Ekki tímabært að huga að nafni

Myndirnar sem Þorsteinn Jónsson tók eru góðar. Þó hefði ég viljað sjá fleiri. Landslagið á Fimmvörðuhálsi hefur greinilega breytst mikið, sjóðandi vatn og glóandi hraun hafa hreinsað burtu mikinn jökul.

Ekki er ástæða til að hrapa að nafngiftum. Tröllagjá getur varla verið réttnefni. Kreppukambur er kannski betra.

Bölmóður hefur lengi verið nafn á stórum gíg suðaustan í Hálsinum. Hann fékk nafnið um miðjan síðasta áratug  síðustu aldar þegar bölmóðurinn var að draga þjóðfélagið niður í sótsvart helv... Ekki varð það raunin en nú eru uppi krepputímar og margir bera ábyrgð. Hugsanlega er hægt að búa til örnefni úr nöfnum útrásarvíkinga og meðreiðasveina þeirra.

Myndina tók ég í leyfisleysi af visir.is og er eftir Egill. Biðst velvirðingar á þessu. Breytingar á landslaginu vestan við Bröttufannarfell eru gríðarlegar.

Nýtt fjall á Fimmvörðuhálsi

Athugasemdir

[corvus corax, 22.3.2010 kl. 16:44]

Landslagið á Fimmvörðuhálsi virðist ekkert hafa breyst ennþá miðað við myndirnar sem hafa verið að birtast og eldgosið hefur ekkert hreinsað burt af jökli svo neinu nemi eftir því sem jarðvísindamenn segja. Þessi hæðarræfill sem sumir virðast halda að sé nýtt fjall var þarna síðast þegar ég fór yfir Hálsinn en það var í september 2007.

[S i g u r ð u r S i g u r ð a r s o n, 22.3.2010 kl. 18:01]

Út af þessari athugasemdi bætti ég við mynd af landslaginu austan við gönguleiðina. Sannnast sagna eru miklar breytingar þarna á landslaginu.

[Baldur Fjölnisson, 22.3.2010 kl. 18:24]

Tja, er þetta ekki að gerast í um 1000 metra hæð yfir sjávarmáli - sem sagt uppi á fjöllum - og varla getur þetta því talist vera fjall, öllu heldur kambur eða hryggur.

Óskandi væri að mogginn gæti séð sér fært að ráða annað en tólf ára fallista úr grunnskóla í netfréttir sínar.

[Grefillinn Sjálfur - Koma svo! (IP-tala skráð) 22.3.2010 kl. 23:39]

Legg til að "fjallið" verði nefnt Sigurðarkambur.

[S i g u r ð u r S i g u r ð a r s o n, 22.3.2010 kl. 23:41]

Því er ég mikið sammála enda vantar á mig kambinn.

[Baldur Fjölnisson, 23.3.2010 kl. 19:31]

Já eða Sigurðarbunga, eftir því hvernig þetta lítur út eftir að gosinu lýkur.