Er skipið skakkt eða hallast það?

Við meðfylgjandi mynd í Morgunblaðinu í morgun er þessi texti: „Eflaust hafa margir sem áttu leið hjá Reykjavíkurhöfn í gær velt fyrir sér hví eitt skipanna var svona skakkt!“

Og ég spyr, hvernig á að lýsa atvikinu? 

Svo ég svari nú sjálfur þá sýnist mér nú skipið frekar hallast en að það sé skakkt. Þó má líklega um það deila. Ef til vill er það skakkt miðað við bryggjuna, sjóinn eða húsin. Þá kemur upp sú spurning hver er rétti mælikvarðin. Má ver að skipið sé í eðlilegri stöðu en allt annað sé „skakkt“ eða hallist ... 

Myndin getur þó hæglega verið af skökku skipi og eitthvað annað í höfninni sé hreinlega skakkt, í orðsins fyllstu merkingu.

 

Athugasemdir

[Kjartan Sigurgeirsson, 29.6.2011 kl. 09:19]

Þetta er greinilega vandamál sem verður að fást botn í, skemmtileg pæling hvenær er skip skakkt og hvenær hallast það?

[Emil Hannes Valgeirsson, 29.6.2011 kl. 09:51]

Er ekki bara einhver hægri slagsíða þarna á ferðinni.

[S i g u r ð u r S i g u r ð a r s o n, 29.6.2011 kl. 11:22]

Já, pælingin er áhugaverð, en það er viðmiðið sem liggur til grundvallar, svo gripið sé til stofnanamáls. Á skipinu er vissulega hægri slagsíða, þó ekki frá sjónarhólin ljósmyndarans. Réttast væri bara að halla myndinni þangað til skipið er „rétt“ og ákvarða síðan út frá því að sjórinn sé skakkur. Hefur nokkur litið skakkan sjó?

Minnir mig á söguna um bæjarstjórn ónefnds bæjar úti á landi sem heitir Siglufjörður ... úbbs ... Hún stóð úti á bryggju og íhugaði vandamál sem var á þann veg að of grunnt var við hana fyrir tiltekna stærð af skipum. Og þar sem þessir gáfumenn stóðu kviknaði á perunni hjá einum þeirra: Heyrðið, við bara hækkum bryggjuna, sagði hann, en um leið og hann sleppti orðinu fattaði hann bullið í sjálfum sér. Það var því miður of seint, sagan lifir. En hver hefur eiginlega ekki látið út úr sér sambærilega vitleysu?

[Kjartan Sigurgeirsson, 29.6.2011 kl. 13:16]

Er ekki í lagi að tala um stjónborðs slagsíðu, leggst betur í mig en hægri slagsíða?

[S i g u r ð u r S i g u r ð a r s o n, 29.6.2011 kl. 13:20]

Ég tel að skipið á myndinn sé að minnsta kosti ekki skakkt. Það hallast ... á því er slagsíða stjórnborðsmegin ...

[Landfari, 29.6.2011 kl. 22:33]

Það er bara allt of mikið af fjölmiðlafólki sem ekki kann íslensku. Ef þetta væri eina dæmið væri þetta bara sniðugt, svo er því miður ekki. Svona röng notkun orða er nánast daglegt brauð.

Sá um daginn á nýmjólkinni minni alveg bráðsniðuga þýðingu á Komment og kommentakerfi: "Tjása" og "tjásukerfi".

Mér finnst þetta hitta beint í mark því oftast er maður að tjá sig um fréttirnar hér á blogginu frekar en gera athugasemdir við þær.

Hvað finnst ykkur?