komnar fram sem gleymst hefur að ala upp í góðum síðum? Eða gæti verið að almenningur þurfi að gera það sem borgaryfirvöld hafa vanrækt.

Hvert sem svarið er þá skiptir mestu að fylla svörtu pokanna og fara með þá niður í ráðshús Reykjavíkur og skilja þá eftir hjá Jóni Kristinssyni, borgarstjóra. Hann og borgarstjórnarmeirihluti Samfylkingar bera ábyrgð á því hvernig borgin lítur út. Hún er orðin ferlega sóðaleg og afar ógeðfelld. Skattarnir hafa greinilega farið í allt annað. Förum með ruslið í ráðhúsið, þar á það heima.

Allir út með ruslapoka

Athugasemdir

[Rafn Haraldur Sigurðsson (IP-tala skráð) 17.4.2012 kl. 21:43]

Það lá við að ég gerði það í vetur þegar að ruslið hafði ekki verið hirt í nærri 4. vikur í stigaganginum hjá mér. Ég var einmitt mikið að hugsa um það að keyra eins og einni tunnu og sturta úr henni fyrir framan ráðhúsið, en eins og fyrri daginn hugsaði ég þeim þegjandi þörfina og  þjappaði í tunnurnar og setti einnig í svarta ruslapoka. En þetta var rétt eftir að sett var á 15 m reglan og ekki nóg með að maður þurfti að borga aukalega fyrir þessa 15 metra heldur komu þeir sjaldnar og þegar að það snjóaði, þá komu þeir bara alls ekki.

Ég held að við ættum ekkert að fara með ruslið í Ráðhús Reykjavíkur, nóg er nú af því þar þó svo við bætum ekki við það.